កាណាដា៖ ភ្នាក់ងារសារព័ត៌មាន Reuters បានឲ្យដឹងកាលពីថ្ងៃទី ៦ កន្លងមកថា ប្រទេសកាណាដាកំពុងតែពឹងផ្អែកលើសហរដ្ឋអាមេរិកឲ្យជួយដោះស្រាយជម្លោះជាមួយនឹងប្រទេសចិនដែលបានចាប់ផ្តើមទប់ស្កាត់ការនាំចូលផលិតផលសំខាន់ៗពីកាណាដាខណៈដែលមានជម្លោះទាក់ទិននឹងការឃុំខ្លួននាយក Huawei ។
រដ្ឋាភិបាលរបស់លោកនាយករដ្ឋមន្ត្រី Justin Trudeau កំពុងតែបង្ហាញមុខសញ្ញាថានឹងផ្អាកកិច្ចសហប្រតិបត្តិការជាមួយនឹងសហរដ្ឋអាមេរិកលើបញ្ហាធំៗ ។ ក្នុងកំឡុងពេលប៉ុន្មានសប្តាហ៍ថ្មីៗនេះប្រទេសចិនបានបង្កើនសម្ពាធលើប្រទេសកាណាដាព្រោះតែការចាប់ខ្លួនអ្នកស្រី Meng Wanzhou ដែលជានាយកទទួលបន្ទុកហិរញ្ញវត្ថុប្រចាំក្រុមហ៊ុន Huawei Technologies Co. Ltd របស់ប្រទេសចិនកាលពីខែធ្នូ ។ ប្រទេសចិនបានផ្អាកការនាំចូលផលិតផល Canola ពីកាណាដា និងបានផ្អាកការផ្តល់ប័ណ្ណអនុញ្ញាតនាំចូលពីក្រុមហ៊ុនសាច់ជ្រូកពីរទៀត ។
បន្ទាប់ពីការចាប់ខ្លួនរបស់អ្នកស្រី Meng ហើយ ប៉ូលីសចិនក៏បានឃុំខ្លួនពលរដ្ឋកាណាដាចំនួនពីរនាក់ដែរ។ ប្រទេសចិនកំពុងតែបដិសេធក្នុងការអនុញ្ញាតឲ្យក្រុមប្រតិភូពាណិជ្ជកម្មកាណាដាធ្វើទស្សនៈកិច្ចក្នុងប្រទេសចិន ។ ព្រោះតែកាណាដាមិនមានអ្វីដែលអាចយកមកចរចាជាមួយនឹងប្រទេសចិនបាន ប្រទេសនេះងាកទៅកាន់សហរដ្ឋអាមេរិកវិញដែលកំពុងតែចរចាលើកិច្ចព្រមព្រៀងពាណិជ្ជកម្មមួយជាមួយនឹងប្រទេសចិន ។
កាលពីខែមិនា គណៈកម្មាធិការទំនាក់ទំនងបរទេសរបស់សហរដ្ឋអាមេរិកបានឆ្លើយតបនឹងកង្វល់របស់កាណាដាដោយជំរុញឲ្យមានការស្វែងរកដំណោះស្រាយទ្វេភាគី ប៉ុន្តែកាណាដាបាននិយាយថា សហរដ្ឋអាមេរិកមានកាតព្វកិច្ចក្នុងការជួយកាណាដាព្រោះដីកាចាប់ខ្លួនរបស់សហរដ្ឋអាមេរិកជាអ្វីដែលបង្កឲ្យមានជម្លោះជាមួយនឹងប្រទេសចិន ។ ជាមួយគ្នានេះផងដែរ ប្រភពមួយបានឲ្យដឹងថា អ្នកចរចាតំណាងអាមេរិកបានបដិសេធសំណើររបស់ភាគីខាងប្រទេសចិនក្នុងការយកបញ្ហា Huawei យកមកចរចាក្នុងកិច្ចចរចាលើកិច្ចព្រមព្រៀងពាណិជ្ជកម្ម ៕
ចែករំលែកព័តមាននេះ