សម ថារ័ត្ន រំពឹងជោគជ័យលើទឹកដីអាមេរិកក្នុងដំណើរចាកចេញលើកនេះ
- ភ្នំពេញ
រាជធានីភ្នំពេញ ៖ តាំងពីថ្ងៃទី១៤ ឧសភា ដែលកីឡាការិនីល្បុក្កតោ សម ថារ័ត្ន បានចាកចេញពីប្រទេសកម្ពុជា ទៅកាន់សហរដ្ឋអាមេរិក។ ក្នុងដំណើរចាកចេញលើកនេះ…
រាជធានីភ្នំពេញ ៖ តាំងពីថ្ងៃទី១៤ ឧសភា ដែលកីឡាការិនីល្បុក្កតោ សម ថារ័ត្ន បានចាកចេញពីប្រទេសកម្ពុជា ទៅកាន់សហរដ្ឋអាមេរិក។ ក្នុងដំណើរចាកចេញលើកនេះ នាងរំពឹងយ៉ាងខ្លាំងថានឹងទទួលជោគជ័យ ខណៈដែលអាមេរិក ក៏មិនមែនជាលើកទី១ ដែលនាងបានទៅ ។
កញ្ញា Cheata Liza ដែលជាមិត្តស្និទ្ធស្នាល និងជាអ្នកលើកស្ទួយវិស័យល្បុក្កតោរួមអាជីពរបស់ សម ថារ័ត្ន បានថ្លែងបញ្ជាក់ថា ដំណើរទៅអាមេរិករបស់ សម ថារ័ត្ន លើកនេះ គឺជាលើកទី៣ហើយ ដោយលើកទី១ និងលើកទី២ ក៏ទៅក្នុងបំណងផ្សព្វផ្សាយល្បុក្កតោផងដែរ។ បេសកកម្មរបស់ សម ថារ័ត្ន លើកនេះ កញ្ញា បញ្ជាក់ថា គឺមានបំណងសំខាន់៣ ដោយទី១ ទៅបង្ហាញក្បាច់គុនល្បុក្កតោឱ្យអ្នកអាមេរិកបានឃើញ ទី២ទៅបង្ហាត់ក្បាច់គុនល្បុក្កតោដល់កូនខ្មែរ និងអាមេរិក ដែលចង់ចេះដឹង និងទី៣ដើម្បីចាក់បញ្ចាំងវីដេអូឯកសារស្ដីពីក្បាច់គុនល្បុក្កតោ ដើម្បីផ្សព្វផ្សាយឱ្យកាន់តែស្គាល់ក្នុងក្រសែភ្នែកអន្តរជាតិ ។
សម ថារ័ត្ន ចេញទៅអាមេរិកលើកនេះ គឺទៅតែមួយខែប៉ុណ្ណោះ ដោយសារតែត្រូវត្រលប់មកបំពេញការងារនៅកម្ពុជា មិនអាចខកខានបានផងដែរ ។ យ៉ាងណាមិញអ្នកនាំពាក្យរូបនេះ ប្រាប់ថា សម ថារ័ត្ន រំពឹងពីការទទួលបានជោគជ័យយ៉ាងសម្បើម ដោយសារតែទៅលើកនេះ ចំណុចទាំង៣ ដែលនាងត្រូវផ្សាយពីល្បុក្កតោសុទ្ធតែសំខាន់ ហើយមានការចាប់អារម្មណ៍ពីស្រទាប់មហាជន ។ បើតាមការគូសបញ្ជាក់ នាងនឹងប្រើពេលធ្វើការបណ្ដុះបណ្ដាលក្មេងៗ និងជនជាតិខ្មែរលើទឹកដីអាមេរិកឱ្យបានហ្វឹកហាត់ក្បាច់គុនរបស់ខ្មែរបានច្រើន ដោយសារតែនោះគឺជាបំណងប្រាថ្នារបស់ សម ថារ័ត្ន មុនទៅអាមេរិក។
Cheata Liza បន្តថា ថារ័ត្ន ចេញទៅអាមេរិកលើកនេះ ទទួលបានការជ្រោមជ្រែងជាថវិកាតិចបំផុត ដោយថ្ងៃនាងចេញដំណើរ គឺមានតែលុយបន្តិចបន្តួចប៉ុណ្ណោះជាប់ខ្លួន ដោយមុនឡើងយន្តហោះ នាងក៏មានអាការៈមិនស្រួលខ្លួនធ្វើឱ្យប៉ះពាល់សុខភាពផងដែរ ។ នាងនិយាយជំនួសសាមីខ្លួនថា ៖«ថារ័ត្ន ទៅអាមេរិកលើកនេះ អត់មានលុយអីច្រើនទេ មិនដឹងមិចម៉ាទេបងអើយ»។ យ៉ាងណាមិញនាងថា ថារ័ត្ននឹងទទួលបានការជ្រោមជ្រែងពីម្ចាស់ស្ពុនស័រពេញទំហឹងទាំងការស្នាក់នៅ ការចុះបង្ហាត់សិស្ស សកម្មភាពចុះបញ្ចាំងវីដេអូឯកសារល្បុក្កតោ ដោយភាគីខាងអាមេរិក ជាអ្នករ៉ាប់រងទាំងស្រុង ទើបនាងយល់ថា បើទោះជាសម ថារ័ត្ន មិនសូវមានលុយជាប់ខ្លួន ក៏ប្រាកដជាមិនលំបាក ។
ាងថា រវាងខ្លួន និងសម ថារ័ត្ន មិនខុសពីមនុស្សចិត្តមួយថ្លើមមួយនោះទេ ទើបឱ្យតែសម ថារ័ត្ន ទៅបំពេញបេសកកម្មនៅណា គឺនាងរមែងចុះពីសៀមរាបមកជូនដំណើរ និងជួយខ្នះខ្នែងនូវរាល់សកម្មភាពផ្សេងទៀត ដើម្បីសម្រួលការលំបាកឱ្យថារ័ត្ន ។ ក្នុងនោះនាងក៏មិនខុសពីអ្នកជំនិតរបស់សម ថារ័ត្ន ដោយប្រើហ្វេសប៊ុកផ្ទាល់ខ្លួនបង្ហោះពីសកម្មភាពរបស់ សម ថារ័ត្ន និងសុខទុក្ខរបស់ សម ថារ័ត្ន ឱ្យអ្នកគាំទ្របានដឹងគ្រប់ពេល ពិសេសក្នុងពេលថារ័ត្ន ស្ថិតនៅក្នុងការធ្វើដំណើរ ហើយមិនអាចប្រើប្រាស់ប្រព័ន្ធហ្វ្រេសប៊ុក ដើម្បីជូនជាដំណឹងពីខ្លួនបាន។
នាងថា សម ថារ័ត្ន នឹងទទួលបានជោគជ័យក្នុងបេសកកម្មផ្សព្វផ្សាយល្បុក្កតោលើកនេះ បើទោះជាដំណើរលើកនេះ មានត្រឹមតែ១ខែ ដែលតម្រូវឱ្យខាងស្ពុនស័រ លៃពេលឱ្យនាងសម្ដែងល្បុក្កតោផង បង្ហាត់សិស្សផង និងចាក់បញ្ចាំងវីដេអូឯកសារស្ដីពីក្បាច់គុនល្បុក្កតោ អមដោយបទបង្ហាញទៅកាន់ជនជាតិខ្មែរ និងបរទេស ដែលនឹងត្រៀមប្រកាសថា នឹងចូលរួមទស្សនាបទបង្ហាញរបស់នាងច្រើននោះ ។
នាងថា ថារ័ត្ននឹងធ្វើសកម្មភាពនៅទីក្រុងឡូវ៉ែល និងបូស្ដុន ហើយការផ្សព្វផ្សាយក្បាច់គុនល្បុក្កតោរបស់នាងដែលនឹងកើតឡើងនោះគឺនឹងធ្វើនៅតាមសាលារៀន តាមសហគមន៍ ពិធីបុណ្យផ្សេងៗ និងបញ្ចាំងខ្សែភាពយន្តឯកសារស្ដីពីក្បាច់គុនល្បុក្កតោ នៅមជ្ឈមណ្ឌល Emerson ថ្ងៃទី១៧ ខែឧសភា វេលាម៉ោង៧និង៣០នាទីល្ងាច។ យ៉ាង ណាមិញនៅមិនទាន់ដឹងថា តើសម ថារ័ត្ន នឹងដាក់បញ្ចាំងវីដេអូឯកសារប៉ុន្មានដង បង្ហាត់សិស្សប៉ុន្មាននាក់នៅថ្ងៃណាខ្លះ និងសម្ដែងក្បាច់គុនខ្លួនឯងប៉ុន្មានដងឱ្យប្រាកដនៅឡើយទេ ក្នុងរយៈពេលស្នាក់នៅអាមេរិកមួយខែនេះ ៕
ចែករំលែកព័តមាននេះ