ប្រទេសស៊ីរី ៖ យោងតាមអង្គការសិទ្ធិមនុស្សស៊ីរី OSDH មានប្រភពព័ត៌មានច្រើនក្នុងប្រទេសថា ការវាយប្រហារតាមអាកាសរបស់របបស៊ីរី កាលពីថ្ងៃទី២៣ ឧសភា បានសម្លាប់ជនស៊ីវិល៨នាក់ ក្នុងទីតាំងចុងក្រោយរបស់ពួកជីហាដនាភាគពាយ័ព្យស៊ីរី ដែលនៅទីនោះការប៉ះទង្គិចគ្នាបានបន្តនៅលើដី រវាងកងកម្លាំងរដ្ឋាភិបាលនិងពួកយុទ្ធជននៃអតីតសាខាអាល់កៃដានៅស៊ីរី។
កាលពីយប់ថ្ងៃទី២១ មកថ្ងៃទី២២ ឧសភា ការវាយប្រហារតាមអាកាសរបស់កងទ័ពស៊ីរី បានសម្លាប់ជនស៊ីវិល២៣នាក់រួចហើយ ក្នុងនោះ១២នាក់ក្នុងផ្សារមួយដែលមានមនុស្សកុះករ។ ខេត្តអុីដលីប និងតំបន់នានា នៃខេត្តជាប់ជិតខាងហាម៉ា អាឡែបនិងឡាតាគីយេ កាន់កាប់ជាពិសេសដោយក្រុមឧទ្ទាមTAHRIR AL CHAM អតីតអាល់កៃដា មានការកើនឡើងនៃអំពើហិង្សា ចាប់តាំងពីដំណាច់ខែមេសាមក។
ក្នុងខេត្តហាម៉ាកងទ័ពរដ្ឋាភិបាលបានប៉ះទង្គិចកាលពីថ្ងៃទី២៣ឧសភា ៣ថ្ងៃជាប់គ្នាហើយជាមួយពួកជីហាដ ដែលធ្វើការវាយបកវិញ នៅជុំវិញមូលដ្ឋានKAFR NABUDA។ យុទ្ធជន១៧នាក់បានត្រូវស្លាប់ក្នុងនោះមានពួកជីហាដ១១នាក់។ សរុបយុទ្ធជនជាង១០០នាក់បានត្រូវស្លាប់ ក្នុងការប៉ះទង្គិចគ្នានានានៅតំបន់KAFR NABUDAចាប់តាំងពីថ្ងៃទី២១ឧសភាមក។
ខេត្តអុីដលីប និងតំបន់ជុំវិញចាប់តាំងពីខែកញ្ញា ឆ្នាំ២០១៨មក ជាកម្មវត្ថុនៃកិច្ចព្រមព្រៀងមួយរវាងក្រុងមូស្គូ និងក្រុងអង់ការ៉ា ស្ដីពីតំបន់គ្មានយោធា ដើម្បីញែកគ្នាបណ្ដាដែនដីកាន់កាប់ដោយពួកឧទ្ទាមនិងពួកជីហាដ និងតំបន់ដែលកាន់កាប់ដោយរដ្ឋាភិបាលស៊ីរី។ ប៉ុន្តែចាប់តាំងពីដំណាច់ខែមេសាមក ការប្រយុទ្ធគ្នានៅទីនោះមានការកើនឡើង ហើយកងទ័ពរដ្ឋាភិបាលដណ្ដើមយកបានទីក្រុងជាច្រើន នាភាគខាងត្បូងខេត្តអុីដលីប និងភាគខាងជើងខេត្តហាម៉ា៕ (កែសម្រួលដោយ ៖ បុប្ផា)
ចែករំលែកព័តមាននេះ