ខេត្តព្រះសីហនុ ៖ ក្រោយពីរងការវាយទ្រមខ្លួនដោយកំហឹងមហាជន បុរសជនជាតិចិន២នាក់ដែលជាប់ចោទពីបទលួចបានត្រូវនគរបាល កសាងសំណុំរឿងបញ្ជូនទៅកាន់សាលាដំបូងខេត្ត ។ ជនទាំង២នាក់នេះ ម្នាក់ឈ្មោះ Jing Hua Ping អាយុ៣៨ឆ្នាំ មុខរបរមិនពិតប្រាកដ ស្នាក់នៅភូមិ២ សង្កាត់លេខ២ ក្រុងព្រះសីហនុ និងម្នាក់ទៀតឈ្មោះ Tong Jing Ming អាយុ៤៦ឆ្នាំ មុខរបរមិនពិតប្រាកដ ស្នាក់នៅសណ្ឋាគារ ជីងទីង ស្ថិតក្នុងភូមិ២ សង្កាត់លេខ២ ក្រុងព្រះសីហនុ ។
យោងតាមរបាយការណ៍របស់នគរបាលខេត្តឲ្យដឹងថា កាលពីថ្ងៃទី២៨ ខែមេសាកន្លងទៅ វេលាម៉ោង១០និង៣០នាទីព្រឹក នៅម្តុំហាងសំពៅមាស ស្ថិតក្នុងភូមិ១ សង្កាត់លេខ៣ ក្រុងព្រះសីហនុ មានករណីចោរកម្មលួចបើកទ្វាររថ យន្តយកសម្ភារ បង្កឡើងដោយជនជាតិចិន២នាក់ ។ ជនសង្ស័យជិះម៉ូតូ១គ្រឿងម៉ាក អ៊ែរប្លេ៊ត ពណ៌ទឹកប៊ិក គ្មានផ្លាកលេខ បានធ្វើសកម្មភាព លួចបើកទ្វាររថយន្តរបស់ប្រជាពលរដ្ឋដែលចតទុកនៅក្បែរហាងសំពៅមាស ស្ថិតក្នុងសង្កាត់លេខ៣ ក្រុងព្រះសីហនុ ។
ប៉ុន្តែភ្លាមនោះត្រូវម្ចាស់រថយន្តឃើញទាន់ និងស្រែកឆោឡោឡើង ជនសង្ស័យទាំង២នាក់ក៏ព្យាយាមរត់គេចខ្លួន តែត្រូវកម្លាំងនគរបាលព្រហ្មទណ្ឌ និងនគរបាលប៉ុស្តិ៍លេខ៣ឃាត់ខ្លួនបាន ។ បន្ទាប់មក ម្ចាស់រថយន្តដែលមិនស្គាល់អត្តសញ្ញាណក៏បើករថយន្តចេញទៅបាត់ ហើយកម្លាំងសមត្ថកិច្ចក៏បានធ្វើការស្វែងរក ។
ទោះជាយ៉ាងណាក្តី សមត្តកិច្ចបានចាត់ទុកថា អំពើចោរកម្មនេះជាបទល្មើសជាក់ស្តែង ទោះបី សកម្មភាពនោះប្រព្រឹត្តមិនទាន់បានសម្រេចក៏ដោយ ហើយនៅពេលចាប់ខ្លួនជនសង្ស័យបានសារភាពថា ពួកគេធ្លាប់គាស់ទ្វាររថយន្តលួចយកសម្ភារចំនួន២លើកមកហើយ នៅក្នុងក្រុងព្រះសីហនុ ហើយលើកនេះចំថ្ងៃស៊យ បើកុំតែបាននគរបាលអន្តរាគមន៍ទាន់ម្ល៉ោះក្ស័យជីវិត ។
ចែករំលែកព័តមាននេះ