រាជធានីភ្នំពេញ ៖ កិច្ចប្រជុំនៅសាលារាជធានីភ្នំពេញ ស្តីពីការពិភាក្សាលើការជំរុញការផ្តល់សេវាសាធារណៈ ជាពិសេស សេវាសុរិយោដី ជូនប្រជាពលរដ្ឋ ក្នុងមូលដ្ឋានរាជធានីភ្នំពេញ កាលពីរសៀលថ្ងៃទី២៤ ខែមិថុនា ឆ្នាំ២០២៦នេះ លោក ឃួង ស្រេង បាន ផ្តល់ជាយោបល់ថា គួរមានយន្តការទំនាក់ទំនងផ្ទៃក្នុង រវាងមន្ត្រីផ្តល់សេវាទាំងភាគី អគ្គនាយកដ្ឋានពន្ធដារ អង្គភាព ច្រកចេញចូលតែមួយ និងមន្ទីររៀបចំដែនដី នគរូបនីយកម្មសំណង់ និងសុរិយោដី ដើម្បីជំរុញនីតិវិធី ផ្តល់សេវាជូន ប្រជាពលរដ្ឋកាន់តែល្អប្រសើរ ។
លោក ឃួង ស្រេង បានលើកឡើងថា មន្ត្រីពាក់ព័ន្ធគ្រប់ផ្នែកទាំងអស់ ត្រូវយកចិត្តទុកដាក់ពង្រឹងការផ្ដល់សេវាសាធារណៈ ជូន ប្រជាពលរដ្ឋ ជាពិសេស សេវាសុរិយោដីឲ្យមានប្រសិទ្ធភាពខ្ពស់ និងល្អប្រសើរជាងមុនថែមទៀត ។
លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា បន្ទាប់ពីស្តាប់របាយការណ៍ របស់លោកប្រធានមន្ទីររៀបចំដែនដី នគរូបនីយកម្មសំណង់ និង សុរិយោដី ស្តីពីវឌ្ឍនភាព នៃការផ្តល់សេវាសុរិយោដី រួចមក ឯកឧត្តម គង់ វិបុល បានបញ្ជាក់ថា កិច្ចប្រជុំថ្ងៃនេះ គឺជារឿងល្អបំផុត ធ្វើយ៉ាងណាឲ្យមន្ត្រីជំនាញពាក់ព័ន្ធ អាចបន្ស៊ីការងារ របស់ខ្លួន និងពិភាក្សារិះរកមធ្យោបាយ ដើម្បីជំរុញការផ្តល់សេវាជូនប្រជាពលរដ្ឋ បានកាន់តែល្អប្រសើរ ។ ជាមួយគ្នានេះដែរ ឯកឧត្តម បានឱ្យអគ្គនាយករង ធ្វើបទបង្ហាញខ្លី ស្តីពីយន្តការ នៃការផ្តល់សេវាបង់ពន្ធប្រថាប់ត្រា និងការបង់ពន្ធនានា ដែល អគ្គនាយកដ្ឋាន បាននិងកំពុងអនុវត្ត ដោយប្រើប្រាស់ប្រព័ន្ធបច្ចេកវិទ្យា ហើយផ្តល់លទ្ធភាពជូនមន្ត្រី និងប្រជាពលរដ្ឋអាច មើលឃើញពីលំហូរចរន្តការលិខិតស្នាម បានដោយងាយស្រួល ។
អ្នកនាំពាក្យ បានបញ្ជាក់ថា លោក ឃួង ស្រេង បានផ្តល់យោបល់ថា គួរមានយន្តការទំនាក់ទំនងផ្ទៃក្នុងរវាងមន្ត្រីផ្តល់សេវាទាំង ភាគី អគ្គនាយកដ្ឋានពន្ធដារ ទាំងអង្គភាពច្រកចេញចូលតែមួយ និងមន្ទីររៀបចំដែនដី នគរូបនីយកម្ម សំណង់ និង សុរិយោដី ដើម្បីជំរុញនីតិវិធី ផ្តល់សេវាជូនប្រជាពលរដ្ឋកាន់តែល្អប្រសើរ ហើយការលើកឡើងនេះ ត្រូវបានទទួលការឯកភាពពី ឯកឧត្ដម គង់ វិបុល ផងដែរ ។
លោក ឃួង ស្រេង ក៏បានណែនាំមន្ត្រីពាក់ព័ន្ធគ្រប់ផ្នែក ត្រូវពង្រឹងការផ្ដល់សេវាសាធារណៈក្នុងភូមិសាស្ត្ររាជធានីភ្នំពេញ ឱ្យកាន់តែល្អប្រសើរ ពិសេសការផ្ដល់សេវាសុរិយោដី និងជំរុញផ្សព្វផ្សាយបន្ថែមពីផ្តល់សេវារដ្ឋបាលតាមប្រព័ន្ធអនឡាញ (Online) នៅអង្គភាពច្រកចេញចូលតែមួយរាជធានីភ្នំពេញផងដែរ ៕
ចែករំលែកព័តមាននេះ