ខេត្តសៀមរាប ៖ ឃុំកំពង់ឃ្លាំង គឺជាឃុំមួយស្ថិតនៅប៉ែកខាងទន្លេសាប ៦ខែគោក ៦ខែលិចទឹក ទូទាំងឃុំ ដែលឃុំកំពង់ឃ្លាំងមានប្រជាប្រិយភាពទាំងរដូវវស្សា និងរដូវប្រាំង និងបានទាក់ទាញភ្ញៀវទេសចរមកកម្សាន្តដោយមន្តស្នេហ៍ធម្មជាតិ រួមទាំងភាពញញឹមរាក់ទាក់ពីបងប្អូនប្រជាពលរដ្ឋដែលរស់នៅក្នុងបឹងទន្លេសាប និងសម្រស់ដ៏ស្រស់ស្អាតគ្រប់រដូវកាល ស្ថិតនៅក្នុងស្រុកសូត្រនិគម ខេត្តសៀមរាប ។
ដោយមានការខិតខំយកចិត្តទុកដាក់ពីសំណាក់គណៈកម្មការសហគមន៍ទេសចរណ៍ធម្មជាតិកំពង់ឃ្លាំង និងមានការគាំទ្រពីអាជ្ញាធរខេត្ត អាជ្ញាធរស្រុក អាជ្ញាធរមូលដ្ឋាន និងក្រសួងទេសចរ មន្ទីរទេសចរណ៍ ខេត្តបានជម្រុញឲ្យ សហគមន៍ទេសចរណ៍ធម្មជាតិកំពង់ឃ្លាំង អភិវឌ្ឍន៍ខ្លួនពីមួយឆ្នាំទៅមួយឆ្នាំប្រកបដោយភាពរីកចម្រើនរហូតមានការណូតតូចធំជាង១០០គ្រឿង សម្រាប់ការធានាបាននូវការបម្រើសេវាកម្មផ្នែកទេសចរណ៍ដល់ភ្ញៀវដែលបានអញ្ជើញមកទស្សនាទេសចរណ៍ធម្មជាតិក្នុងឃុំកំពង់ឃ្លាំង ។
លោកសរ ប៊ុនចំរ៉ុង តំណាងសហគមន៍ទេសចរណ៍ធម្មជាតិកំពង់ឃ្លាំងបានមានប្រសាសន៍ថា សហគមន៍បានដំណើរការជាង១០ឆ្នាំមកហើយ និងទទួលបានអាជ្ញាប័ណ្ណឲ្យប្រកបអាជីវកម្មនៅឆ្នាំ២០១៦ និងមានគោលការអភិវឌ្ឍន៍កន្លែងទេសចរណ៍បន្ថែមលើទីតាំងដែលមានស្រាប់ ដោយរៀបចំមានទីតាំងសម្រាប់ភ្ញៀវទេសចរអុំទូកលេងកម្សាន្ត នៅក្នុងដែនព្រៃអភិរក្សដែល មានផ្ទៃដី១២ហិកតា ស្ថិតនៅក្នុងភូមិតាច្រនាង ដោយត្រូវបានចំណាយថវិកាជិត១ម៉ឺនដុល្លារ ក្នុងការសំអាតផ្នែកខាងក្រោមដើមឈើ ដើម្បីងាយស្រួលដល់ការកម្សាន្ត និងការផ្តិតយករូបភាពរបស់ភ្ញៀវទេសចរ ។
លោកបានបន្តថា ចំណែកបរិស្ថាន គឺត្រូវបានអប់រំផ្សព្វផ្សាយឲ្យមានការចូលរួមទាំងអស់គ្នាពីសំណាក់បងប្អូនប្រជាពលរដ្ឋដោយសំអាតនៅតាមមុខផ្ទះរបស់ខ្លួនបញ្ឈប់ការចោលសំរាមចូលព្រែករួមទាំងការហាលសម្លៀកបំពាក់នៅតាមមុខផ្ទះក្នុងនោះក៏បានពង្រឹងការយកចិត្តទុកដាក់លើផ្នែកអានាម័យ និងការពារសុវត្តិភាពជូនភ្ញៀវទេសចរ និងមានផ្ទះសំណាក់ចំនួន៦ កន្លែងសម្រាប់ទទួលភ្ញៀវទេសចរ ដោយមានបម្រើសេវាកម្មម្ហូបអាហារតាមតម្រូវការរបស់ភ្ញៀវទេសចរ ។
សម្រស់ដែលធ្វើអាចទាក់ទាញភ្ញៀវទេចរបាន គឺនៅរដូវវស្សា ភ្ញៀវទេសចរអាចទស្សនាសម្រស់ព្រៃប្រឹក្សាដែលតម្រៀបត្រៀមត្រាក្នុងផ្ទៃបឹងទន្លេសាប អាចផ្តិតយករូបភាពផ្ទះប្រជាពលរដ្ឋដែលមានការសាងសង់ដ៏ចម្លែកប្លែកពីប្រជាពលរដ្ឋរស់នៅលើគោក រួមទាំងបានជិះការណូតទស្សនាបឹងទន្លេសាបដ៏ធំជាងគេនៅលើពិភពលោក បានសិក្សាពីវិធីជីវិតរស់នៅ ប្រកបមុខរបរនេសាទត្រីរបស់ប្រជាពលរដ្ឋ រួមទាំងតំបន់វប្បធម៌សាសនាវត្តអារាមជាដើម ។
តំណាងសហគមន៍ទេសចរណ៍ធម្មជាតិកំពង់ឃ្លាំងបានបង្ហើបពីផលពិបាកខ្លះៗសម្រាប់សហគមន៍ដោយសារទីស្នាក់ការទេសចរណ៍មានការបំផ្លាសទីជាច្រើនកន្លែងក្នុងមួយឆ្នាំៗ លោកបានបញ្ជាក់ថា នៅរដូវប្រាំងទីស្នាក់ការមកនៅមុខវត្តកំពង់ឃ្លាំងដល់ខែវស្សាទីស្នាក់ការមកនៅទីតាំងព្រៃស្រមោចដោយសារទឹកជនលិច និងបានសំណូមពរឲ្យលោកថោង ខុន រដ្ឋមន្ត្រីក្រសួងទេសចរណ៍ និងលោកទៀ សីហា អភិបាល ខេត្តសៀមរាបមេត្តាជួយកាយព្រែកដែលមានចម្ងាយជាង៨គ.ម ដើម្បីងាយស្រួលដឹកជញ្ជូនភ្ញៀវទេសចរក្នុងរដូវប្រាំងនេះផង ដោយសារតែរដូវប្រាំង កគោក រីងខ្លះមានផលពិបាកក្នុងការដឹកជញ្ជូនភ្ញៀវទេសចរ៕ កែសម្រួលដោយ៖ សុឃាក់
ចែករំលែកព័តមាននេះ