ខេត្តបាត់ដំបង ៖ តាមការឱ្យដឹងពីលោក អ៊ុច អ៊ំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង បានឱ្យដឹងថា ថ្មីៗនេះខេត្តបាត់ដំបងបានជាប់ជាទីក្រុងគោលដៅទេសចរណ៍លេខរៀងទី១៣ ក្នុងចំណោមបណ្តាទីក្រុងទាំង៩៣នៅតំបន់អាស៊ីអាគ្នេយ៍ ដែលវាយតម្លៃដោយស្ថាប័នផ្សព្វផ្សាយទេសចរណ៍អន្តរជាតិរបស់អាល្លឺម៉ង់មួយឈ្មោះថា…
ខេត្តបាត់ដំបង ៖ តាមការឱ្យដឹងពីលោក អ៊ុច អ៊ំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង បានឱ្យដឹងថា ថ្មីៗនេះខេត្តបាត់ដំបងបានជាប់ជាទីក្រុងគោលដៅទេសចរណ៍លេខរៀងទី១៣ ក្នុងចំណោមបណ្តាទីក្រុងទាំង៩៣នៅតំបន់អាស៊ីអាគ្នេយ៍ ដែលវាយតម្លៃដោយស្ថាប័នផ្សព្វផ្សាយទេសចរណ៍អន្តរជាតិរបស់អាល្លឺម៉ង់មួយឈ្មោះថា You Discover ក្នុងនោះក្រុងសៀមរាបជាគោលដៅទេសចរណ៍ទាក់ទាញបំផុតឈរលេខ១ ទីក្រុងបាងកកឈរលេខ២ ទីក្រុងសិង្ហបុរីឈរលេខ៣ និងរាជធានីភ្នំពេញឈរនៅលំដាប់លេខ៤ ។
ជាមួយមោទនភាពនេះ ដោយបានការយកចិត្តទុកដាក់របស់លោកអភិបាលខេត្ត និងស្ថាប័នជំនាញនានាបានជួយជម្រុញឱ្យខេត្តបាត់ដំបងក្លាយជាខេត្ត មួយដែលគួរជាទីកក់ក្តៅបំផុតសម្រាប់ប្រជាពលរដ្ឋ និងភ្ញៀវទេសចរណ៍ ។
រដ្ឋបាលខេត្តសហការយ៉ាងល្អជាមួយអង្គភាព និងមន្ទីរពាក់ព័ន្ធទូទាំងខេត្ត បានខិតខំអភិវឌ្ឍ និងជួសជុលហេដ្ឋារចនាសម្ព័ន្ធឆ្ពោះទៅកាន់គោលដៅទេសចរណ៍នានា ព្រមទាំងបានរៀបចំបង្កើតនូវព្រឹត្តិការណ៍ទេសចរណ៍ជាច្រើន ដើម្បីទាក់ទាញភ្ញៀវទេសចរជាតិ និងអន្តរជាតិមកកម្សាន្តសប្បាយក្នុងខេត្ត ដែលបានរួមចំណែកយ៉ាងសំខាន់ក្នុងការលើកកម្ពស់សេដ្ឋកិច្ចរបស់ប្រជាពលរដ្ឋក្នុងខេត្តបាត់ដំបងទាំងមូល ។
មិនតែប៉ុណ្ណោះ រដ្ឋបាលខេត្តបានយកចិត្តទុកដាក់យ៉ាងខ្លាំងចំពោះការរៀបចំថែរក្សា អនាម័យ បរិស្ថាន ការគ្រប់គ្រងកាកសំណល់ ការបញ្ជ្រាបការយល់ដឹងដល់ប្រជាពលរដ្ឋឱ្យចូលរួម ធ្វើការដាំដុះដើមឈើបង្កើននូវតំបន់បៃតង កត្តាសន្តិសុខ សណ្តាប់ធ្នាប់ ហេដ្ឋារចនាសម្ព័ន្ធ និងសម្បទាទ្រទ្រង់វិស័យទេសចរណ៍ ។
ជាក់ស្តែងកន្លងមកនេះក្រុងបាត់ដំបងបានទទួលសមិទ្ធផលសំខាន់ៗ ដូចជាជាប់ជ័យលាភីទីក្រុងស្អាតលើកទី១ និងលើកទី២ ផ្ការំដួល៣ទង ចំណាត់ថ្នាក់លេខ១ ជាប់ជ័យលាភីឡាប៊ិលទីក្រុងស្អាតអាស៊ានលើកទី១ (២០១៨-២០២០) ជាប់ជ័យលាភីនិរន្តរភាពទីក្រុងអាស៊ានក្នុងឆ្នាំ២០១៤ ជាខេត្តដែលមានភ្ញៀវទេសចរមកកម្សាន្តសប្បាយច្រើនជាងគេនៅកម្ពុជាក្នុងឱកាសចូលឆ្នាំខ្មែរឆ្នាំ២០១៩ និងជាប់ជាទីក្រុងគោលដៅទាក់ទាញទេសចរណ៍ឈរលើលំដាប់លេខ១៣ ក្នុងចំណោមបណ្តាទីក្រុងទាំង៩៣ នៅតំបន់អាស៊ីអាគ្នេយ៍ (វាយតម្លៃដោយ ស្ថាប័នផ្សព្វផ្សាយទេសចរណ៍អន្តរជាតិ របស់អាល្លឺម៉ងមួយមានឈ្មោះថា YOU DICOVER) និងពានរង្វាន់ជាច្រើនទៀត។
មិនតែប៉ុណ្ណោះ ប្រតិបត្តិករទេសចរណ៍ទូទាំងខេត្តបាត់ដំបង តែងចូលរួមក្នុងចលនាប្រឡងប្រណាំងសំខាន់ៗជាច្រើន និងទទួលបានលទ្ធផលជោគជ័យមានដូចជា ស្តង់ដាសណ្ឋាគារបៃតង ពានរង្វាន់សម្តេចតេជោនាយករដ្ឋមន្ត្រី រង្វាន់ធុរកិច្ចបៃតងក្នុងវិស័យទេសចរណ៍ រមណីយដ្ឋានទេសចរណ៍គំរូសហគមន៍ទេសចរណ៍ គំរូមេដាយនារីឆ្នើមក្នុងវិស័យទេសចរណ៍ មេដាយអ្នកជំនាញឆ្នើមក្នុងឧស្សាហកម្មទេសចរណ៍ជាដើម ដែលជាសញ្ញាមួយបង្ហាញថា ខេត្តបាត់ដំបងផ្តល់សេវាកម្មក្នុងកម្រិតស្តង់ដាដ៏ប្រសើរនិងត្រូវបានទទួលស្គាល់លំដាប់អន្តរជាតិ ។ កត្តាទាំងនេះហើយ បានជំរុញកំណើនភ្ញៀវទេសចរណ៍ជាតិ និងអន្តរជាតិឲ្យមកកម្សាន្តក្នុងខេត្តបាត់ដំបងមានការកើនឡើងពីមួយឆ្នាំទៅមួយឆ្នាំ ។
ព្រមជាមួយគ្នានេះ ក្រុងបាត់ដំបងកំពុងនឹងត្រៀមខ្លួន បញ្ចូលជាទីក្រុងបេតិកភណ្ឌរបស់អង្គការយូណេស្កូនាពេលខាងមុខនេះដែរ ដែលជាកាតាលីករមួយយ៉ាងសំខាន់ក្នុងការជំរុញកំណើនទេសចរណ៍យ៉ាងច្រើន នាពេលខាងមុខបន្តទៀត ។
លោកប្រធានមន្ទីរទេសចរណ៍ខេត្ត និងមន្ត្រីរាជការនៃមន្ទីរទេសចរណ៍ខេត្តបាត់ដំបង បានអបអរសាទរ និងគាំទ្រយ៉ាងពេញទំហឹងនូវការខិតខំប្រឹងប្រែង របស់រដ្ឋបាលខេត្ត ព្រមទាំងមន្ទីរ អង្គភាពពាក់ព័ន្ធ ដែលនាំឱ្យខេត្តបាត់ដំបងទទួលបានលទ្ធផលដ៏ត្រចះត្រចង់ទាំងនេះ ។ ព្រមជាមួយគ្នានេះថ្នាក់ដឹកនាំមន្ទីរទេសចរណ៍និងមន្ត្រីបានប្តេជ្ញាបន្តការខិតខំអនុវត្តការងារ និងចូលរួមគ្រប់ចលនាប្រលងប្រណាំងនានា ដើម្បីឲ្យខេត្តបាត់ដំបងកាន់តែមានភាពទាក់ទាញ និង រីកចម្រើនទៅមុខបន្ថែមទៀតជាការជួយជំរុញកំណើនសេដ្ឋកិច្ចក្នុងខេត្តកាន់ប្រសើរឡើងថែមទៀត ៕
ចែករំលែកព័តមាននេះ