ទីក្រុងតេអេរ៉ង់៖ យោធាអ៊ីរ៉ង់បានបាញ់មីស៊ីលផ្លោងជាច្រើនគ្រាប់សំដៅទៅមូលដ្ឋានកងទ័ពអាកាសរបស់អាមេរិកនៅប្រទេសហ្សកដង់។ ចំណែកយោធាអាមេរិកក៏បានវាយប្រហារមូលដ្ឋានរបស់អ៊ីរ៉ង់ជាច្រើនកន្លែងអស់រយៈពេល៥ម៉ោងនៅក្នុងសង្គ្រាមដណ្ដើមគ្រប់គ្រងច្រកសមុទ្រហ័រម៉ូស។ បញ្ហានេះធ្វើឱ្យប្រេងឆៅឡើងថ្លៃខ្ពស់បំផុតនៅក្នុងរយៈពេល៤សប្ដាហ៍ចុងក្រោយ។ យោធាអាមេរិកវាយប្រហារអ៊ីរ៉ង់អស់រយៈពេល៣រាត្រីជាប់គ្នាបន្ទាប់ពីអ៊ីរ៉ង់ប្រកាសកាលពីថ្ងៃសៅរ៍ថាខ្លួននឹងបិទច្រកសមុទ្រហ័រម៉ូសឡើងវិញ។
នៅពេលអ៊ីរ៉ង់ប្រកាសដូច្នេះ លោកដូណាល់ត្រាំក៏ប្រកាសបិទខ្ទប់ដែនសមុទ្ររបស់អ៊ីរ៉ង់ឡើងវិញផងដែរ និងទាមទារឱ្យកប៉ាល់នានាបង់ប្រាក់២០%ជាថ្នូរនឹងថ្លៃការពារ។ ការវាយប្រហារគ្នាទៅវិញទៅមកនេះធ្វើឱ្យគេបារម្ភថាបទឈប់បាញ់បណ្ដោះអាសន្នដែលអាចនឹងនាំឱ្យមានការបញ្ចប់សង្គ្រាមជាអចិន្ត្រៃយ៍នោះប្រហែលជាបរាជ័យហើយ។ ក្រុមអ្នកវិភាគប្រចាំតំបន់ថ្លែងថាជម្លោះនេះនៅតែស្ថិតនៅក្នុងក្របខណ្ឌអាចគ្រប់គ្រងបាននៅឡើយទេ។ ភាគីទាំង២កំពុងស្វះស្វែងរកចន្ទល់ដ៏រឹងមាំមួយដើម្បីឱ្យមានទម្ងន់នៅក្នុងការចរចាគ្នា។
ប៉ុន្តែការប្រយុទ្ធគ្នានេះក៏អាចនឹងរីករាលដាលហួសពីការគ្រប់គ្រងផងដែរ។ អ្នកវិភាគខ្លះបារម្ភថាភាគីទាំង២អាចនឹងវិលទៅរកសង្គ្រាមទ្រង់ទ្រាយធំសាជាថ្មី។ សង្គ្រាមនេះមិនទទួលបានគាំទ្រពីសំណាក់ប្រជាជនអាមេរិកទេព្រោះនៅពេលសង្គ្រាមផ្ទុះឡើងពេលណាធ្វើឱ្យតម្លៃសាំងហក់ឡើងខ្ពស់ជានិច្ច។ ម៉្យាងទៀត ការបោះឆ្នោតសភានាខែវិច្ឆិកាខាងមុខនេះក៏ជាកង្វល់សម្រាប់លោកត្រាំ និងគណបក្សសាធារណរដ្ឋផងដែរ។ ថ្ងៃនេះ ប្រេងឆៅតាមហាងឆេងនៅអឺរ៉ុបឡើងថ្លៃលើស៨៦ដុល្លារក្នុងមួយបារ៉ែល។
លីបង់ និងអ៊ីស្រាអែលចាប់ផ្ដើមចរចាគ្នាជាថ្មីនៅទីក្រុងរ៉ូម ប្រទេសអ៊ីតាលី។ លីបង់ចង់ឱ្យអ៊ីស្រាអែលដកកងទ័ពចេញពីភាគខាងត្បូងក្រោមកិច្ចសម្របសម្រួលរបស់អាមេរិក។ នៅក្នុងការវាយប្រហារលើកចុងក្រោយនេះ ឆ្មាំបដិវត្តឥស្លាមថ្លែងថាខ្លួនវាយប្រហារមូលដ្ឋានទ័ពអាកាសអាមេរិកនៅប្រទេសហ្សកដង់ដោយប្រើប្រាស់មីស៊ីលផ្លោង។ កងទ័ពហ្សកដង់ថ្លែងថាខ្លួនបាញ់ទម្លាក់មីស៊ីលបួនគ្រាប់ដែលបាញ់ចេញពីអ៊ីរ៉ង់ចូលដែនអាកាសរបស់ខ្លួន។ ឆ្មាំបដិវត្តបានអំពាវនាវឱ្យហ្សកដង់ឈប់អនុញ្ញាតឱ្យអាមេរិកដាក់មូលដ្ឋានសឹកនៅលើទឹកដីរបស់ខ្លួនដើម្បីកុំឱ្យមានភាពល្អក់កករនឹងគ្នា។ អ៊ីរ៉ង់ប្រកាសថាអាមេរិកបានវាយប្រហារទៅលើទីក្រុងជាច្រើនកន្លែង បណ្ដាលឱ្យរបួសមនុស្សបួននាក់។ ដំណើរការជួយសង្គ្រោះនៅតែបន្ត៕ ប្រភព៖ Reuters
ចែករំលែកព័តមាននេះ