ក្រុមចោរហារយវ័យក្មេង១៧នាក់កំពុងស្ថិតក្នុងតំណាក់កាលនីតិវិធីរបស់តុលាការ
- បាត់ដំបង
ខេត្តបាត់ដំបង ៖ ក្រុមចោរវ័យក្មេងចំនួន១៧នាក់ ដែលសមត្ថកិច្ចស្រុកបាណន់ដើរប្រមូល និងធ្វើការឃាត់ខ្លួនកាលពីសប្ដាហ៍មុន គិតត្រឹមថ្ងៃទី១៣ កក្កដា នេះ កំពុងស្ថិតក្នុងដៃតុលាការចាត់ការតាមនីតិវិធីនៅឡើយ ។ នេះបើតាមការផ្ដល់ព័ត៌មានពីសមត្ថកិច្ច ។
ស្នងការរងទទួលផែនព្រហ្មទណ្ឌ លោក ឈឿង គឹមសុង បានឲ្យដឹងថា ក្រុមជនសង្ស័យ«លួចមានស្ថានទម្ងន់ទោស»ចំនួន១៧នាក់ ដែលបង្ក្រាបនៅស្រុកបាណន់ កាលពីសប្ដាហ៍មុននេះ ត្រូវបានមន្ត្រីជំនាញកសាងសំណុំរឿងបញ្ជូនទៅតុលាការអស់ហើយ ។ ប៉ុន្តែនៅថ្ងៃនេះ (១៣.០៧.២៦) តំណាងអយ្យការអមសាលាដំបូងខេត្ត អាចនឹងបញ្ចប់នីតិវិធីសួរនាំ ហើយនឹងអាចបញ្ជូនជនសង្ស័យទាំង១៧នាក់នោះ ទៅកាន់លោកចៅក្រមស៊ើបសួរ ដើម្បីបន្តនីតិវធីនេះ មុនពេលត្រូវបញ្ជូនទៅកាន់ទ្វារខ្មៅ ។
ក្រុមជនសង្ស័យក្នុងអំពើ «ចោរកម្ម» ទាំង១៧នាក់នោះ មានអាយុចាប់ពី១៤ឆ្នាំ ដល់អាយុ១៩ឆ្នាំ ជាកូនចៅអ្នកស្រុកបាណន់ តែក្នុងចំណោមនោះមានម្នាក់ជាកូនអ្នកក្រុងបាត់ដំបង ។ ក្រុមនេះ ត្រូវបានកម្លាំងអធិការស្រុកបាណន់ធ្វើការស្រាវជ្រាវតាមចាប់ខ្លួនបានជាបន្តបន្ទាប់កាលពីថ្ងៃទី០៨ កក្កដា ក្រោមបទចោរ «លួចមានស្ថានទម្ងន់ទោស» ដែលប្រព្រឹត្តច្រើនករណីនៅក្នុងឃុំឈើទាល និងឃុំកន្ទឺរ២ ស្រុកបាណន់ ។
លោក ហេង បារាំង អធិការស្រុកបាណន់បានដឹកនាំមន្ត្រីជំនាញ និងកម្លាំងប៉ុស្ដិ៍រដ្ឋបាល មូលដ្ឋាន តាមចាប់អូស.កក្រុមចោរហារយនេះទាំងព្រលឹមអុរ ពីតាមខ្ទមចម្ការ ខ្ទមស្រែ ឬ តាមសំយ៉ាបផ្ទះ ដែលពួកគេស្នាក់នៅបណ្ដោះអាសន្ន បន្ទាប់ពីពួកគេដើរធ្វើសកម្មភាព«លួច»ដាច់យប់ ។
នៅក្នុងសំណុំរឿង ក្រុមនេះត្រូវជាប់សង្ស័យថា បានធ្វើសកម្មភាព «គាស់ទម្លុះទម្លាយ» តាមតូបលក់ដូរ និងតាមផ្ទះសម្បែងរបស់ប្រជាបលរដ្ឋលួចយកទ្រព្យសម្បត្តិ លួចធុងទឹកកក ដែលម្ចាស់ដាក់ក្លាស្សេគ្រឿងកំប៉ុងមានដូចជា៖ ភេសជ្ជៈ ស្រាបៀរ ឬគ្រឿងក្លែមផ្សេងៗ ។
ជាមួយនឹងការចេញធ្វើសកម្មភាពប្រព្រឹត្តអំពើ «ចោរកម្ម» ម្ដងៗ ក្រុមចោរហារយទាំងនេះ បាននាំគ្នាជិះម៉ូតូច្រើនគ្រឿង នៅពាក់កណ្ដាលអធ្រាត្រ ប្រដាប់ដោយកាំបិត ដាវ ឬ ដែកបំពង់ទីប ជិះម៉ូតូទាំងហ្វូងអូសដែក អូសដាវ បែកផ្កាភ្លើងពេញថ្នល់ ផ្អើលអស់អ្នកភូមិ ប៉ុន្តែបែរជាមិនរំខានដល់សមត្ថកិច្ចម្ដងណាសោះ ។
រហូតពួកគេចេញធ្វើសកម្មភាពប៉ុន្មានលើកយ៉ាងកក្រើកចុងក្រោយនេះ ទើបលោកសមត្ថកិច្ចចាប់អារម្មណ៍ងើបពីដំណេកតាមចាប់ខ្លួនក្រុមលោកចោរវ័យក្មេង អុកឡុកអ្នកស្រុកបាណន់នេះបានចំនួន១៧នាក់ ។
យ៉ាងណា ពេលនេះ តុលាការបាននិងកំពុងចាត់ការលើក្រុមជនសង្ស័យមួយសំបុកនេះតាមនីតិវិធីហើយ ប៉ុន្តែគេនៅមិនទាន់ដឹងថា នៅដំណាក់កាលចុងក្រោយ តើមានប៉ុន្មាននាក់ត្រូវបញ្ជូនទៅកាន់ទ្វារខ្មៅ? ហើយមានប៉ុន្មាននាក់អាចនឹងត្រូវដាក់ឲ្យនៅក្រៅឃុំ ក្រោមការត្រួតពិនិត្យរបស់តុលាការ?
ចែករំលែកព័តមាននេះ