សង្គ្រាមអ៊ុយក្រែន ៖ បន្ទាប់ពីយូរមកហើយជឿថា លោកដូណាល់ត្រាំ អាចជួយឲ្យសម្រេចបានបទឈប់បាញ់គ្នា ជាជាងផលប្រយោជន៍របស់ខ្លួន ពេលនេះ រុស្ស៊ីមានការសង្ស័យហើយ ។
ក្រុងមូស្គូយល់ថា សហរដ្ឋអាមេរិកកំពុងបង្ហាញឲ្យឃើញការឃ្លាតចាកពីតួនាទីអាជ្ញាកណ្ដាល ដែលមិនលម្អៀងក្នុងការចរចា សំដៅបញ្ចប់សង្គ្រាមជាង៤ឆ្នាំមកហើយនៅអ៊ុយក្រែន ។ នេះជាការគូសបញ្ជាក់ កាលពីថ្ងៃទី២៣ មិថុនា របស់រដ្ឋមន្ត្រីការបរទេសរុស្ស៊ី លោកស័រហ្គេយឡាវរ៉ូវ ។
នៅមុខបណ្ដាអ្នកការទូតបរទេសនាទីក្រុងមូស្គូ លោកឡាវរ៉ូវថ្លែងថា បើធ្វើការវិនិច្ឆ័យលើបណ្ដាសកម្មភាពរបស់ខ្លួន អាមេរិកហាក់ដូចជាបោះបង់តួនាទីជាអាជ្ញាកណ្ដាលមិនលម្អៀង ហើយផ្ទុយទៅវិញប្រកាន់យកការបង្កើនការគាបសង្កត់តាមរយៈបណ្ដាទណ្ឌកម្មលើរុស្ស៊ី ។ ប្រធានាធិបតីអាមេរិក លោកដូណាល់ត្រាំ កាលពីសប្ដាហ៍មុនក្នុងកិច្ចប្រជុំកំពូលG7 នៅបារាំងលើកឡើងថា រុស្ស៊ីត្រូវចុះហត្ថលេខាលើកិច្ចព្រមព្រៀងមួយនិងថា ក្រុងវ៉ាស៊ីនតោនអាចដាក់ឡើងវិញ បណ្ដាទណ្ឌកម្មដែលបានលើកលែង។
ចំណែកប្រធានាធិបតីរុស្ស៊ី លោកវ្ល៉ាឌីមៀរពូទីនវិញ កាលពីថ្ងៃទី២៣ មិថុនា ក្នុងពិធីមួយនៅវិមានក្រឹមឡាំង បានចោទប្រកាន់បណ្ដាប្រទេសសមាជិកអូតង់ថា កំពុងរៀបចំសង្គ្រាមមួយប្រឆាំងរុស្ស៊ី ។ លោកថា ពួកគេបានបង្កើនថវិកាយោធា និងថវិកាដើម្បីធ្វើការវាយប្រហារ ។
ទន្ទឹមនឹងនេះដែរ ដើម្បីលើកហេតុផលពីការចំណាយខាងយោធា និងការធ្វើយោធូបនីយកម្មទាំងស្រុងរបស់រដ្ឋពួកគេ មេដឹកនាំបណ្ដាប្រទេសអូតង់ និងរបស់សហភាពអឺរ៉ុប បានបន្តធ្វើសកម្មភាពភូតកុហកដូចមុនដដែល ពីការគំរាមកំហែងរបស់រុស្ស៊ី ៕
ចែករំលែកព័តមាននេះ