ប្រទេសឥណ្ឌា ៖ អាជ្ញាធររាយការណ៍ថា ភ្លើងបានឆាបឆេះអគារមួយដែលមានបណ្ណាល័យមួយ និងមជ្ឈមណ្ឌលជួយទ្រទ្រង់ការសិក្សាសម្រាប់និស្សិតមួយ បណ្ដាលឲ្យមនុស្សស្លាប់យ៉ាងតិច១៤នាក់ កាលពីថ្ងៃទី២២ មិថុនា នៅឥណ្ឌា ។
ភ្លើងបានឆាបឆេះអគារនោះ ស្ថិតនៅក្រុងLUCKNOW រដ្ឋធានីនៃរដ្ឋអ៊ុតតាប្រាដេសភាគខាងជើងឥណ្ឌា ។ អគារពាណិជ្ជកម្មមានកម្ពស់៣ជាន់នោះ ស្ថិតក្នុងសង្កាត់មានប្រជាជនរស់នៅកុះករមួយ។ ភ្លើងចាប់ឆេះពីជាន់ក្រោម ហើយរាលដាលយ៉ាងលឿនដល់ជាន់ខាងលើទៀត ។ អ្នកទទួលខុសត្រូវជាន់ខ្ពស់ម្នាក់នៃរដ្ឋអ៊ុតតាប្រាដេស ថ្លែងទៅកាន់សារព័ត៌មានថា មនុស្ស១៤នាក់បានស្លាប់ ក្នុងគ្រោះមហន្តរាយនោះ ហើយមនុស្ស៤នាក់ទៀតរងរបួស ។
ក្នុងពេលភ្លាមៗ គេនៅមិនទាន់ដឹងថា តើជនរងគ្រោះទាំងអស់សុទ្ធតែជានិស្សិត ឬយ៉ាងណាឡើយ។ និស្សិតច្រើននាក់បានលោតទម្លាក់ខ្លួនពីជាន់ខាងលើនៃអគារគេចចេញពីអណ្ដាតភ្លើង។ ទូរទស្សន៍ឥណ្ឌាបានផ្សាយបណ្ដារូបភាពនៃអណ្ដាតភ្លើងដែលជះចេញពីផ្លែកខាងមុខនៃអគារចំណែកពួកអ្នកពន្លត់ភ្លើងខិតខំតតាំងជាមួយភ្លើង ។ ក្នុងអគារនេះ មានមជ្ឈមណ្ឌលជួយទ្រទ្រង់ការសិក្សារបស់និស្សិត បណ្ណាល័យមួយ និងផ្នែកអាំងហ្វូហ្គ្រាហ្វីមួយ៕
ចែករំលែកព័តមាននេះ