បន្ទាប់ពីរៀបមង្គលការរួច នាងជាភរិយាត្រូវទៅនៅផ្ទះខាងគ្រួសាររបស់ស្វាមី ចំណុចនេះស្វាមីត្រូវដឹងផងដែរនូវសេចក្ដីទុក្ខរបស់ភរិយាខ្លួនក្នុងឋានៈជាស្រី ដែលជាភេទទន់ខ្សោយ និងមានអ្វីៗខុសពីបុរសភេទ ដូច្នេះស្វាមីគួរពិចារណាថាៈ ១-នាងជាភរិយាតែងមានសេចក្ដីទុក្ខ ព្រោះការព្រាត់ពីបង ប្អូន ម្ដាយ…
បន្ទាប់ពីរៀបមង្គលការរួច នាងជាភរិយាត្រូវទៅនៅផ្ទះខាងគ្រួសាររបស់ស្វាមី ចំណុចនេះស្វាមីត្រូវដឹងផងដែរនូវសេចក្ដីទុក្ខរបស់ភរិយាខ្លួនក្នុងឋានៈជាស្រី ដែលជាភេទទន់ខ្សោយ និងមានអ្វីៗខុសពីបុរសភេទ ដូច្នេះស្វាមីគួរពិចារណាថាៈ
១-នាងជាភរិយាតែងមានសេចក្ដីទុក្ខ ព្រោះការព្រាត់ពីបង ប្អូន ម្ដាយ ឪពុក ស្រុកកំណើតមកនៅនឹងស្វាមី ទីកន្លែងថ្មី មនុស្សចម្លែកថ្មី ដែលធ្វើឲ្យគ្នាមិនស្រណុកចិត្ត ឬខ្លាចៗ ធ្វើនេះមិនសម ធ្វើនោះមិនសម ព្រោះប្លែកកន្លែង។ ស្វាមីត្រូវដឹងនូវវិបត្តិផ្លូវចិត្តនេះ និងព្យាយាមសម្រួលការឲ្យភរិយារបស់ខ្លួនបានស្រួលផង។
២-តាមធម្មតាស្ត្រីតែងមានសេចក្ដីទុក្ខទាំងខាងផ្លូវកាយ និងផ្លូវចិត្ត នៅពេលចុងខែជាពេលដែលនាងមានឈាមរដូវ។ ក្នុងរដូវកាលនេះ នឹងធ្វើឲ្យឈឺចុកចាប់ដល់ពោះ ឬឈឺក្បាល ឬទៅជារោគខ្យល់ បើជួនជាឈាមរដូវដើរមិនទៀងផង ឬមានធ្លាក់សផងនោះ ក៏នឹងរឹតតែជាបញ្ហាឡើង។ ម្យ៉ាងទៀត ក្នុងរដូវកាលនេះ អារម្មណ៍របស់នាងក៏មានភាពមិននឹងនរ ឆាប់ខឹង មិនសប្បាយចិត្តជាដើម។ ស្វាមីត្រូវយល់ពីបញ្ហានេះ ជួយរួមចំណែកក្នុងការឈឺចាប់ផងដែរ និងមិនធ្វើអ្វីដែលជាការលំបាកដល់នាង ឬបើមិនស្រួល ក៏ប្រញាប់ប្រញាល់រកថ្នាំសង្កូវព្យាបាលភ្លាម ។
៣-នាងជាភរិយាតែងមានសេចក្ដីទុក្ខ ពេលដែលនាងមានគភ៌ ។ ការមានគភ៌ជាការមួយដែលនាងជាភរិយាទាំងអៀនខ្មាស ទាំងត្រូវទ្រាំថែមទៀតនូវទម្ងន់កូនក្នុងផ្ទៃបន្ថែមជារៀងរាល់ថ្ងៃ។ នាងមិនអាចឈរបានស្រួល ដើរបានស្រួល ឬប្រកបកិច្ចការបានស្រួលដូចកាលដែលមិនមានកូនក្នុងផ្ទៃនោះទេ។ ទាំងចំណីអាហារក៏ដូចគ្នាដែរ មានស្រី្តខ្លះរហូតដល់ចាញ់កូន ឬនឹកចង់ចំណីផ្ដេសផ្ដាសដែលរកមិនបានក៏មាន ។
៤-ភរិយាតែងមានសេចក្ដីទុក្ខ ព្រោះត្រូវបម្រើសេចក្ដីត្រូវការខាងផ្លូវភេទរបស់ស្វាមី។ ចំណុចត្រង់នេះ សំខាន់ណាស់ចំពោះអ្នកជាស្វាមីដែលត្រូវយល់ទុក្ខធុរៈរបស់ភរិយាខ្លួន និងអារម្មណ៍របស់ភរិយាខ្លួនដែរ មិនមែនចេះតែត្រូវការពេលណា ថ្មើរណា ក៏ចេះតែប្រព្រឹត្តសេព អាងតែគ្នាមិនហ៊ានប្រកែកនោះ យើងត្រូវយល់ចិត្តភរិយាដែរ ។
៥-ភរិយាតែងមានសេចក្ដីទុក្ខ ពេលដែលនាងឆ្លងទន្លេប្រសូតបុត្រ ។ ស្វាមីគប្បីនៅថែទាំ និងជាកម្លាំងចិត្តដល់នាងនូវគ្រប់កិច្ចការទាំងពួង ជាពិសេសបើនាងមានការមិនសប្បាយចិត្ត ឬធ្វើការធ្ងន់ អាចនឹងឲ្យទៅជាទាស់ស្គមរីងរៃ ដាច់ទឹកដោះ ឬគ្រោះថ្នាក់ដល់បាត់បង់ជីវិតក៏មានដែរ ដូចនេះស្វាមីគប្បីសាកសួរចាស់ៗឲ្យបានច្រើនក្នុងរឿងនេះ ។
ការរៀបរាប់មកនេះមិនអាចពណ៌នាឲ្យអស់នូវសេចក្ដីពិតរបស់ស្រី្តជាភរិយាបានឡើយ ស្វាមីគប្បីសាកសួរចាស់ៗបន្ថែមទៀតផងចុះ ។
ចែករំលែកព័តមាននេះ