ប្រទេសមីយ៉ាន់ម៉ា ៖ ពិតជារឿងអស្ចារ្យណាស់ដែលកាលពីថ្ងៃទី១២ ខែឧសភា ឆ្នាំ២០១៩ អ្នកបើកបរយន្តហោះដឹកអ្នកដំណើរជនជាតិមីយ៉ាន់ម៉ា អាចសម្រេចបានការចុះយន្តហោះរបស់គេដោយគ្មានកង់មុខ ហើយក៏មិនបណ្ដាលឲ្យមនុស្សណាម្នាក់រងរបួស ក្នុងចំណោមអ្នកជិះទាំង៨៩នាក់។ យន្តហោះធុនEMBRAER…
ប្រទេសមីយ៉ាន់ម៉ា ៖ ពិតជារឿងអស្ចារ្យណាស់ដែលកាលពីថ្ងៃទី១២ ខែឧសភា ឆ្នាំ២០១៩ អ្នកបើកបរយន្តហោះដឹកអ្នកដំណើរជនជាតិមីយ៉ាន់ម៉ា អាចសម្រេចបានការចុះយន្តហោះរបស់គេដោយគ្មានកង់មុខ ហើយក៏មិនបណ្ដាលឲ្យមនុស្សណាម្នាក់រងរបួស ក្នុងចំណោមអ្នកជិះទាំង៨៩នាក់។
យន្តហោះធុនEMBRAER ERJ-190 ជើងហោះហើរUB-103 របស់ក្រុមហ៊ុនអាកាសចរណ៍MYANMAR NATIONAL AIRLINES នោះ បានហោះហើរពីទីក្រុងរ៉ង់ហ្គូនមកកាន់ក្រុងម៉ានដាឡៃ។ ពេលមកដល់ព្រលានយន្តហោះក្រុងម៉ានដាឡៃ យន្តហោះបានទម្លាក់កង់ប្រុងចុះ តែកង់ខាងមុខមិនព្រមធ្លាក់។ កង់ខាងក្រោយនៅក្រោមស្លាបបានដាក់ចុះជាធម្មតា។ គេបានប៉ុនប៉ងទម្លាក់កង់មុខម្ដងជា២ដងតែនៅពុំបានផល។
ទីបំផុតអ្នកបើកបានបង្ខំចុះជាមួយកង់ខាងក្រោយ។ អ្នកបើកពិតជាមានទេពកោសល្យខ្ពស់ ដោយពេលចុះគ្មានកង់មុខ ពុំបណ្ដាលឲ្យមនុស្សណាម្នាក់រងរបួសឡើយ។ យន្តហោះនោះបានចុះក្នុងរង្វង់ម៉ោង៩ព្រឹកម៉ោងក្នុងស្រុក។ លោកYE HTUT AUNG អនុប្រធាននាយកដ្ឋានអាកាសចរណ៍ស៊ីវិលមីយ៉ាន់ម៉ាពន្យល់ថា អ្នកបើកទាំង២នាក់បានសាកល្បង២លើកកែកុន ម្ដងប្រើកុំព្យូទ័រហើយម្ដងទៀតប្រើដៃ ក្នុងការទម្លាក់កង់មុខតែនៅពុំបានសម្រេច។ទីបំផុតគេក៏បង្ខំចិត្តចុះដោយគ្មានកង់មុខ។
នេះជាឧប្បត្តិហេតុយន្តហោះលើកទី២នៅមីយ៉ាន់ម៉ា រយៈតែមួយសប្ដាហ៍ដោយកាលពីថ្ងៃទី៨ឧសភាយន្តហោះមួយគ្រឿង របស់ក្រុមហ៊ុនអាកាសចរណ៍ BIMAN BANGLADESH បានចុះហើយរត់ចេញពីផ្លូវនៅព្រលានយន្តហោះក្រុងរ៉ង់ហ្គូន បណ្ដាលឲ្យមនុស្ស១១នាក់រងរបួស៕
ចែករំលែកព័តមាននេះ