ខេត្តបន្ទាយមានជ័យ ៖ យ៉ាងហោចមនុស្ស៩នាក់ របួសធ្ងន់និងស្រាល ក្នុងនោះមានស្ត្រី៤នាក់ កាលពីយប់ថ្ងៃទី១៦ ឧសភា លើដងផ្លូវបេតុងចំណុចផ្លូវបំបែកជា៤ ក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ដោយសារឧប្បត្តិហេតុ រថយន្តអុីស៊ុយហ្សុ៊យបុករះម៉ូតូក្នុងទិសដៅបញ្ច្រាសទិសគ្នា ។ សមត្ថកិច្ចនៅមិនទាន់ដឹងអត្តសញ្ញាណជនរងគ្រោះទាំងអស់នៅឡើយទេ បានត្រឹមតែបញ្ជាក់ថា ៧នាក់សម្រាកព្យាបាលនៅមន្ទីរពេទ្យបង្អែកក្រុងប៉ោយប៉ែត ។ ឯ២នាក់ទៀតសម្រាកព្យាបាលនៅគ្លីនិកឯកជន ហើយម៉ូតូខូចខាតចំនួន៤គ្រឿងធ្ងន់ធ្ងរ ។
ករណីនេះនគរបាលជំនាញចរាចរនៃអធិការដ្ឋាននគរបាលក្រុងប៉ោយប៉ែតប្រាប់ថា បង្កឡើងដោយរថយន្តម៉ាកអុីស៊ុយហ្សុ៊យ១បាំង ពណ៌ប្រផេះ ពាក់ស្លាកលេខភ្នំពេញ2AA.9784 បើកបរដោយជនមិនស្គាល់អត្តសញ្ញាណ ព្រោះក្រោយកើតហេតុបានគេចខ្លួនបាត់ ។ សមត្ថកិច្ចបន្តថា រថយន្តបង្កបើកបរក្នុងគោលដៅពីកើតទៅលិច លុះដល់ចំណុចកើតហេតុក៏បុករះម៉ូតូ ៤គ្រឿង ដែលបើកបរបញ្ច្រាសទិសបណ្តាលឲ្យជនរងគ្រោះរបួសរដូករណែលលើដងផ្លូវតែម្តង ។
ជនរងគ្រោះក្នុងហេតុការណ៍មួយចំនួនត្រូវសមត្ថកិច្ចអន្តរាគមន៍ហៅរថយន្តសង្គ្រោះដឹកទៅកាន់មន្ទីរពេទ្យ និង២នាក់ទៀតត្រូវសាច់ញាតិនាំចូលគ្លីនិកឯកជន ខណៈយានយន្តពាក់ព័ន្ធត្រូវបានសមត្ថកិច្ចនាំយកទៅរក្សាទុកនៅអធិការដ្ឋាននគរបាលក្រុងប៉ោយប៉ែត ដើម្បីរង់ចាំធ្វើការដោះស្រាយ ។ ចំពោះមូលហេតុដែលបណ្តាលឱ្យមានការបុករះនេះមិនដឹងថាបណ្តាលមកពីអ្វីនោះទេ ដោយសារអ្នកបើកបររថយន្តបានរត់គេចខ្លួនបាត់ ។
ប្តីប្រពន្ធនិងបងបង្កើតស្លាប់ទាំង៣នាក់ក្នុងថ្លុកឈាមដោយសាររថយន្តដឹកដីបុកកិនពីលើក្នុងហេតុការណ៍មួយទៀតមនុស្ស៣នាក់ ជាប្តីប្រពន្ធ និងបងប្រុសបង្កើតបានស្លាប់ក្នុងថ្លុកឈាមភ្លាមៗលើដងផ្លូវជាតិលេខ៥ ក្នុងភូមិអណ្តូងថ្មមាស សង្កាត់ផ្សារកណ្តាល ក្រុងប៉ោយប៉ែតដោយសាររថយន្តដឹកដីបុកនិងកិនម៉ូតូ ខណៈដែលធ្វើដំណើរស្របទិសគ្នា ។ ជនរងគ្រោះទាំង៣នាក់រួមមាន១-ឈ្មោះ ផាត ភាព ភេទប្រុស អាយុ៣៦ឆ្នាំ ២-ឈ្មោះ ផាត ភាន ភេទប្រុស អាយុ២៣ឆ្នាំ (ប្អូនបង្កើតរបស់ឈ្មោះ ផាត ភាព) និងប្រពន្ធឈ្មោះ ស្រី តំ អាយុ១៩ឆ្នាំ ។ ពួកគេទាំង៣នាក់ ជាកម្មករសំណង់ នៅក្រុងប៉ោយប៉ែត និងមានទីលំនៅភូមិក្បាលថ្នល់ ឃុំព្រៃខ្ពស់ ស្រុកបវេល ខេត្តបាត់ដំបង ។
ជនរងគ្រោះទាំង៣នាក់ជិះម៉ូតូម៉ាកឌ្រីមធុនសេ១២៥ ពណ៌ខ្មៅ ។ នគរបាលជំនាញចរាចរណ៍នៃអធិការដ្ឋាននគរបាលក្រុងប៉ោយប៉ែត បានប្រាប់នៅកន្លែងកើតហេតុថា យោងតាមការសាកសួរដំបូងជនរងគ្រោះជិះម៉ូតូឌុបគ្នា ដោយឈ្មោះ ផាត ភាព ជាអ្នកបើកបរ ពីទិសខាងលិចទៅខាងកើត ។ លុះដល់ចំណុចខាងលើម៉ូតូក៏បានបើកជែងរថយន្តដឹកដីពីមុខ តែមិនទាន់ផុតផងស្រាប់តែវាក់នឹងរថយន្តបញ្ច្រាសទិសមួយគ្រឿងអ្នកបើកម៉ូតូក៏រេចង្កូតងាកមកស្តាំវិញចូលពីមុខរថយន្តដឹកដី ទើបបុកនឹងកិនស្លាប់យ៉ាងអាណោចអាធ័មទាំង៣នាក់តែម្តង ។
យ៉ាងណាក៏ដោយអ្នកបើកបររថយន្តដឹកដីត្រូវបានសមត្ថកិច្ចឃាត់ខ្លួនគឺឈ្មោះ ហេង វាសនា ភេទប្រុស អាយុ២៧ឆ្នាំ រស់នៅភូមិកូនដំរី សង្កាត់និមិត្ត ក្រុងប៉ោយប៉ែត ហើយអះអាងថាខ្លួនស៊ីឈ្នួលបើករថយន្តឲ្យក្រុមហ៊ុនដឹកដីដែលមានម្ចាស់ក្រុមហ៊ុនឈ្មោះ ចាង តេងភាវ ។ អ្នកបើកបររថយន្តដឹកដីនិយាយថា ម៉ូតូរងគ្រោះបើកបរមកពីទិសខាងលិចបុកពីក្រោយរថយន្តម៉ាកហាយឡែនឌ័រ ស្របទិសទើបដួលចូលរថយន្តរបស់ខ្លួនដែលជិះបញ្ច្រាសទិសដែលករណីលើកឡើងនេះ ខុសពីអ្វីដែសមត្ថកិច្ចបានអះអាង ។ ពេលនេះសមត្ថកិច្ចកំពុងធ្វើការទាក់ទងសាច់ញាតិ ដើម្បីទទួលសពយកទៅលំនៅឋានធ្វើបុណ្យតាមប្រពៃណី ។
គួរបញ្ជាក់ថា រយៈពេលជិត២ឆ្នាំចុងក្រោយនេះ ពលរដ្ឋនៅក្រុងប៉ោយប៉ែតក៏ដូចជាភ្ញៀវជាតិនិងអន្តរជាតិ តែងតែរអ៊ូរទាំពីក្រុមរថយន្តដឹកដីចេញពីចំណុចអាងអូរខៃដន សង្កាត់និមិត្ត បើកបរលឿន ហើយបើចំរដូវវស្សាចំណុចផ្លូវឡើងផ្លូវជាតិតែងបង្កការអិលដល់យានយន្តផ្សេងៗរហូតមានអ្នករងគ្រោះស្លាប់បាត់បង់ជីវិតដោយសារឡានដឹកដីនេះទៀតផងដែលករណីនេះអាជ្ញាធរនិងជំនាញពាក់ព័ន្ធគួរពិនិត្យមើលផងកុំធ្វើមិនដឹង ៕
ចែករំលែកព័តមាននេះ