ទីក្រុងកៀវ៖ អាមេរិកនៅតែជំរុញឱ្យអ៊ុយក្រែនកាត់ទឹកដីមួយចំណែកធំទៅឱ្យរុស្ស៊ីដើម្បីជាថ្នូរនឹងការបិទបញ្ចប់សង្គ្រាមដែលបានអូសបន្លាយពេលជិតបួនឆ្នាំហើយ។ លោកហ្សេឡិនស្គីថាអាមេរិកប្រាប់ឱ្យតែអ៊ុយក្រែនដកទ័ពចេញពីតំបន់ដូញែត ប៉ុន្តែមិនបានប្រាប់ឱ្យរុស្ស៊ីដកទ័ពទេ។ ដូច្នេះមានន័យថាអាមេរិកចង់ឱ្យអ៊ុយក្រែនប្រគល់ដូញែតទាំងមូលទៅឱ្យរុស្ស៊ី ប្រគល់ទាំងដីដែលរុស្ស៊ីមិនទាន់វាយយកបានថែមទៀត។
យោងតាមផែនការសន្តិភាពនេះ ដូញែតនឹងត្រូវយកធ្វើជាតំបន់សេដ្ឋកិច្ចសេរីដែលគ្មានកងទ័ព និងជាតំបន់ទ្រនាប់រវាងរុស្ស៊ី និងអ៊ុយក្រែន។ យោងតាមផែនការសន្តិភាពរបស់អាមេរិកដែលបានកែសម្រួលលើកចុងក្រោយ តំបន់ទាំងបួនដែលរុស្ស៊ីបានដាក់បញ្ចូលជាទឹកដីរបស់ខ្លួនតាំងពីឆ្នាំ២០២២នោះ អាមេរិក និងអ៊ុយក្រែនត្រូវទទួលស្គាល់ជាទឹកដីរុស្ស៊ីដោយស្របច្បាប់។ ចំពោះទីតាំងដែលរុស្ស៊ីមិនបានកាត់ខ្វៀលជាទឹកដីរបស់ខ្លួន និងដែលកងទ័ពរុស្ស៊ីកំពុងឈរជើង រុស្ស៊ីត្រូវដកថយពីទីនោះ។
បើដូចអ្វីដែលលោកហ្សេឡិនស្គីនិយាយនេះមានន័យថាផែនការសន្តិភាពមុន និងក្រោយមិនខុសគ្នាទេ។ ពោលគឺហាក់ដូចជាលំអៀងទៅខាងរុស្ស៊ីយ៉ាងខ្លាំង។ អ៊ុយក្រែនបានយកផែនការនោះទៅកែសម្រួលឡើងវិញ និងបញ្ជូនផែនការរបស់ខ្លួនម្ភៃចំណុចទៅឱ្យទីក្រុងវ៉ាស៊ីនតោនពិនិត្យមើល។ សេចក្ដីលម្អិតនៃផែនការនោះមិនត្រូវគេផ្សព្វផ្សាយជាសាធារណៈទេ។
លោកហ្សេឡិនស្គីថាយើង (អាមេរិក និងអ៊ុយក្រែន) មានការខ្វែងគំនិតគ្នា២ចំណុចធំៗ នោះគឺបញ្ហាបូរណភាពទឹកដីនៅតំបន់ដូញែត និងអ្វីៗគ្រប់យ៉ាងដែលពាក់ព័ន្ធនឹងដូញែត ហើយនិងការគ្រប់គ្រងរោងចក្រនុយក្លេអ៊ែរនៅហ្សាប៉ូរីហ្សៀ។ បញ្ហាទាំង២នេះនៅតែបន្តជជែកគ្នានៅឡើយទេ។ លោកថ្លែងបន្តទៀតថាកងទ័ពអ៊ុយក្រែនត្រូវចាកចេញពីដូញែតជាថ្នូរនឹងកងទ័ពរុស្ស៊ីមិនអាចដាក់នៅតំបន់នេះទេ។ ពួកគេ (រុស្ស៊ី) ហៅទីនេះថា «តំបន់សេដ្ឋកិច្ចសេរី» (ដែលគ្មានកងទ័ព)។
ពាក់ព័ន្ធនឹងការកាត់ទឹកដីខ្លួនឯងជាថ្នូរនឹងសន្តិភាពនេះ លោកហ្សេឡិនស្គីធ្លាប់ប្រកាសរួចហើយថាលោកគ្មានសិទ្ធិធ្វើដូច្នេះទេព្រោះផ្ទុយពីច្បាប់រដ្ឋធម្មនុញ្ញ និងផ្ទុយពីក្រមសីលធម៌ក្នុងនាមជាមេដឹកនាំ។ លោកថាមានតែប្រជាជនអ៊ុយក្រែនទេជាអ្នកសម្រេចជោគវាសនាប្រទេសជាតិរបស់ខ្លួនដោយខ្លួនឯង។ លោកមានជំនឿថាប្រជាជនអ៊ុយក្រែននឹងផ្ដល់ចម្លើយចំពោះបញ្ហានេះតាមរយៈការបោះឆ្នោតជ្រើសរើសប្រធានាធិបតី ឬតាមរយៈការបោះឆ្នោតប្រជាមតិ។ បញ្ហានេះត្រូវតែសម្រេចចិត្តដោយប្រជាជនអ៊ុយក្រែន។ នេះបើតាមការផ្សាយរបស់ឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ