រាជធានីភ្នំពេញ ៖ បុរសជាជនបរទេសបានរងរបួសយ៉ាងធ្ងន់ធ្ងរ បន្ទាប់ពីជនរងគ្រោះទើបតែមកជួលផ្ទះមួយកន្លែងស្នាក់នៅបានតែ២ថ្ងៃប៉ុណ្ណោះ ក៏ប៉ុនប៉ងធ្វើអត្តឃាតសម្លាប់ខ្លួនឯងដោយឈរលើយ៉ និងពោបពីលើបង្កាន់ដៃដែករួចទម្លាក់ខ្លួនពីលើផ្ទះជាន់ទី២ រួចធ្លាក់ទៅលើដំបូលស័ង្កសីនៅជាន់ទី១ ហើយរមៀលធ្លាក់ទៅលើដល់ដី បណ្តាលឱ្យរងរបួសធ្ងន់ ។…
រាជធានីភ្នំពេញ ៖ បុរសជាជនបរទេសបានរងរបួសយ៉ាងធ្ងន់ធ្ងរ បន្ទាប់ពីជនរងគ្រោះទើបតែមកជួលផ្ទះមួយកន្លែងស្នាក់នៅបានតែ២ថ្ងៃប៉ុណ្ណោះ ក៏ប៉ុនប៉ងធ្វើអត្តឃាតសម្លាប់ខ្លួនឯងដោយឈរលើយ៉ និងពោបពីលើបង្កាន់ដៃដែករួចទម្លាក់ខ្លួនពីលើផ្ទះជាន់ទី២ រួចធ្លាក់ទៅលើដំបូលស័ង្កសីនៅជាន់ទី១ ហើយរមៀលធ្លាក់ទៅលើដល់ដី បណ្តាលឱ្យរងរបួសធ្ងន់ ។
ហេតុការណ៍ខាងលើនេះដែរបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង១១ព្រឹកថ្ងៃទី១០ ខែឧសភា ឆ្នាំ២០១៩ នៅចំណុចបន្ទប់ជួលជាន់ទី២ ផ្ទះគ្មានលេខផ្លូវលេខ១០៨ កែងផ្លូវព្រះស៊ីសុវត្ថិ ក្នុងសង្កាត់វត្តភ្នំ ខណ្ឌដូនពេញ។
តាមប្រភពព័ត៌មានពីនគរបាលបានប្រាប់ឱ្យដឹងថា មុនពេលកើតហេតុ គេបានឃើញបុរសជាជនបរទេសមិនស្គាល់អត្តសញ្ញាណម្នាក់ មានអាយុប្រមាណជាង៣០ឆ្នាំ ហើយក៏មិនមាននរណាម្នាក់បានដឹងថា បុរសបរទេសនោះជាជនជាតិអ្វីដែរ បានឡើងឈរលើយ៉ និងពោបពីលើបង្កាន់ដៃដែកនៅខាងមុខបន្ទប់ស្នាក់នៅរបស់គាត់ ដោយនិយាយ និងស្រែកឡោឡាហាក់បីដូចជាមនុស្សបែកថ្នាំ បង្កអោយមានការភ្ញាក់ផ្អើលដល់អ្នករស់នៅជិតខាង និងកម្លាំងសមត្ថកិច្ចមូលដ្ឋាន រួមទាំងម្ចាស់ផ្ទះជួលចុះមកដល់កន្លែងកើតហេតុផងដែរ។
តាមប្រភពដដែលបានប្រាប់បន្តថា ដោយឃើញសភាពការណ៍បែបនោះ កម្លាំងសមត្ថកិច្ចមូលដ្ឋាន និង ម្ចាស់ផ្ទះជួលក៏បានឡើងទៅលើផ្ទះ និងយកកូនសោទៅចាក់ទ្វារបន្ទប់ខាងលើ ដើម្បីចូលទៅជួយសង្គ្រោះដែរ តែត្រូវបានបុរសជាជនបរទេសម្នាក់នោះយកសោសូឡិចមួយចាក់ជាប់ពីខាងក្នុង មិនអាចចូលទៅបានឡើយ ។ បន្តិចក្រោយមក ស្រាប់តែបុរសបរទេសម្នាក់នោះក៏បានឡើងទៅលើបង្កាន់ដៃដែក និងទម្លាក់ ខ្លួនទៅក្រោមតែម្តង បណ្តាលឱ្យធ្លាក់ទៅលើសំយ៉ាបស័ង្កសីផ្ទះជាន់ទី១ រួចរមៀលធ្លាក់ទៅដល់ដី សំណាងល្អមិនបានស្លាប់បាត់បង់ជីវិតនោះទេ គ្រាន់តែរងរបួសធ្ងន់ប៉ុណ្ណោះ។
ពាក់ព័ន្ធទៅនឹងករណីបុរសជាជនបរទេសម្នាក់ប៉ុនប៉ងធ្វើអត្តឃាតសម្លាប់ខ្លួនឯងខាងលើនេះ ទំនងជាជនរងគ្រោះបានប្រើប្រាស់ថ្នាំញៀនច្រើនហួសកម្រិត និងមានអាការៈបែកថ្នាំខ្លាំង ទើបធ្វើទង្វើបែបនេះ ហើយជនរងគ្រោះទើបតែមកជួលផ្ទះខាងលើស្នាក់នៅបានតែ២ថ្ងៃប៉ុណ្ណោះ ម្យ៉ាងទៀតក៏មិនមានឯកសារសំគាល់ខ្លួនអ្វីនៅជាប់នឹងខ្លួនជនរងគ្រោះឡើយ។
ក្រោយពេលកើតហេតុ កម្លាំងសម្ថកិច្ចក៏បានហៅរថយន្តសាមុយរបស់មន្ទីរពេទ្យកាល់ម៉ែតមួយគ្រឿង អោយមកដឹកយកជនរងគ្រោះយកទៅសង្គ្រោះភ្លាមៗផងដែរ ៕
ចែករំលែកព័តមាននេះ