តាមប្រភពពីOddity Central បានឱ្យដឹងថា បុរសម្នាក់អាយុ៤៥ឆ្នាំ មកពីតំបន់ដាច់ស្រយាលមួយនៅក្នុងប្រទេសកេនយ៉ា ត្រូវបានគេចាត់ទុកជាវីរបុរសម្នាក់ ក្រោយពីកាន់ចបធ្វើផ្លូវចម្ងាយ១ម៉ាយតែម្នាក់ឯង អស់រយៈពេល៦ថ្ងៃ ។ លោក Nicholas Muchami ជាអ្នកភូមិ Kaganda មិនអាចឈរនៅមើលអ្នកភូមិរបស់ខ្លួន រង់ចាំរដ្ឋធ្វើផ្លូវឱ្យបានទេ ។
រដ្ឋបានសម្រេចថា នឹងធ្វើផ្លូវជូនអ្នកភូមិរបស់លោកតាំងពីយូរមកហើយ តែមិនទាន់ឃើញធ្វើទាល់តែសោះ។ ផ្លូវដែលប្រជាជនធ្វើដំណើរសព្វថ្ងៃ ត្រូវបានគេបិទចោលហើយ ដោយសារតែមានឆ្លងកាត់ដីឯកជនរបស់គេ។ ដូចនេះ អ្នកភូមិត្រូវធ្វើដំណើរតាមផ្លូវវាង ដែលមានចម្ងាយដល់ទៅ៤គីឡូម៉ែត្រ។
លោក Muchami ដែលជាអ្នកធ្វើការបានប្រាក់តិចតួចពេលថ្ងៃ និងយាមពេលយប់ ដើម្បីចិញ្ចឹម
ក្រពះ បានសម្រេចចិត្តជីកផ្លូវដែលមានប្រវែងជិត២គីឡូម៉ែត្រ ដោយប្រើប្រាស់តែឧបករណ៍ធ្វើស្រែ
ចម្ការប៉ុណ្ណោះ។ លោកចាប់ផ្តើមធ្វើពីម៉ោង៧ព្រឹក ដល់ម៉ោង៥ល្ងាច ជារៀងរាល់ថ្ងៃ។ បើទោះបីជាអស់រយៈពេល៦ថ្ងៃ លោកមិនទាន់សម្រេចប្រវែងផ្លូវទាំងអស់ក៏ដោយ គេបាននិយាយពីគាត់គ្រប់គ្នានៅលើសារព័ត៌មានអន្តរជាតិ។
អ្នកភូមិមានការសប្បាយរីករាយយ៉ាងខ្លាំង ហើយក៏បានសម្តែងការដឹងគុណចំពោះអំពើល្អមិនខ្វល់ពីខ្លួនឯងរបស់លោក Muchami ផងដែរ។ ផ្លូវនេះត្រូវបានប្រើប្រាស់ដោយសិស្សសាលានៅក្នុងភូមិ ពេលពួកគេត្រូវដើរទៅសាលា ៕
ចែករំលែកព័តមាននេះ