អន្តរជាតិ ៖ បណ្តាប្រទេសក្នុងតំបន់អឺរ៉ុបបានកត់ត្រាចំនួនអ្នកស្លាប់ជាង ១០ ០០០ នាក់ អំឡុងពេលរលកកម្ដៅដ៏ក្ដៅបំផុតមិនធ្លាប់ ដែលបានគ្របដណ្តប់លើផ្នែកខាងលិចនៃទ្វីបមួយនេះ កាលពីចុងខែមិថុនា កន្លងទៅ។ នេះបើតាមប្រភពពី Reuters បានចេញផ្សាយនៅថ្ងៃទី១៣ ខែកក្កដា ឆ្នាំ២០២៦។
យោងតាមទិន្នន័យដែលចេញផ្សាយដោយ EuroMOMO ដែលជាបណ្តាញគាំទ្រដោយមជ្ឈមណ្ឌលអឺរ៉ុបសម្រាប់ការបង្ការ និងគ្រប់គ្រងជំងឺ (ECDC) និងអង្គការសុខភាពពិភពលោក (WHO) បានបង្ហាញថា ភាគច្រើនលើសលប់នៃអ្នកស្លាប់ជាង ៩ ០០០ នាក់ គឺជាមនុស្សមានអាយុចាប់ពី ៦៥ ឆ្នាំឡើងទៅ។ ដ្បិតកំដៅខ្លាំងអាចបណ្តាលឱ្យស្លាប់បាន តាមរយៈជំងឺដាច់សរសៃឈាមខួរក្បាល ឬបញ្ហាសរសៃឈាមបេះដូង និងជំងឺផ្លូវដង្ហើមកាន់តែធ្ងន់ធ្ងរ ដោយនៅក្នុងនោះមនុស្សចាស់ស្ថិតក្នុងចំណោមក្រុមមនុស្សងាយរងគ្រោះបំផុត។
ក្រុមអ្នកវិទ្យាសាស្ត្របានអះអាងថា រលកកំដៅនៅចុងខែមិថុនា នឹងមិនអាចកើតឡើងបានឡើយ ប្រសិនបើគ្មានការប្រែប្រួលអាកាសធាតុដែលបង្កឡើងដោយមនុស្ស ដែលកំពុងធ្វើឱ្យរលកកំដៅកើតឡើងកាន់តែញឹកញាប់ និងកាន់តែខ្លាំងក្លា។
យោងទិន្នន័យប្រមូលបានពីស្ថិតិអ្នកស្លាប់នៅក្នុងប្រទេសអឺរ៉ុបចំនួន ២៧ បានកើតឡើងអំឡុងសប្តាហ៍នៃថ្ងៃទី ២២ ដល់ថ្ងៃទី ២៨ ខែមិថុនា នៅពេលរលកកំដៅបានឡើងដល់កម្រិតកំពូលនៅក្នុងប្រទេសបារាំង អេស្ប៉ាញ ចក្រភពអង់គ្លេស និងប្រទេសដទៃទៀត៕
ចែករំលែកព័តមាននេះ