រាជធានីភ្នំពេញ៖ ផលិតករលោក មុត ថារី បានបង្ហាញពីគោលបំណងគាស់រំលើងឡើងវិញនូវខ្សែភាពរឿង«ស្លៀកខ្យល់ដណ្តប់មេឃ»កាលពីអំឡុងទសវត្ស៧០មកផលិតជាខ្សែវីដេភាគដាក់បញ្ចាំតាមទូរទស្សន៍ ។ រឿង«ស្លៀកខ្យល់ដណ្តប់មេឃ»គឺជាវណ្ណកម្មរបស់កវីគង្គ ប៊ុនឈឿន ដែលបាននិពន្ធនិងដឹកនាំរឿង ក្រោមការចូលរួមសម្តែងដោយលោកគង់…
រាជធានីភ្នំពេញ៖ ផលិតករលោក មុត ថារី បានបង្ហាញពីគោលបំណងគាស់រំលើងឡើងវិញនូវខ្សែភាពរឿង«ស្លៀកខ្យល់ដណ្តប់មេឃ»កាលពីអំឡុងទសវត្ស៧០មកផលិតជាខ្សែវីដេភាគដាក់បញ្ចាំតាមទូរទស្សន៍ ។
រឿង«ស្លៀកខ្យល់ដណ្តប់មេឃ»គឺជាវណ្ណកម្មរបស់កវីគង្គ ប៊ុនឈឿន ដែលបាននិពន្ធនិងដឹកនាំរឿង ក្រោមការចូលរួមសម្តែងដោយលោកគង់ សំអឿន និងអ្នកនាងវិជ្ជរ៉ា ដានី ។ លោកមុត ថារី ឲ្យដឹងកាលពីពេល ថ្មីៗកន្លងមកថា ដោយសាររឿង«ស្លៀកខ្យល់ដណ្តប់មេឃ»ល្បីនាជំនាន់នោះ ទើបលោកសុំសិទ្ធពីលោកគង្គ ប៊ុនឈឿន កាលនៅរស់សុំថតជាខ្សែរឿងភាគឡើងវិញ ។
បើតាមលោកមុត ថារី ក្រោយពីបានស្រាវជ្រាវគឺមានតែមនុស្ស៣នាក់ប៉ុណ្ណោះដែលនៅរស់ ហើយបានទស្សនារឿងនេះដោយផ្ទាល់។ មនុស្សទាំង៣នាក់នោះរួមមានម្តាយក្មេករបស់លោកដែលជាភរិយាលោកគង្គ ប៊ុនឈឿន លោកសោម ដូរិន និងអ្នកស្រី សូ សាវឿន ខណៈពេលហ្វី៊លនៃរឿងនេះត្រូវបានបំផ្លាញចោលកាលពីសម័យប៉ុល ពត ។
លោកមុត ថារី ថ្លែងថា «ខ្ញុំមានបំណងចង់យកខ្សែភាពយន្តនេះថតឡើងវិញ ដោយជាការរំលឹកដល់ស្នាដៃលោកគង្គ ប៊ុនឈឿន និងចូលរួមលើកស្ទួយសិល្បៈភាពយន្តខ្មែរនាសម័យនេះ ។ តែរហូតមកដល់ពេលនេះខ្ញុំនៅមិនទាន់អាចសុំទូរទស្សន៍ណាមួយសម្រាប់ឧបត្ថម្ភគាំទ្រដើម្បីផលិតរឿងនេះឡើងវិញបាននៅឡើយទេ ។ ការផលិតភាពយន្តខ្មែរបច្ចុប្បន្នគឺផលិតករភាគច្រើនពឹងផ្អែកលើការជួយពីម្ចាស់ស្ថានីយ ព្រោះបើមិនមានការគាំទ្រនោះយើងមិនអាចផលិតបានឡើយ »។
លោកមុត ថារី ថា មានស្ថានីយទូរទស្សន៍២ទៅ៣ហើយដែលលោកបានទាក់ទង ប៉ុន្តែមិនទាន់មានចម្លើយជាវិជ្ជមានណាមួយឡើយ ខណៈពេលស្ថានីយខ្លះមានភាពយន្តគ្រប់គ្រាន់សម្រាប់ចាក់ផ្សាយរួចហើយ ។ យ៉ាងណាក្តីក្នុងនាមជាផលិតករមួយរូបលោកមុត ថារី ពិតជាមានការសោកស្តាយចំពោះស្ថានីយទូរទស្សន៍មួយចំនួនដែលបានផ្តល់តម្លៃភាពយន្តបរទេសជាងភាពយន្តខ្មែរ ។
លោកថា «បើទោះបីជាភាពយន្តខ្មែរផលិតឡើងនៅមានកម្រិតក៏ដោយ ប៉ុន្តែផលិតករទាំងអស់តែងតែខិតខំទាំងត្រដាបត្រដួស ដើម្បីផលិតឲ្យមានភាពយន្តជាតិរបស់យើង ។ ផលិតករភាគច្រើនគឺផលិតរឿងភាគឡើងមិនបានចំណេញអ្វីច្រើនទេ ប៉ុន្តែធ្វើដោយទឹកចិត្ត និងបេះដូងដើម្បីលើកស្ទួយវិស័យភាពយន្តខ្មែរ ។ ខ្ញុំស្នើសុំដល់ទស្សនិកជនខ្មែរកុំប្រៀបធៀបរឿងខ្មែរទៅនឹងរឿងបរទេស ជាពិសេសរឿងថៃ ព្រោះទុនផលិតរបស់យើងនៅមានគម្លាតឆ្ងាយណាស់ពីទុនផលិតរបស់គេ»៕
ចែករំលែកព័តមាននេះ