ប្រទេសកាតា ៖ យោងតាមអាជ្ញាធរថា ការផ្ទុះឆេះក្នុងទីតាំងឧស្ម័នដ៏ធំមួយនៅប្រទេសកាតា បណ្ដាលឲ្យមនុស្សស្លាប់យ៉ាងតិច១៣នាក់ និងរបួសដល់៦៦នាក់ ។ ទោះបីយ៉ាងណា អាជ្ញាធរអះអាងថា ការឆេះនេះមិនបណ្ដាលឲ្យមានផលវិបាកប៉ះពាលដល់ការនាំចេញឧស្ម័នរាវរបស់កាតាឡើយ ។
ការផ្ទុះឆេះនេះ ដែលជាគ្រោះថ្នាក់ឧស្សាហកម្មស្លាប់មនុស្សច្រើននាក់មួយក្នុងតំបន់ កើតមានកាលពីយប់ថ្ងៃទី២១ មិថុនា ក្នុងតំបន់ RAS LAFFAN ដែលមានទីតាំងផលិតកម្មឧស្ម័នធម្មជាតិរាវធំជាងគេនៃពិភពលោក ។ នារសៀលថ្ងៃទី២២ មិថុនា រដ្ឋមន្ត្រីថាមពលកាតា លោកសាអាដអាល់កាអាប៊ី ក្នុងសន្និសីទសារព័ត៌មានមួយគូសបញ្ជាក់ថា មនុស្ស១៣នាក់សុទ្ធតែជាជនជាតិឥណ្ឌា ឬប៉ាគីស្ថានបានស្លាប់ ហើយមនុស្ស៦៦នាក់ទៀតរងរបួស ។ លោកបន្តថា នោះជាគ្រោះថ្នាក់មួយ ហើយមិនមែនជាការវាយប្រហារភេរវកម្ម ឬសកម្មភាពប្រទូស្តរ៉ាយមួយឡើយ ទោះបីបណ្ដាទីតាំងថាមពលនៅតំបន់ឈូងសមុទ្រពែរ្ស៍ ធ្លាប់រងការវាយប្រហាររបស់អ៉ីរ៉ង ក្នុងសង្គ្រាមនៅមជ្ឈឹមបូព៌ា នាពេលមុននេះក្ដី ។
យោងតាមរដ្ឋមន្ត្រីរូបនោះថា ទីតាំងឧស្ម័ននេះ បានបញ្ឈប់ដំណើរការចាប់តាំងពីខែធ្នូមក ដើម្បីជួសជុលហើយ ទើបតែដំណើរការឡើងវិញ២ថ្ងៃមុន ពេលផ្ទុះប៉ុណ្ណោះ ។ ការផ្ទុះនេះ នឹងមិនមានផលវិបាកណាមួយលើការនាំចេញឧស្ម័ន ឬលើសេចក្ដីត្រូវការឧស្ម័នក្នុងស្រុកឡើយ ហើយម្យ៉ាងទៀតក៏មិនបណ្ដាលឲ្យមានផលប៉ះពាល់ដល់បរិស្ថានដែរ។
ភ្លាមៗ អាជ្ញាធរបាននិយាយពីឧប្បត្តិហេតុខាងបច្ចេកទេស ហើយក្រុមហ៊ុនឧស្ម័នរដ្ឋ QATARENERGY បញ្ជាក់ថា ឧប្បត្តិហេតុនេះកើតមានពេលចាប់ដំណើរឡើងវិញនៃប្រតិបត្តិការក្នុងទីតាំងផ្គត់ផ្គ្ង់ឧស្ម័នក្នុងស្រុកBARZAN ។ បណ្ដារូបភាពផ្សាយតាមបណ្ដាញសង្គម គេឃើញនាពេលយប់អណ្ដាតភ្លើងជះឡើងលើធ្វើឲ្យផ្ទៃមេឃឡើងក្រហមច្រាលជាមួយផ្សែងហុយដ៏ក្រាស់។
ទីតាំងឧស្ម័ន RAS LAFFAN ធ្លាប់រងការខូចខាតធ្ងន់ធ្ងរ ដោយសារការវាយប្រហាររបស់អ៉ីរ៉ង់ប្រឆាំងបណ្ដាប្រទេសជិតខាងនៅឈូងសមុទ្រពែរ្ស៍ ជាការតបតចំពោះការវាយប្រហាររបស់អ៊ីស្រាអែលនិងអាមេរិក។
តាមក្រុមហ៊ុនQATARENERGYថា ទីតាំងឧស្ម័នBARZAN មានសមត្ថភាពផលិតឧស្ម័នស្តង់ដាអាចធ្វើពាណិជ្ចកម្មបានដល់១,៤ពាន់លានPIEDS គូបក្នុង១ថ្ងៃ។ ទីតាំងនោះ ក៏មានសមត្ថភាពផលិតអេតាន CONDENSATS ចម្រាញ់ឧស្ម័នប្រេងកាតជាឧស្ម័នរាវនិងស្ពាន់ធរ សម្រាប់ទីផ្សារក្នុងស្រុកនិងនាំចេញទៀតផង ៕
ចែករំលែកព័តមាននេះ