សង្គ្រាម​ពាណិជ្ជកម្ម​កាន់តែ​បែក​អូរ​ហូរ​ស្ទឹង​ ពេល​នេះ​អា​មេ​រិ​ក​ព្រមាន​ចិន​រឿង​១​បន្ថែម​ទៀត


រដ្ឋធានី​វ៉ា​ស៊ី​ន​តោន​៖ ភ្នាក់ងារ​សារព័ត៌មាន Reuters បាន​រាយការណ៍​មក​កាន់​ពី​ថ្ងៃ​ទី​១២ ខែឧសភា កន្លង​មក​ថា លោក​ប្រធានាធិបតី ដូ​ណា​ល់ ត្រាំ (Donald Trump) បាន​ព្រមាន​ដល់​ប្រទេស​ចិន​កាលពី​ថ្ងៃ​សៅរ៍ ថា​ប្រទេស​ចិន​គួរតែ​សម្រេច​កិច្ចព្រមព្រៀង​ពាណិជ្ជកម្ម​ជាមួយ​សហរដ្ឋអាមេរិក​បច្ចុប្បន្ន​នេះ​បើ​មិន​ដូច្នេះ​ទេ​កិច្ចព្រមព្រៀង​នឹង​កាន់តែ​មិនល្អ​សម្រាប់​ពួក​គេ​បន្ថែម​ទៀត​ក្នុង​កំឡុង​ពេល​អាណត្តិ​ទី​ពីរ​នៃ​រដ្ឋាភិបាល​លោក​។

សហរដ្ឋអាមេរិក​និង​ប្រទេស​ចិន​បាន​ជាប់​ក្នុង​ជម្លោះ​ពាណិជ្ជកម្ម​ដែល​មើលឃើញ​មានការ​ដាក់​ពន្ធ​លើ​គ្នា​ទៅ​វិញ​ទៅ​មក​និង​បង្ក​ឲ្យ​មានការ​ព្រួយបារម្ភ​ថា​វា​អាច​ប៉ះពាល់​ដល់​សេដ្ឋកិច្ច​ពិភព​លោក​ថែម​ទៀត ។ អ្នក​ចរចា​ថ្នាក់ខ្ពស់​របស់​ប្រទេស​ចិន​បាន​និយាយ​ថា ភាគី​ទាំង​ពីរ​នឹង​ជួប​គ្នា​សា​ជា​ថ្មី​ក្នុង​ប្រទេស​ចិន ប៉ុន្តែ​ព្រមាន​ថា​ប្រទេស​ចិន​នឹង​មិន​ធ្វើការ​លះបង់​លើ​បញ្ហា​ទាក់ទិន​នឹង​គោលការណ៍​សំខាន់​ៗ​ទេ ។

លោក​ប្រធានាធិបតី​ត្រាំ​បាន​និយាយ​លើ Twitter របស់​លោក​កាលពី​ថ្ងៃ​សៅរ៍​ថា «​ខ្ញុំ​គិត​ថា​ប្រទេស​ចិន​គិត​ថា​ពួក​គេ​ទទួល​រង​ការ​វាយប្រហារ​យ៉ាង​ខ្លាំង​ក្នុង​ការ​ចរចា​ក្នុង​ពេល​ថ្មី​ៗ​នេះ​ហើយ​ពួក​គេ​អាច​នឹង​ចង់​រង​ចាំ​រហូត​ដល់​ការ​បោះ​ឆ្នោត​ក្រោយ​នៅ​ឆ្នាំ ២០២០ ដើម្បី​ផ្សងសំណាង​និង​មើលឃើញ​គណបក្ស​ប្រជាធិបតេយ្យ​ឈ្នះ​ដែល​អាច​អនុញ្ញាត​ឲ្យ​ពួក​គេ​បន្ត​កេង​ប្រ​វ័​ញ្ជ​ពី​សហរដ្ឋអាមេរិក​ប្រមាណ ៥០០​ប៊ី​លាន​ដុល្លារ​ក្នុង​មួយ​ឆ្នាំ​»។​

លោក​បាន​បន្ត​ទៀត​ថា «​បញ្ហា​តែ​មួយ​គត់​គឺ​ពួក​គេ​ដឹង​ថា​ខ្ញុំ​នឹង​ឈ្នះ​ការ​បោះ​ឆ្នោត (​ព្រោះតែ​សេដ្ឋកិច្ច​និង​ការងារ​អា​មេ​រិ​កបាន​កើន​ដល់​កម្រិត​ខ្ពស់​ជាងគេ​ក្នុង​ប្រវត្តិសាស្ត្រ​) ហើយ​កិច្ចព្រមព្រៀង​នឹង​កាន់តែ​ធ្វើ​ឲ្យ​ពួក​គេ​ខាតបង់​បន្ថែម​ទៀត​ប្រសិនបើ​ត្រូវ​បាន​ចរចា​ក្នុង​អណ​ត្តិ​ទី​ពីរ​របស់ខ្ញុំ​»​។

គួរ​បញ្ជាក់​ដែរ​ថា​លោក​ត្រាំ​បាន​ចោទប្រកាន់​ថា​ប្រទេស​ចិន​លេប​ពាក្យ​សម្តី​របស់​ពួក​គេ​ក្នុង​ការ​ចរចា​ពាណិជ្ជកម្ម និង​បាន​បញ្ជា​ឲ្យ​មានការ​បង្កើន​ពន្ធ​ដែល​ចាប់​មាន​ប្រសិទ្ធិ​ភាព​នៅ​ថ្ងៃ​សុក្រ​ស​ប្តា​ហ៍​មុន​លើ​ផលិតផល​ចិន​ប្រមាណ​២០០​ប៊ី​លាន​ដុល្លារ ។

លោក​ប្រធានាធិបតី​ខាងលើ​បាន​បន្ថែម​ថា ក្រុមហ៊ុន​អាច​ជៀសវាង​កំ​ណើ​ការ​ចំណាយ​ដោយ​ផលិត​ផលិតផល​របស់​ពួក​គេ​ក្នុង​សហរដ្ឋអាមេរិក ។ យ៉ាងណា​ក្តី សមាជិក​គណបក្ស​សាធារណៈរដ្ឋ​ដែល​គាំទ្រ​ការ​ធ្វើ​ពាណិជ្ជកម្ម​សេរី​បាន​ព្រមាន​ថា​ពន្ធ​ទាំងនេះ​អាច​នឹង​បង្ក​ផល​ប៉ះពាល់​ដល់​សេដ្ឋកិច្ច ហើយ​កសិករ​ជា​ច្រើន​ដែល​រួម​មាន​អ្នកគាំទ្រ​របស់​លោក​ត្រាំ​បាន​បន្ថែម​ថា​ពន្ធ​ទាំងនេះ​បាន​ប៉ះពាល់​ដល់​ពួក​គេ​ហើយ ៕

Facebook Google Twitter Email

ព័ត៌មាន​អន្តរជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ