ដើម្បីសាមគ្គីភាព ឯកភាពផ្ទៃក្នុងល្អ អ្នកបួសគួរបដិបត្តិតាមគន្លងធម៌ទាំង១០ប្រការដែលជាគ្រឹះដ៏រឹងមាំក្នុងការបង្រួបបង្រួម មូលមិត្តគ្នា និងដើម្បីជ្រោងសាសនាឱ្យរឹតតែរុងរឿង ។
១-អ្នកបួសគួរមានឆន្ទៈប្រកបដោយស្មារតី និងបញ្ញាដ៏ឧត្តម និងជាអ្នករលឹកឃើញនូវអំពើ ដែលធ្វើយូរហើយផង នូវពាក្យដែលនិយាយយូរហើយផងក៏ពិចារណារកផ្លូវត្រូវ ។
២-ព្រះសង្ឃជាអ្នកមានបញ្ញា ប្រកបដោយប្រាជ្ញាជាគ្រឿងដឹងនូវការកើត និងការរលត់ទៅនៃ ខន្ធ ជាប្រាជ្ញាសម្រាប់ទម្លុះទម្លាយនូវកិលេស ប្រព្រឹត្តទៅក្នុងធម៌ជាគ្រឿងអស់ទៅនៃទុក្ខ ។
៣-ភិក្ខុជាអ្នកប្រដៅងាយ ប្រកបដោយធម៌ទាំងឡាយ ជាគ្រឿងធ្វើឲ្យប្រដៅងាយ ជាអ្នកអត់ធន់ ទទួលយកនូវពាក្យប្រៀនប្រដៅ ដោយផ្ចិតផ្ចង់ ។
៤-អំពើណាដែលភិក្ខុជាអ្នកឈ្លាសពិចារណាដោយឧបាយហើយ អំពើនោះ គួរបុគ្គលប្រព្រឹត្តតាមដោយប្រពៃចុះ ។
៥-ភិក្ខុណាជាអ្នកមានសីល សង្រួមក្នុងបាតិមោក្ខសំវរៈ បរិបូណ៌ដោយការសង្រួម ជាអ្នកឃើញភ័យក្នុងទោស ភិក្ខុនោះឈ្មោះថាជាអ្នករស់នៅដោយភាពបរិសុទ្ធ ។
៦-ភិក្ខុជាពហុស្សូតទ្រទ្រង់នូវពុទ្ធវចនៈ ដែលខ្លួនបានស្តាប់ហើយ សន្សំនូវពុទ្ធវចនៈ ដែលខ្លួនបានស្តាប់ ភិក្ខុនោះរមែងចេះចាំច្រើន ចាក់ធ្លុះល្អដោយសម្មាទិដ្ឋិ ។
៧-ព្រះសង្ឃជាអ្នកប្រាថ្នាធម៌ ពេញចិត្តនឹងការនិយាយធម៌រមែងមានសេចក្តីរីករាយដ៏លើសលុប ក្នុងធម៌និងវិន័យ ។
៨-អ្នកបួសដែលមានមិត្តល្អ មានសម្លាញ់ល្អ ជាអ្នកពត់ខ្លួនតាមមិត្តសម្លាញ់ល្អ ។
៩-ភិក្ខុជាអ្នកព្យាយាមលះនូវអំពើជាកុសលធម៌ និងជាអ្នកសង្វាត
ក្នុងអំពើល្អមិនដាក់ចុះនូវធុរៈរមែងឆ្លៀវឆ្លាសក្នុងកិច្ចទាំងពួង ។
១០-ភិក្ខុជាអ្នកសន្តោសដោយចីវរ បិណ្ឌបាត សេនាសនៈ និងគិលានភេសជ្ជបរិក្ខារ តាមមាន តាមបាន តាមសមគួរ រមែងជាអ្នកបរិបូណ៌ដោយសីលបរិសុទ្ធ ។
ឱវាទទាំង១០ប្រការនេះជាធម៌ប្រព្រឹត្តទៅដើម្បីសេចក្តីព្រមព្រៀងគ្នា ដើម្បីមូលមិត្តគ្នា ភិក្ខុដែលប្រព្រឹត្តត្រឹមត្រូវហើយនឹងជាអ្នកបរិបូណ៌ដោយធម៌វិន័យ ។
ចែករំលែកព័តមាននេះ