ខេត្តកំពង់ធំ ៖ ភ្លៀងខ្យល់កន្ត្រាក់ និងរន្ទះបាញ់បានកើតឡើងចំនួន៣ករណី បណ្តាលស្លាប់មនុស្សម្នាក់ និងមនុស្សម្នាក់ទៀតរបួសធ្ងន់ ព្រមទាំងខូចខាតផ្ទះអស់ចំនួន២ខ្នង ។
ករណីទី១-កាលពីវេលាម៉ោង៦យប់ថ្ងៃទី២៣ ខែឧសភា ឆ្នាំ២០១៩ មានករណីរន្ទះបាញ់ បណ្តាលឱ្យស្លាប់មនុស្សម្នាក់ ស្ថិតនៅភូមិព្នៅ ឃុំត្នោតជុំ ស្រុកបារាយណ៍ ។
ជនរងគ្រោះដែលស្លាប់ឈ្មោះ សោម សារិទ្ធ ភេទប្រុស អាយុ៤៥ឆ្នាំ រស់នៅភូមិកើតហេតុ ។
តាមប្រភពព័ត៌មានបានឱ្យដឹងថា មុនពេលកើតហេតុ ខណៈជនរងគ្រោះចេញទៅឃ្វាលគោនៅឯវាលស្រែ ក៏ត្រូវរន្ទះបាញ់បណ្តាលឲ្យស្លាប់ ។
ក្រោយពេលកើតហេតុ សពជនរងគ្រោះត្រូវបានសាច់ញាតិនាំគ្នាដឹកយកមកធ្វើបុណ្យតាមប្រពៃណី ។
ករណីទី២-កាលពីវេលាម៉ោង៣និង៣០នាទីរសៀលថ្ងៃទី ២៣ ខែឧសភា ឆ្នាំ២០១៩ មានករណីរន្ទះបាញ់ បណ្តាលឲ្យមនុស្សម្នាក់រងរបួស ធ្ងន់ស្ថិតនៅតំបន់ទំនប់តាអឿន ភូមិសាគ្រាមត្បូង ឃុំសាគ្រាម ស្រុកប្រាសាទបល្ល័ង្ក ។
ជនរងគ្រោះឈ្មោះ ធូ រិទ្ធ ភេទប្រុស អាយុ៣០ឆ្នាំ រស់នៅភូមិឃុំកើតហេតុខាងលើ បានរងរបួសធ្ងន់ ត្រូវបានបញ្ជូនទៅព្យាបាលនៅមន្ទីរពេទ្យបង្អែកស្រុកស្ទោង ។
តាមប្រភពព័ត៌មានបានឱ្យដឹងថា មុនពេលកើតហេតុ ខណៈជនរងគ្រោះកំពុងតែភ្ជួរស្រែ ស្របពេលមេឃកំពុងភ្លៀង ស្រាប់តែមានរន្ទះបាញ់ បណ្តាលឱ្យជនរងគ្រោះរងរបួសធ្ងន់តែម្តង ។
ករណីទី៣-កាលពីវេលាម៉ោង២និង៣០នាទីរសៀលថ្ងៃទី២៣ ខែឧសភា មានករណីខ្យល់កន្ត្រាក់កើតឡើងនៅភូមិត្នោតជុំ២ ឃុំត្នោតជុំ ស្រុកបារាយណ៍ បណ្តាលឲ្យផ្ទះប្រជាពលរដ្ឋចំនួន២ខ្នងរងការខូចខាត ។
ផ្ទះ១ខ្នងមានម្ចាស់ឈ្មោះ ហ៊ឹម ចាន់ថន ភេទប្រុស អាយុ៣៧ឆ្នាំ និងប្រពន្ធឈ្មោះ ម៉ាន់ ឡៃហៀង អាយុ២៧ឆ្នាំ ផ្ទះមានទំហំ៤ម៉ែត្រx៥ម៉ែត្រ ធ្វើអំពីឈើ ជញ្ជាំងក្តារ ដំបូលប្រក់ស័ង្កសី បានរងការខូចខាតរបើកដំបូលអស់ទាំងស្រុង ។ ចំណែកផ្ទះ១ខ្នងទៀតមានម្ចាស់ផ្ទះឈ្មោះ សាំង ឃី ភេទប្រុស អាយុ៤៣ឆ្នាំ និងប្រពន្ធឈ្មោះ អ៊ឺម ហូ អាយុ៣៨ឆ្នាំ ផ្ទះមានទំហំ៧ម៉ែត្រx៨ម៉ែត្រ ធ្វើអំពីឈើ ជញ្ជាំងក្តារ ដំបូលប្រក់ក្បឿង រងការខូចខាតរបើកដំបូលប្រហែល៥០% ៕ (កែសម្រួលដោយ ៖ ធីតា)
ចែករំលែកព័តមាននេះ