ទីក្រុងតូក្យូ ៖ កញ្ញា គីមី អូណូដា (Kimi Onoda) រដ្ឋមន្ត្រីសន្តិសុខសេដ្ឋកិច្ចជប៉ុន ត្រូវបានថតជាប់លោតចេញពីរថយន្តតាក់ស៊ី ហើយរត់ចូលទៅបន្ទប់កិច្ចប្រជុំគណៈរដ្ឋមន្ត្រីកាលពីនៅព្រឹកថ្ងៃទី៦…
ទីក្រុងតូក្យូ ៖ កញ្ញា គីមី អូណូដា (Kimi Onoda) រដ្ឋមន្ត្រីសន្តិសុខសេដ្ឋកិច្ចជប៉ុន ត្រូវបានថតជាប់លោតចេញពីរថយន្តតាក់ស៊ី ហើយរត់ចូលទៅបន្ទប់កិច្ចប្រជុំគណៈរដ្ឋមន្ត្រីកាលពីនៅព្រឹកថ្ងៃទី៦ ខែមីនា ឆ្នាំ២០២៦។ វីដេអូនេះ ទទួលបានការចាប់អារម្មណ៍យ៉ាងខ្លាំងលើបណ្តាញទំនាក់ទំនងសង្គមពិភពលោក។
វីដេអូល្បី និងត្រូវបានចែកចាយពាសពេញបណ្តាញសង្គមមួយនេះ បានបង្ហាញពីស្ត្រីវ័យ៤៣ឆ្នាំរូបនេះ ដែលត្រូវបានស្គាល់ច្បាស់ថា កញ្ញា គីមី អូណូដា រត់យ៉ាងលឿនចូលទៅក្នុងអគារគណៈរដ្ឋមន្ត្រីដោយកាន់កាបូបដៃ ឆ្លងកាត់ក្រុមអ្នកសារព័ត៌មាន ដោយមានជំនួយការម្នាក់រត់ជាមួយ។ បន្ទាប់មក អ្នកនយោបាយស្រីរូបនេះ ត្រូវបានឃើញប្រញាប់ប្រញាល់រត់ចុះតាមជណ្តើរមួយឆ្ពោះទៅកាន់បន្ទប់ប្រជុំ។
ក្រុមកាមេរ៉ាបានថតពេលនាយករដ្ឋមន្ត្រីជប៉ុន លោកស្រី សាណាអេ តាកាអ៊ីឈី (Sanae Takaichi) ដើរចូលទៅក្នុងបន្ទប់ប្រជុំ ខណៈសហការីគណៈរដ្ឋមន្ត្រីបានក្រោកឈរឡើង ជាការស្វាគមន៍។ មួយសន្ទុះក្រោយមក នៅពេលគណៈរដ្ឋមន្ត្រីអង្គុយកៅអីតាមតំណែងរៀងខ្លួន ស្រាប់តែកាមេរ៉ាមួយបានថតកៅអីទំនេររបស់កញ្ញា គីមី អូណូដា។
យ៉ាងណាមិញ ក្រោយបញ្ចប់កិច្ចប្រជុំ រដ្ឋមន្ត្រីគណបក្សប្រជាធិបតេយ្យសេរី (LDP) រូបនេះ បានថ្លែងសុំទោសជាសាធារណៈដល់ប្រទេសជប៉ុនទាំងមូល ដោយលើកឡើងពីគ្រោះថ្នាក់ចរាចរណ៍ ជាដើមហេតុការចំពោះការមកប្រជុំយឺតយ៉ាវ។ គីមី អូណូដា ឥស្សរជនស្តាំនិយមដ៏មានប្រជាប្រិយភាពម្នាក់ ដែលកើតនៅសហរដ្ឋអាមេរិក មានម្តាយជាជនជាតិជប៉ុន ឪពុកជាជនជាតិអាមេរិកកាត់អៀរឡង់នោះ និងមានទស្សនៈតឹងរ៉ឹងទៅលើជនអន្តោប្រវេសន៍នោះ បានថ្លែងទៅកាន់ប្រជាជាតិជប៉ុនដោយនិយាយថា «ខ្ញុំនឹងនៅតែមានការប្រុងប្រយ័ត្នដើម្បីអាចឆ្លើយតបទៅនឹងកាលៈទេសៈដែលមិនបានមើលឃើញទុកជាមុនណាមួយ»។
សូមជម្រាបថា ការមកទាន់ពេលវេលា គឺជារឿងដ៏មានសារៈសំខាន់ខ្លាំងណាស់នៅក្នុងប្រទេសជប៉ុន ហើយការមកយឺតត្រូវបានចាត់ទុកជាទង្វើខ្វះការគោរព ឬឈ្លើយ។ ទោះយ៉ាងណាក៏ដោយ អ្នកនិយមលេងបណ្តាញសង្គមបែរជាកោតសរសើររដ្ឋមន្ត្រីសន្តិសុខសេដ្ឋកិច្ចជប៉ុនរូបនេះ ចំពោះការសុំទោសភ្លាមៗ ដោយហៅការទង្វើនេះថាជាគំរូដ៏ល្អ។
មតិខ្លះលើកឡើងថា «ការមកយឺត៥នាទីរបស់រដ្ឋមន្ត្រីសន្តិសុខសេដ្ឋកិច្ច អូណូដា គឺច្បាស់ណាស់ដោយសារតែករណីមិនអាចមើលឃើញមុន ព្រោះតែការកកស្ទះចរាចរណ៍បណ្តាលមកពីគ្រោះថ្នាក់លើផ្លូវហាយវេ។ តាមពិតទៅ ជាធម្មតា អូណូដា តែងមកដល់មុន ១៥ ទៅ ២០ នាទី បង្ហាញពីស្មារតីទទួលខុសត្រូវយ៉ាងខ្ពស់របស់នាង។
មតិមួយទៀតលើកឡើងថា ការសុំទោសភ្លាមៗ និងការអត្ថាធិប្បាយដែលមើលឃើញចំពោះបង្ហាញថា អូណូដា គឺជាមនុស្សអនុវត្តការគ្រប់គ្រងវិបត្តិកាន់តែប្រសើរ ហើយក៏ជាគំរូសម្រាប់អ្នកនយោបាយផ្សេងទៀតផងដែរ៕ ប្រភព ៖ Daily Mail វីដេអូ ៖ Ozor Ndi Ozor
ចែករំលែកព័តមាននេះ