ក្រសួងសុខាភិបាល បានចេញសេចក្តីប្រកាសអំពាវនាវដល់ប្រជាពលរដ្ឋឱ្យបង្កើនការប្រុងប្រយ័ត្ន និងអនុវត្តវិធានការសុវត្ថិភាពឱ្យបានខ្ជាប់ខ្ជួន ដើម្បីការពារខ្លួនពីជំងឺឆ្លង និងគ្រោះថ្នាក់ផ្សេងៗ ដែលអាចកើតមានក្នុងរដូវភ្លៀង និងស្ថានភាពទឹកជំនន់ ។
ខណៈដែលតំបន់មួយចំនួននៅក្នុងខេត្តព្រះសីហនុ កោះកុង កំពត កំពង់ស្ពឺ ពោធិសាត់ជាដើមកំពុងប្រឈមមុខនឹងគ្រោះទឹកជំនន់ ក្រសួងបានរំលឹករឿងជំងឺឆ្លងដោយមូសមានគ្រុនឈាម គ្រុនចាញ់ គ្រុនឈីក ក៏ដូចជា ជំងឺសើស្បែក រាគ រាកមួល ពុលចំណី និងជំងឺផ្លូវដង្ហើម ។
ក្រៅពីជំងឺទាំងនោះ ក្រសួងក៏លើកទឹកចិត្តឲ្យពលរដ្ឋប្រុងប្រយ័ត្ននឹងពពួកសត្វអសិរពិសជាពិសេស គឺពស់ចឹក ហើយក៏ត្រូវយកចិត្តទុកដាក់លើសុវត្ថិភាពកន្លែងស្នាក់នៅ និងបញ្ហាអគ្គិសនី ពីព្រោះសំណង់អគារខ្លះអាចមានបញ្ហាអសុវត្ថិភាពលើចំណុចនេះ ។
ក្រសួងក៏បានណែនាំឱ្យប្រជាពលរដ្ឋប្រើប្រាស់ទឹកស្អាត ឬទឹកដែលបានដាំពុះឱ្យឆ្អិន រក្សាអនាម័យអាហារ និងលាងដៃជាមួយសាប៊ូឱ្យបានទៀងទាត់ ។ ទន្ទឹមនឹងនេះ ប្រជាពលរដ្ឋត្រូវជៀសវាងការបរិភោគអាហារ ឬប្រើប្រាស់ទឹកដែលអាចមានការបំពុល ព្រោះអាចបង្កឱ្យមានជំងឺរាគរូស អាសន្នរោគ និងជំងឺឆ្លងផ្សេងៗតាមទឹក ។
នៅក្នុងករណីមានបញ្ហាត្រូវប្រញាប់បញ្ជូនជនរងគ្រោះពីមណ្ឌលសុខភាព ជាកន្លែងដែលក្រសួងបានជំរុញឲ្យយកចិត្តទុកដាក់លើការបម្រុងឱសថ និងឧបករណ៍សង្គ្រោះឲ្យបានគ្រប់គ្រាន់ ដើម្បីផ្តល់សេវាដល់ពលរដ្ឋ ៕
ចែករំលែកព័តមាននេះ