ប្រទេសវៀតណាម ៖ ប្រទេសចិនបានវ៉ាដាច់សហរដ្ឋអាមេរិក ក្លាយទៅជាទីផ្សារនាំចេញគ្រឿងសមុទ្រដ៏ធំបំផុតរបស់ប្រទេសវៀតណាម នៅក្នុងឆមាសទី១ នៃឆ្នាំ២០២៦។ នេះបើយោងតាមប្រភពពីសារព័ត៌មាន VnExpress ចេញផ្សាយនៅថ្ងៃទី១៤ ខែកក្កដា ឆ្នាំ២០២៦។
បើតាមក្រសួងកសិកម្ម និងបរិស្ថានវៀតណាមបានបង្ហាញថា ការនាំចេញគ្រឿងសមុទ្រក្នុងរយៈពេល ៦ ខែដំបូងនៃឆ្នាំនេះ សម្រេចបានរហូតដល់ជាង ៥,៧ ពាន់លានដុល្លារ ពោលគឺកើនឡើង ១១,៤% ធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ ប្រទេសចិនបាននាំចូលគ្រឿងសមុទ្រវៀតណាមក្នុងតម្លៃជិត ១,៤ ពាន់លានដុល្លារអាមេរិក កើនឡើងប្រមាណ ៤០% បើធៀបនឹងរយៈពេលដូចគ្នា កាលពីឆ្នាំមុន និងបានវ៉ាដាច់សហរដ្ឋអាមេរិកដែលមានតម្លៃជិត ៨៩៨ លានដុល្លារ។ បើរាប់បញ្ចូលទាំងទីក្រុងហុងកុង ការនាំចេញទៅកាន់តំបន់នេះសម្រេចបានប្រហែល ១,៥ ពាន់លានដុល្លារ ពោលកើនឡើងជិត ៣៨%។ ប្រទេសជប៉ុនឈរនៅចំណាត់ថ្នាក់លេខ ៣ ជាមួយតម្លៃជិត ៧៨៨ លានដុល្លារ ដែលជាការកើនឡើងបន្តិចបន្តួច ធៀបនឹងរយៈពេលដូចគ្នា កាលពីឆ្នាំមុន។
អ្នកជំនាញបានថ្លែងថា និន្នាការនៃការផ្លាស់ប្តូរទីផ្សារទៅកាន់ប្រទេសចិនបានលេចឡើងកាន់តែច្បាស់ ចាប់តាំងពីដើមឆ្នាំមកម្ល៉េះ។ នៅក្នុងត្រីមាសទី១ ក្រុមហ៊ុននាំចេញបានជួបប្រទះនឹងបញ្ហាខ្វះខាតវត្ថុធាតុដើម ប៉ុន្តែនៅក្នុងត្រីមាសទី២ ទាំងតម្លៃវត្ថុធាតុដើម និងតម្លៃលក់បានធ្លាក់ចុះ។ ម្យ៉ាងដោយសារតម្លៃដឹកជញ្ជូនទៅកាន់ទីផ្សារឆ្ងាយៗ នៅតែមានកម្រិតខ្ពស់ ប្រទេសចិនបានក្លាយជាជម្រើសដ៏ទាក់ទាញជាងមុន ក៏ព្រោះតែទំនាក់ទំនងរវាងប្រទេសទាំងពីរ ថ្លៃដើមដឹកជញ្ជូនទាប និងទទួលបានផលចំណេញត្រឡប់មកវិញលឿន។
បើតាមសមាគមអ្នកនាំចេញ និងផលិតផលគ្រឿងសមុទ្រវៀតណាម (VASEP) បានឱ្យដឹងថា កំណើនការនាំចេញក្នុងឆមាសទី១នៃឆ្នាំនេះ មិនត្រឹមតែបានមកពីការងើបឡើងវិញនៃតម្រូវការទីផ្សារប៉ុណ្ណោះទេ ប៉ុន្តែក៏ឆ្លុះបញ្ចាំងពីសមត្ថភាពអាជីវកម្មក្នុងការសម្របខ្លួនទៅនឹងការផ្លាស់ប្តូរទីផ្សារ និងរចនាសម្ព័ន្ធផលិតផលផងដែរ។
បង្គានៅតែជាការនាំចេញធំបំផុតរបស់ឧស្សាហកម្មគ្រឿងសមុទ្រវៀតណាម ដោយមានទំហំទឹកប្រាក់ប្រហែល ២,៣ ពាន់លានដុល្លារក្នុងរយៈពេល៦ខែដំបូង នៃឆ្នាំនេះ កើនឡើង ១៣,៦% និងក្តោបក្តាប់ជាង ៤០% តម្លៃសរុបនៃការនាំចេញគ្រឿងសមុទ្រ រុញច្រានជាចម្បងដោយកំណើនបានមកពីចិនដីគោក និងហុងកុង ជាពិសេស បង្កងនាគ (Lobster) ដែលមានតម្រូវការខ្លាំងពីទីផ្សារទាំងពីរ៕
ចែករំលែកព័តមាននេះ