ខេត្តកំពង់ធំ ៖ សិស្សសាលានាំគ្នាទៅមុជទឹកស្ទឹងលង់ស្លាប់ម្នាក់ ករណីមនុស្សស្លាប់លង់ទឹកស្ទឹងបានកើតកាលពីវេលាម៉ោង១០និង៣០នាទីព្រឹក ថ្ងៃទី១៨ ខែឧសភា ឆ្នាំ២០១៩ នៅចំណុចកំពង់ក្របៅ ស្ថិតនៅក្នុងភូមិប្រាសាទ ឃុំប្រាសាទ ស្រុកសន្ទុក ខេត្តកំពង់ធំ រហូតម៉ោង១២និង២០នាទីរសៀល ទើបរកសពឃើញ ។
សមត្ថកិច្ចប្រាប់ថា សពជនរងគ្រោះឈ្មោះ តាំង ធារ៉ា ភេទប្រុស អាយុ១៣ឆ្នាំ មុខរបរជាសិស្សថ្នាក់ទី៧ នៃអនុវិទ្យាល័យតាញ៉ោក មានទីលំនៅនៅភូមិសីវុត្ថា ឃុំប្រាសាទ ស្រុកសន្ទុក ខេត្តកំពង់ធំ ជនរងគ្រោះឈ្មោះតាំង ធារ៉ា មានឪពុកម្ដាយតែបានទៅធ្វើកម្មករនៅឯទីក្រុងភ្នំពេញ រស់នៅតែម្នាក់ឯងជាមួយសាច់ញាតិ ។
បើតាមសាក្សីទី១- ឈ្មោះធាង ចុងថាង ភេទប្រុស អាយុ១១ឆ្នាំ ទី២- ឈ្មោះមៀត រដ្ឋ ភេទប្រុស អាយុ១០ឆ្នាំ និងទី៣-ឈ្មោះលាក់ ជីលាំង ភេទប្រុស អាយុ១១ឆ្នាំ រស់នៅភូមិជាមួយគ្នា ពួកគាត់បានរៀបរាប់ថា មុនកើតហេតុពួកគេបាននាំគ្នាមកងូតលេងទឹកស្ទឹង នៅចំណុចកើតហេតុខាងលើ ខណៈនោះជនរងគ្រោះបានដើរលេងតាមបណ្ដោយទឹកស្ទឹងមកខាងក្រោមចំនុចកំពង់ក្របៅនេះក៏បានធ្លាក់ចូលទៅក្នុងល្បាក់អន្លុង បណ្ដាលឱ្យលង់ទឹកបាត់នៅទីនោះ ឃើញដូច្នេះពួកគេក៏បានរត់ទៅប្រាប់ឪពុកម្ដាយនៅឯផ្ទះ និងញាតិជិតខាងនាំគ្នាទៅដល់ទីកន្លែងកើតហេតុ មុជទឹកស្ទឹងរាវរកជនរងគ្រោះ អ្នកភូមិជាច្រើននាក់បាននាំគ្នាមុជរាវរករួមទាំងសមត្ថកិច្ចនគរបាលប៉ុស្តិ៍រដ្ឋបាលជួយចាត់ចែងរាវរកផងដែរ រហូតដល់ម៉ោង១២និង២០នាទីរសៀលទើបបានឈ្មោះសៀន សៀ ភេទប្រុស អាយុ៣៣ឆ្នាំ នៅភូមិប្រាសាទ រាវប្រទះឃើញ រងគ្រោះនៅបាតស្ទឹងស្លាប់បាត់ទៅហើយ ។
ក្រោយទទួលព័ត៌មានកម្លាំងជំនាញស្រុកសហការជាមួយប៉ុស្តិ៍រដ្ឋបាល និងប្រជាពលរដ្ឋចុះដល់កន្លែងកើតហេតុ ដើម្បីពិនិត្យសពនៅលើដងខ្លួន និងអវៈយវៈ ពុំមានស្លាកស្នាមអ្វីកត់សម្គាល់ឡើយ ដោយសន្និដ្ឋាន ពិតជាស្លាប់ដោយលង់ទឹកប្រាកដមែន មូលហេតុមិនចេះហែលទឹក រួចសពប្រគល់ជូនក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ