រូបសំណាកលោកយាយទេព នៅខេត្តកំពង់ឆ្នាំង ត្រូវបានដង្ហែឡើងអាសនៈវិញហើយ ក្រោយជួសជុលតភ្ជាប់ព្រះកេសរួចរាល់
- កំពង់ឆ្នាំង
ខេត្តកំពង់ឆ្នាំង ៖ ក្រោយការជួសជុលយ៉ាងបន្ទាន់ រូបសំណាកលោកយាយទេព ដែលត្រូវបានជនបែកថ្នាំ វាយបំបាក់ព្រះកេស កាលពីពេលកន្លងទៅ នៅព្រឹកថ្ងៃទី ១៤ ខែកក្កដា ឆ្នាំ ២០២៦ ចៅអធិការវត្តទេពធីតារាម ហៅវត្តយាយទេព មានទីតាំងក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង បានដឹកនាំព្រះសង្ឃ និងពុទ្ធបរិស័ទ មន្ត្រីរាជការ ប្រជាពលរដ្ឋ បានធ្វើពិធី ដង្ហែរូបសំណាក ដែលទើបជួសជុលហើយ ដង្ហែឡើងអាសនៈវិញហើយ។ គួររំលឹកថា រូបសំណាក់លោកយាយទេព ដែលប្រជាពលរដ្ឋគោរពបូជា ត្រូវជនសង្ស័យម្នាក់កាប់ដាច់ព្រះកេះធ្លាក់ដល់ដី
សូមរំលឹកថា បន្ទាប់ពីមានករណីគួរឱ្យសោកស្តាយមួយ បង្កឡើងដោយបុរសម្នាក់ដែលគេសង្ស័យថាជា “ជនបែកថ្នាំ” ឈ្មោះ នួន វិជ្ជា ភេទប្រុស អាយុ២៨ឆ្នាំ ជនជាតិខ្មែរ រស់ភូមិកណ្តាល សង្កាត់ផ្សារឆ្នាំង ក្រុង/ខេត្តកំពង់ឆ្នាំង បានជិះម៉ូតូធំសំដៅទៅកាន់អាស្រម រួចទាញពូថៅកាប់ទៅលើរូបសំណាក់លោកយាយទេព បណ្តាលឱ្យដាច់ព្រះកេសធ្លាក់ដល់ដី។ ដោយចោទថាបារមី លោកយាយទេព ធ្វើឲគ្រួសារគេឈឺ និងភ្ជាញ់គ្រួសារ ទើបធ្វើអោយខ្លួនខឹងសម្បារ។
នៅក្នុងពិធីដង្ហែនាព្រឹកព្រឹកនោះ គេសង្កេតឃើញមានការចូលរួមពីមន្ត្រីរាជការ អាជ្ញាធរដែនដីគ្រប់លំដាប់ថ្នាក់ និងប្រជាពលរដ្ឋយ៉ាងច្រើនកុះករ ដោយទឹកមុខរីករាយ និងជ្រះថ្លាឡើងវិញ។ ប្រជាពលរដ្ឋនៅក្នុងខេត្តកំពង់ឆ្នាំង បានសម្តែងនូវការត្រេកអរជាខ្លាំង ដោយសាររូបសំណាក់ «លោកយាយទេព» ដែលជាទីគោរពសក្ការៈ និងជាបង្អែកផ្លូវចិត្តដ៏ស័ក្តិសិទ្ធិរបស់ពួកគេ ត្រូវបានស្តារ និងដំឡើងត្រឡប់ទៅកន្លែងដើមវិញយ៉ាងឆាប់រហ័ស។
ជាមួយគ្នានេះដែរ អាជ្ញាធរក៏បានអំពាវនាវដល់បងប្អូនប្រជាពលរដ្ឋ ជួយគ្នាថែរក្សា និងការពារនូវសមិទ្ធផលវប្បធម៌ ក៏ដូចជាទីសក្ការៈនានា និងបានបញ្ជាក់ថា សមត្ថកិច្ចនឹងពង្រឹងការការពារសន្តិសុខនៅតាមតំបន់អាស្រម និងទីសក្ការៈសំខាន់ៗបន្ថែមទៀត ដើម្បីបង្ការកុំឱ្យមានហេតុការណ៍ស្រដៀងគ្នានេះកើតឡើងជាថ្មីម្តងទៀត។
មានការកត់សម្គាល់ថាក្រោយពីការជួសជុល តភ្ជាប់ព្រះកេស ឡើងវិញ គឺជាងបានលាបពណ៌លម្អ ធ្វើឲ្យរូបសម្លាកលោកយាយទេពមានភាពស្រស់ស្អាត អមដោយការបំពាក់គ្រឿងអលង្ការ និងសំលៀកបំពាក់ សមរម្យជា ជាលោកយាយ ដែលមានឥទ្ធិពលក្នុងជំនឿសាសនា៕
ចែករំលែកព័តមាននេះ