ទីក្រុងឡុង៖ នៅទូទាំងតំបន់អឺរ៉ុបខាងលិចឥឡូវនេះកំពុងតែឡើងកម្ដៅខ្លាំងគិតចាប់ពីទីក្រុងឡុង ប្រទេសអង់គ្លេស រហូតដល់ទីក្រុងមីឡាន ប្រទេសអ៊ីតាលី។ ក្ដៅលើកនេះគឺក្ដៅមិនធម្មតាទេ ក្ដៅខ្លោចសាច់តែម្ដងដែលធ្វើឱ្យក្រុមអ្នកឧតុនិយមព្រមានថាបើបណ្ដោយបែបនេះតទៅទៀតមិនកើតទេ អាចជាហានិភ័យសម្រាប់ជីវិតរស់នៅ។ មួយថ្ងៃបន្ទាប់ពីប្រទេសបារាំងទទួលរងកម្ដៅខ្លាំងមិនធ្លាប់មានជាប្រវត្តិសាស្ត្រ អង់គ្លេសកត់ត្រាកម្ដៅថ្ងៃនេះខ្ពស់មិនធ្លាប់បើប្រៀបធៀបនឹងខែមិថុនាកាលពីពេលកន្លងមកនៅក្នុងប្រទេសរបស់ខ្លួន។
ក្រុមអ្នកឧតុនិយមអង់គ្លេសព្រមានថាហានិភ័យឈានដល់កម្រិតក្រហមសម្រាប់សុខភាពនៅប្រទេសអង់គ្លេសភាគកណ្ដាល និងភាគខាងត្បូង និងប្រទេសវេល។ សីតុណ្ហភាពអតិបរមានៅអង់គ្លេសអាចកើនឡើងដល់៤០អង្សា។ នេះជាការព្រមានអំពីអាកាសធាតុកម្រិតធ្ងន់ធ្ងរលើកទី២បន្ទាប់ពីបញ្ហានេះធ្លាប់កើតមានម្ដងហើយកាលពីខែកក្កដា ឆ្នាំ២០២២។ កាលនោះ សីតុណ្ហភាពអតិបរមាកើនលើសពី៤០អង្សា។ ថ្វីដ្បិតសីតុណ្ហភាពថ្ងៃនេះមិនដល់ថ្នាក់៤០អង្សា ប៉ុន្តែប៉ាន់មិនបាន ស្មានមិនត្រូវ កម្ដៅអាចនឹងហក់ឡើងដល់កម្រិតនេះ។
មន្ត្រីឧតុនិយមអង់គ្លេសថ្លែងថាពួកគេនឹងចេញសេចក្ដីប្រកាសអាសន្នកម្រិតក្រហមនៅក្នុងករណីដែលកម្ដៅហក់ឡើងខ្ពស់ និងបង្កផលប៉ះពាល់ខ្លាំង។ សូម្បីតែអ្នកដែលស៊ំានឹងអាកាសធាតុក្ដៅស្រាប់ទៅហើយក៏ពិបាកទប់ទល់នឹងកម្ដៅដល់កម្រិតនេះដែរ។ អាជ្ញាធរនៅទូទាំងតំបន់អឺរ៉ុបខាងកើតកំពុងរិះរកវិធីដោះស្រាយបញ្ហានេះ។ មិនថាបារាំង អ៊ីតាលី ឬអេស្ប៉ាញនោះទេសុទ្ធតែចេញសេចក្ដីព្រមានធ្ងន់ៗថាអាកាសធាតុក្ដៅលើកនេះនឹងប៉ះពាល់ជីវិតរស់នៅរបស់ប្រជាជនរាប់សិបលាននាក់។
ប្រទេសនៅអឺរ៉ុបទទួលរងកម្ដៅបំបែកកំណត់ត្រាប្រវត្តិសាស្ត្ររបស់ខ្លួន។ មានន័យថាក្ដៅកាន់តែខ្លាំងឡើងៗពីមួយឆ្នាំទៅមួយឆ្នាំ។ អាជ្ញាធរក៏បន្តស្ទុះស្ទាដើម្បីដោះស្រាយ និងបន្សាំខ្លួនទទួលយកការឡើងកម្ដៅថ្មីនេះផងដែរ។ ប៉ុន្តែអគារ កន្លែងធ្វើការ និងប្រព័ន្ធដឹកជញ្ជូនមិនទាន់សម្របខ្លួននឹងស្ថានភាពថ្មីនេះទេ។ ទន្ទឹមនឹងនោះ ការប្រែប្រួលអាកាសធាតុ (ដោយសារស្នាដៃរបស់មនុស្ស) ធ្វើឱ្យសីតុណ្ហភាពឡើងកម្ដៅកាន់តែខ្លាំងឡើងៗ។ ទីភ្នាក់ងាររបស់អង្គការសហប្រជាជាតិប្រមើលឃើញថានារយៈពេល៥ឆ្នាំខាងមុខ កម្ដៅនឹងហក់ឡើងខ្លាំងជាងនេះទៅទៀត៕ ប្រភព៖ AP
ចែករំលែកព័តមាននេះ