អុជធូបថ្ងៃសីល ទុកចោល បង្កជាអគ្គិភ័យឆេះផ្ទះស្តុកគ្រឿងអេឡិចត្រូនិច មួយកន្លែង នៅទឹកល្អក់ទី៣
- ភ្នំពេញ
រាជធានីភ្នំពេញៈផ្ទះស្តុក គ្រឿងអេឡិចត្រូនិចមួយកន្លែងនៅក្បែរ ផ្សារយូណាយ អតីតរោងចក្រយូណាយ ត្រូវបានអគ្គិភ័យឆាបឆេះបណ្ដាឲ្យរងការខូចខាតសម្ភារៈមួយចំនួន។
ហេតុការណ៍នេះបង្កឲ្យមានការភ្ញាក់ផ្អើលនៅវេលាម៉ោង ១១និង១០នាទីព្រឹក ថ្ងៃទី១៤ ខែកក្កដា ឆ្នាំ២០២៦ នៅចំណុចផ្ទះលេខបេ៤៨ ផ្លូវ២១៨ភូមិ៧ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។
តាមព័ត៌មានបានអោយដឹងថា នៅមុនពេលកើតហេតុ គេឃើញភ្លើងបានឆាបឆេះចេញពីជាន់ទី១ នៃផ្ទះល្វែងផ្សែងហុយខ្មួលខ្មាញ់ បង្កឲ្យមានការភ្ញាក់ផ្អើលពីប្រជាពលរដ្ឋនៅក្បែរខាង នាំគ្នាជួយពន្លត់និងទាក់ទងហៅរថយន្តពន្លត់អគ្គីភ័យចុះមកជួយអន្តរាគមន៍បាញ់ពន្លត់។
តាមនគរបាលការិយាល័យបង្ការពន្លត់អគ្គីភ័យនិងសង្គ្រោះនៃស្នងការនគរបាលរាជធានីភ្នំពេញបានឲ្យដឹងថា នៅក្នុងហេតុការណ៍នេះរថយន្តពន្លត់អគ្គីភ័យចំនួន ៨គ្រឿង បានទៅអន្តរាគមន៍ប្រើប្រាស់ទឹកអស់ចំនួន ១៦ឡាន ស្មើនឹង ៦៤ម៉ែត្រគូប ហើយភ្លើងបានរលត់ទៅវិញនៅម៉ោង ១២នឹង១៥នាទី នាថ្ងៃខែ ឆ្នាំដដែល។
តាមនគរបាលបានឲ្យដឹងទៀតថា ផ្ទះដែលត្រូវភ្លើងឆេះជាប្រភេទផ្ទះល្វែងមាន ម្ចាស់ឈ្មោះ: សារឿន ណាវី ភេទស្រី អាយុ ៣២ឆ្នាំ ជនជាតិ ខ្មែរ មុខរបរ:លក់ដូរ ។អគ្គីភ័យនេះបណ្ដាលឱ្យសម្ភារៈមួយចំនួនរួមមាន គ្រឿងអេឡិចត្រូនិច ដូចជា ខ្សែសាកទូរសព្ទ និងដុំសម្រាប់សាកទូរសព្ទត្រូវភ្លើងឆេះរងការខូចខាត។
មូលហេតុដែលនាំឲ្យកើតមានអគ្គីភ័យ បណ្ដាលឱ្យមកពីម្ចាស់អុជធុបថ្ងៃសីលទុកចោល បង្កជាអគ្គិភ័យតែម្តង៕
ចែករំលែកព័តមាននេះ