ខេត្តតាកែវ ៖ មហាជននៅតែដាក់ការសង្ស័យជុំវិញរឿងនៅអគារស្កឹមស្កៃលិចធ្លោផុតចុងព្រឹក្សាថា ជាអគារសម្រាប់សម្បុកជនជាតិចិនប្រព្រឹត្តបទល្មើស ខណៈក្រុមអាជ្ញាធរអះអាងថាជារោងចក្រផលិតស្បែកជើងយ៉ាងឥតអៀនខ្មាស់ទៅវិញ ។
យោងតាមប្រជាពលរដ្ឋលក់ដូរនៅទល់មុខអាគារខាងលើបានអោយដឹងថា ពួកគាត់លក់ដូរនៅទីនេះ មិនឃើញមានកម្មករចេញចូលដូចរោងចក្រផលិតស្បែកជើងផ្សេងៗទៀតនោះទេ គឺឃើញមានតែកម្មករផ្នែកអនាម័យនិងផ្នែកជួសជុលបន្តិចបន្តួចតែប៉ុណ្ណោះចេញចូល ។
ប្រភពដដែលបានបន្តទៀតថា បើអគារខាងលើពិតជារោងចក្រផលិតស្បែកជើងមែននោះ គឺត្រូវប្រើកំលាំងកម្មករក្បែរពាន់នាក់ ពិតជាមានអ្នកចេញចូលគគ្រឹកគគ្រែងមានភាពអធិកអធ័មមិនខាន តែនេះគេសង្កេតឃើញតែក្រុមជនជាតិចិនចេញចូលដោយមានការប្រុងប្រយ័ត្នខ្ពស់បំផុត ដោយចតរថយន្តនៅខាងក្រៅ ហើយដើរទាំងក្រុមៗចូលទៅខាងក្នុង ។
គួរំលឹកថា អគារដ៏ធំស្កឹមស្កៃអមដោយរបងថ្មកំពស់៥ម៉ែត្រ ហ៊ុមពទ្ធ័ជិតឈឹង និងមានកងសន្តិសុខយាមកាមយ៉ាងតឹងរឹង ស្ថិតនៅឃុំលំពង់ ស្រុកបាទី ខេត្តតាកែវ ត្រូវបានមហាជនដាក់ការសង្ស័យថា ជាអគារភ្នាល់ល្បែងតាមប្រព័ន្ធអនឡាញ ។
យោងតាមប្រភពពីប្រជាពលរដ្ឋនៅក្បែរទីតាំងខាងលើ បានអោយដឹងថា រាល់ថ្ងៃ បើគេសង្កេតមើលអគារខាងលើ គឺដូចជាកាស៊ីណូសុទ្ធសាធ ព្រោះកងសន្តិសុខការពារយ៉ាងតឹងរឹង ហើយការចេញចូល គឺមានការត្រួតពិនិត្យតឹងរឹង ជាពិសេស ចេញចូលបានតែជនបរទេសដែលសុទ្ធតែចិនទាំងក្រុមៗនោះទេ ។
ប្រភពដដែលបន្តទៀតថា ចាប់ពីម៉ោង១០ព្រឹក គឺមានតាក់ស៊ីដឹកតែភ្ញៀងបរទេសនោះទេ មកដាក់មុខអគារខាងលើ ហើយជនបរទេសចូលទៅក្នុងអគារបាត់ ចំណែកតាក់ស៊ីនៅឈប់ចតតម្រៀបគ្នាមុខអគាររង់ចាំដឹកជនបរទេសទាំងនោះចេញទៅវិញភាគច្រើនជនជាតិចិន ។
យោងតាមប្រភពច្បាស់ការពីមន្ត្រីសាលាស្រុកបាទី សុំមិនបញ្ជេញឈ្មោះបានអោយដឹងថា
អគារខាងលើ គឺជាអគារភ្នាល់ល្បែងអនឡាញគ្រប់ប្រភេទ មានចម្រុះជាតិសាសន៍ ហើយបុគ្គលិកបម្រើការនៅក្នុងអគារមិនបានអនុញ្ញាតអោយចេញក្រៅផ្ដេសផ្ដាស់នោះទេ។
ចំណែកលោកភួន ឈឹម អភិបាលស្រុកបាទីបានអោយកោះសន្តិភាពដឹងតាមទូរស័ព្ទថា អគារខាងលើ គឺដូចជារីសត តែធាតុពិតគឺជាអគាររោងចក្រនោះទេ មិនមែនអគារភ្នាល់ល្បែងអនឡាញដូចមហាជននិយាយឡើយ តែពេលកោះសន្តិភាពសួរលោកអភិបាលថា តើរោងចក្រខាងលើឈ្មោះអ្វី ផលិតអ្វី លោកមិនបានប្រាប់ទេ ដោយលោកលើកឡើងថា លោកជាប់រវល់ប្រជុំ។
តាមពិតទៅ អគារដូចសកលវិទ្យាល័យនេះ សង្ស័យជាសំបុកល្បែងអនឡាញរបស់ជនជាតិចិន ដែលមានមន្ត្រីជាន់ខ្ពស់នៅភ្នំពេញទៅអើតម្តងម្កាលជាមន្ត្រីស័ក្តិធ្ងន់ស្មា ។ ចំណែកមន្ត្រីត្រឹមថ្នាក់ស្រុក ថ្នាក់ឃុំ អត់ហ៊ាននិយាយជាមួយអ្នកកាសែតទេ ត្រូវថ្នាំសណ្តំខៀវភ្នែកអស់ហើយ ។
មហាជនសង្ស័យថា មហាសម្បុកអនឡាញធំណាស់នៅទីនេះ ។ យូរៗឃើញមេខ្លោងនៅភ្នំពេញទៅអើតម្តងៗ តើអ្នកណាមិនខ្លាច? សំខាន់បំផុត អ្នកបម្រើអនាម័យពេលចេញមកក្រៅម្តងៗ បើគេសួរតើទីនេះគេធ្វើអី? គាត់អត់ឆ្លើយទេ ធ្វើមិនដឹង!
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ