រាជធានីភ្នំពេញ ៖ នៅប៉ុន្មានឆ្នាំចុងក្រោយនេះគេសង្កេតឃើញថា វិស័យអប់រំទទួលបានការវិនិយោគពីវិស័យឯកជនជាច្រើនក្នុងការផ្តល់សេវាអប់រំគ្រប់កម្រិតនៅក្នុងប្រទេស ពិសេសក្រុងភ្នំពេញ បាននិងកំពុងទាក់ទាញទឹកចិត្តមាតាបិតាសម័យថ្មី ឱ្យវិនិយោគលើកុមារតូចរបស់ខ្លួនអស់ប្រាក់រាប់រយដុល្លារ ឬដល់ពាន់ដុល្លារក្នុងដំណាក់កាលនីមួយៗ ទោះបីដឹងថាការវិនិយោគមួយនេះធ្វើឱ្យបន្ទុកចំណាយប្រចាំគ្រួសារត្រូវកើនឡើងក្តី។
ការវិនិយោគលើកុមារតូចរបស់ស្ត្រីសម័យថ្មីនេះ ក្នុងហេតុផលគឺចង់ឃើញ ឬចង់បានពេលកូនធំដឹងក្តីមានសមត្ថភាពគ្រប់គ្រាន់ទាំងការប្រកបការងារនិងការរស់នៅក្នុងសង្គម ស្ត្រីសម័យថ្មីក៏មានការពិនិត្យយ៉ាងល្អិតល្អន់ទៅលើស្ថាប័នអប់រំ ខុសប្លែកពីផ្នត់គំនិតឪពុកម្តាយពីពេលមុនៗ ទាល់តែកុមារគ្រប់អាយុត្រូវចូលរៀនទើបបញ្ជូនទៅសាលាហើយការជំរុញទឹកចិត្តមានលក្ខណៈធម្មតា។
អ្នកម្តាយសម័យដែលទើបមានកូនជាលើកដំបូងនិងជាស្ត្រីមេផ្ទះផងនោះ អ្នកស្រី ម៉េង គាង បានឱ្យដឹងថា «ម្តាយគ្រប់រូបគឺចង់ឱ្យកូនឆ្លាតវៃ, ចង់ឱ្យកូនរៀនបានគ្រប់គ្រាន់ ចង់ឱ្យកូនបានរៀននៅតាមសាលាល្អ ហើយអ្វីដែលយើងទទួលបានត្រលប់មកវិញ ក៏វាល្អទៅតាមនោះដែរ ក្រៅពីចំណេះដឹងក្នុងនោះសុជីវធម៌ក៏ល្អដែរ»។ អ្នកស្រីបានលើកឡើងបន្ថែមទៀតថា ក្នុងមួយខែៗគ្រាន់តែចំណាយទៅលើការស្លៀកពាក់និងហូបចុកប្រចាំខែចំណាយមួយខែៗមិនទាន់យកទៅចូលរៀននេះអស់ប្រាក់ពី ៣០០ទៅ៤០០ដុល្លារអាមេរិក ។ ដោយឡែកសម្រាប់ការចំណាយលើការសិក្សាក្នុងរយៈពេល២០សប្តាហ៍អស់ប្រាក់ជាង៥០០ដុល្លារអាមេរិក គិតទៅតាមកម្រិតជាក់ស្តែង។
ទន្ទឹមនិងការបង់ថ្លៃសិក្សាកុមារតូចរៀន ស៊ឹងតែថ្លៃជាងមនុស្សពេញវ័យរៀននៅតាមវិទ្យាស្ថាន ឬសកលវិទ្យាល័យមួយចំនួននាពេលបច្ចុប្បន្ននេះ ស្ត្រីសម័យថ្មីគ្រប់រូបមុននឹងសម្រេចចិត្តយកកូនតូចទៅចូលរៀនតាមសាលាឯកជននេះ គឺមានការពិនិត្យយ៉ាងល្អិតល្អន់អំពីប្រវត្តិសាលានីមួយៗ។
អ្នកស្រី ង៉ួន សុចិត្រា បានឱ្យដឹងថា «មុននឹងខ្ញុំសម្រេចចិត្តនាំកូនទៅចូលរៀននៅសាលាណាមួយនោះ យើងបានស្រាវជ្រាវថាសាលានោះគាត់ចាប់ផ្តើមបើកមានរយៈពេលយូរឆ្នាំហើយឬនៅ, មានកូនសិស្សចូលមករៀនច្រើនឬតិច។ លើសពីនេះនៅពេលសិស្សបញ្ចប់ការសិក្សានៅសាលានោះមានគុណភាពបែបណាដែរ»។ អ្នកស្រីបានបន្តទៀតថា ការដែលធ្វើឱ្យអ្នកស្រីនាំកូនមកចូលរៀននៅសាលាឯកជន ចំណាយក្នុងមួយឆ្នាំរហូតដល់ ២ពាន់ដុល្លារសម្រាប់កូនពីរនាក់ មិនព្រមយកកូនទៅចូលរៀននៅសាលារដ្ឋ ដោយសារនៅតាមសាលារដ្ឋការគ្រប់គ្រងមានលក្ខណៈទូលំទូលាយ តែដោយឡែកនៅតាមសាលាឯកជនគេមានការគ្រប់គ្រងដិតដល់ ផ្តល់ភាពកក់ក្តៅដល់ឪពុកម្តាយ។
លោកឧកញ៉ា វេជ្ជបណ្ឌិត គួច ម៉េងលី ជាស្ថានិកមជ្ឈមណ្ឌលភាសា អេ អាយ អាយ និងសាលារៀនអន្តរទ្វីបអាមេរិកាំង បានថ្លែងប្រាប់ក្រុមអ្នកសារព័ត៌មាន ឲ្យដឹងកាលពីថ្ងៃទី៨ ខែ ឧសភានេះថា កត្តាមួយដែលមាតាបីតាសម័យថ្មីជ្រើសរើសសាលាឯកជន មិនមែនដោយសារតែសាលាមានគុណភាពមានតម្លៃខ្ពស់នោះទេ គឺតម្លៃអាស្រ័យទៅលើទីផ្សារនិងការប្រែប្រួលអតិផរណា។ ការណ៍នេះមានន័យថាឪពុកម្តាយនាំកូនរបស់ខ្លួនមករៀនបានក្នុងតម្លៃសមរម្យដែលអាចឱ្យពួកគាត់ទទួលយកបាន ។ លោកឧកញ៉ាបន្តថា «បច្ចុប្បន្ននេះបើតាមខ្ញុំឃើញ សាលារដ្ឋនិងសាលាឯកជនដើរទន្ទឹមគ្នា ។ បើអត់មានសាលាឯកជនចូលរួមអាចធ្វើឱ្យខ្វះសាលារៀន ព្រោះសាលារដ្ឋកំពុងមានការអភិវឌ្ឍឬសាងសង់សាលា។ ខណៈដែលកំណើនរបស់ពលរដ្ឋមានការកើនឡើងច្រើនក្នុងមួយឆ្នាំទៅមួយឆ្នាំ។ដូចនេះមិនថាចូលរៀននៅសាលាឯកជនឬសាលារដ្ឋនោះទេ គឺមានគុណភាពដូចគ្នា ការបង្រៀនដូចគ្នា»។ បើតាមលោកឧកញ៉ា នៅមួយរយៈចុងក្រោយនេះការចូលរួមពីវិស័យឯកជនទៅក្នុងវិស័យអប់រំមានការលូតលាស់ខ្លាំង ប៉ុន្តែទន្ទឹមនឹងការលូតលាស់នេះក៏មានសាលាមួយចំនួនបានក្ស័យធុនដោយសារកត្តាសេដ្ឋកិច្ចនិងកត្តាសំខាន់ផ្សេងទៀត។
លោកឧកញ៉ាលើកឡើងថា «បើវិស័យឯកជនឬបុគ្គលរៀបចំសាលាមិនពេញលក្ខណៈជាសាលារៀនមានស្តង់ដារ មានរបៀប មានវិន័យត្រឹមត្រូវ ផ្តល់ចំណេះដឹងឱ្យកូនគេបានយ៉ាងពិតប្រាកដនោះឪពុកម្តាយនឹងបន្តបញ្ជូនកូនគាត់មករៀន។ សាលាដែលកំពុងដំណើរការមកដល់សព្វថ្ងៃនេះបានរួមចំណែកផ្តល់សេវាកម្មអប់រំប្រកបដោយគុណភាព» ។ លោកឧកញ៉ា បន្តថា នៅប្រទេសណាក៏ដូចគ្នាដែរ ដើម្បីឱ្យប្រទេសមានការអភិវឌ្ឍជឿនលឿនទាល់តែក្រសួងអប់រំយកចិត្តទុកដាក់ខ្លាំង។ ដូចបច្ចុប្បន្ននេះរាជរដ្ឋាភិបាលក៏ដូចជាក្រសួងអប់រំមានការគាំទ្រនិងជំរុញខ្លាំង ក្នុងការកែទម្រង់ប្រព័ន្ធអប់រំ ដោយធ្វើយ៉ាងម៉េចឱ្យការអប់រំនៅស្រុកខ្មែរឆាប់ទាន់សម័យកាលស្ថិតនៅក្នុង
តំបន់។
យោងតាមមន្ត្រីអ្នកនាំពាក្យក្រសួងអប់រំ យុវជននិងកីឡា លោក ឌី ខាំបូលី ធ្លាប់មានប្រសាសន៍ថា «មកដល់ឆ្នាំ២០១៨ គ្រឹះស្ថានអប់រំនៅទូទាំងប្រទេសមានប្រមាណជាង១,៣ម៉ឺនសាលា ក្នុងនោះសាលាបឋមសិក្សាមានប្រមាណ៨ពាន់សាលា, អនុវិទ្យាល័យ១,៣ពាន់សាលានិងវិទ្យាល័យមានជាង៥០០សាលា។គ្រឹះស្ថានអប់រំវិស័យឯកជនមានប្រមាណ១.២២០សាលានៅគ្រប់កម្រិតសិក្សា» ។លោកលើកឡើងថា «នាពេលកន្លងមកក៏ដូចបច្ចុប្បន្ននេះ ការចុះឈ្មោះចូលរៀននៅសាលាឯកជនច្រើន ឬរដ្ឋច្រើន វាមិនមែនជាបញ្ហានោះទេ ព្រោះប្រទេសយើងគោរពតាមទីផ្សារសេរី។ អ្នកណាធ្វើបានល្អ អ្នកនោះទទួលបានផល។ តែបច្ចុប្បន្នសាលារដ្ឋយើងក៏មានការរីកចម្រើនមិនអន់ជាងសាលាឯកជនប៉ុន្មាននោះទេ ហើយនៅថ្ងៃអនាគតក្រសួងបង្កើនគុណភាព ប្រសិទ្ធិភាព និងការគ្រប់គ្រងក៏ដូចការបង្រៀន និងការរៀន។ ជាក់ស្តែនៅសាលាជំនាន់ថ្មីដែលបង្កើតឡើងចំនួន១១សាលានៅទូទាំងប្រទេស គឺមានមាតាបិតាយកកូនមកចុះឈ្មោះចូលរៀនច្រើន សឹងតែរកបន្ទប់ឱ្យរៀនគ្មាន»៕
ចែករំលែកព័តមាននេះ