ភ្លៀងធ្លាក់បុកខ្លាំងនៅខ្នងផ្សារ៖ អាជ្ញាធរជួយសង្គ្រោះអ្នកទេសចរចុះភ្នំដោយសុវត្ថិភាព និងព្រមានពីគ្រោះថ្នាក់ជាយថាហេតុ
- កំពង់ស្ពឺ
ខេត្តកំពង់ស្ពឺ ៖ រដ្ឋបាលខេត្តបានចេញសេចក្តីជូនដំណឹងស្តីពីការត្រៀមបង្ការទប់ស្កាត់គ្រោះថ្នាក់ជាយថាហេតុ ចំពោះភ្ញៀវទេសចរ និងបងប្អូនប្រជាពលរដ្ឋ ដែលមានបំណងធ្វើដំណើរកម្សាន្តនៅតំបន់ទេសចរណ៍ខ្នងផ្សារ ស្ថិតក្នុងឃុំតាសាល ស្រុកឱរ៉ាល់ ។
រដ្ឋបាលខេត្តបានឲ្យដឹងថា កាលពីថ្ងៃទី១២ ខែកក្កដា ឆ្នាំ២០២៦ កន្លងទៅថ្មីៗនេះ មានភ្លៀងធ្លាក់ខ្លាំងជាបន្តបន្ទាប់យ៉ាងគំហុក បណ្តាលឱ្យមានទឹកហូរធ្លាក់ពីតំបន់ភ្នំយ៉ាងគំហុក ដែលធ្វើឱ្យមានការលំបាកដល់បងប្អូនអ្នកទេសចរឡើង និងចុះពីលើតំបន់ភ្នំខ្នងផ្សារ ។ ជាក់ស្តែង បច្ចុប្បន្នអាជ្ញាធរមូលដ្ឋានពាក់ព័ន្ធ បានជួយសម្របសម្រួលជូនភ្ញៀវទេសចរ បានចុះមកដល់ខាងក្រោមវិញប្រកបដោយសុវត្ថិភាព ។
ពាក់ព័ន្ធនឹងស្ថានភាព និងអាកាសធាតុប្រែប្រួលនេះ ដើម្បីធានាសុវត្ថិភាពនិងបង្ការនូវគ្រោះថ្នាក់ជាយថាហេតុផ្សេងៗទាន់ពេលវេលា រដ្ឋបាលខេត្ត សូមសំណូមពរដល់ភ្ញៀវទេសចរ បងប្អូនប្រជាពលរដ្ឋ និងសហគមន៍ទេសចរណ៍ទាំងអស់ ដែលមានបំណងអញ្ជើញមកកម្សាន្តនៅលើតំបន់ទេសចរណ៍ខ្នងផ្សារ ត្រូវបង្កើនការយកចិត្តទុកដាក់ប្រុងប្រយ័ត្នខ្ពស់ ចំពោះស្ថានភាពទឹកភ្លៀងដែលកំពុងបន្តធ្លាក់ខ្លាំង ។
ក្នុងករណីនេះ សូមបងប្អូនភ្ញៀវទេសចរ និងសាធារណជន មេត្តាទំនាក់ទំនងជាមួយអាជ្ញាធរមូលដ្ឋាន សមត្ថកិច្ច ឬសហគមន៍ទេសចរណ៍ ដើម្បីចាត់វិធានការដោះស្រាយ ការពារ និងសង្គ្រោះបានទាន់ពេលវេលា ៕
ចែករំលែកព័តមាននេះ