វេទិកា និងពិព័រណ៍កសិកម្មកម្ពុជា ឆ្នាំ ២០២៦ (CAFE26) នឹងតភ្ជាប់ដោយផ្ទាល់ជាមួយអ្នកទិញ អ្នកកែច្នៃ អ្នកនាំចេញ អ្នកលក់រាយ ស្ថាប័នហិរញ្ញវត្ថុ និងដៃគូអាជីវកម្មផ្សេងៗ
- ភ្នំពេញ
រាជធានីភ្នំពេញ ៖ ក្រសួងកសិកម្ម រុក្ខប្រមាញ់ និងនេសាទ រៀបចំសន្និសីទសារព័ត៌មានស្ដីពី វេទិកា និងពិព័រណ៍កសិកម្មកម្ពុជា ឆ្នាំ ២០២៦ (CAFE26) លើកទី ២ ក្រោយទទួលជោគជ័យ និងមានការគាំទ្រយ៉ាងច្រើនកុះករកាលពីឆ្នាំ ២០២៥ ។ វេទិកា និងពិព័រណ៍កសិកម្មកម្ពុជា ឆ្នាំ ២០២៦ (CAFE26) នឹងចាប់ផ្តើមនៅថ្ងៃទី ២៣-២៥ ខែតុលា ឆ្នាំ ២០២៦ ខាងមុខនេះនៅមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ ។
ក្រៅពីការតាំងបង្ហាញផលិតផល ពិព័រណ៍នេះក៏ត្រូវបានរៀបចំឡើងដើម្បីជំរុញការផ្គូផ្គងអាជីវកម្ម ការបង្ហាញ និងសាកល្បងបច្ចេកវិទ្យា ការដាក់បង្ហាញផលិតផលថ្មី ការផ្លាស់ប្តូរចំណេះដឹង និងការផ្សារភ្ជាប់ដោយផ្ទាល់រវាងកសិករ ធុរជន អ្នកទិញ និងវិនិយោគិន ។
ក្នុងសន្និសីទសារព័ត៌មាននៅថ្ងៃទី ០១ ខែ តុលា ឆ្នាំ ២០២៦ លោក ប្រាក់ ដាវីដ រដ្ឋលេខាធិការ ក្រសួងកសិកម្ម រុក្ខប្រមាញ់ និងនេសាទ បានឱ្យដឹងថា ៖ «កម្មវិធីនឹងផ្ដោតលើប្រធានបទជាក់ស្ដែង ដែលមានសារៈសំខាន់សម្រាប់សហគមន៍កសិកម្ម រួមមាន អភិបាលកិច្ច និងការគ្រប់គ្រងអាជីវកម្ម និងហិរញ្ញវត្ថុ ការរៀបចំផែនការផលិតកម្ម លទ្ធភាពទទួលបានហិរញ្ញប្បទាន ការលើកកម្ពស់គុណភាព ការធ្វើទីផ្សាររួមគ្នា ការកែច្នៃ និងបង្កើតតម្លៃបន្ថែម បច្ចេកវិទ្យាឌីជីថល និងកសិកម្មធន់នឹងការប្រែប្រួលអាកាសធាតុ ។ សហគមន៍កសិកម្មក៏នឹងមានឱកាសតភ្ជាប់ដោយផ្ទាល់ជាមួយអ្នកទិញ អ្នកកែច្នៃ អ្នកនាំចេញ អ្នកលក់រាយ ស្ថាប័នហិរញ្ញវត្ថុ និងដៃគូអាជីវកម្មផ្សេងៗ» ។
យោងលើភាពជោគជ័យនៃការរៀបចំលើកទីមួយនៃព្រឹត្តិការណ៍ CAFE 25 វេទិកា និងពិព័រណ៍កសិកម្មកម្ពុជា ឆ្នាំ ២០២៦ នឹងរួមបញ្ចូលវេទិកា នវានុវត្តន៍សម្រាប់យុវជន និងវេទិកាចែករំលែកចំណេះដឹងសម្រាប់សហគមន៍កសិកម្ម ហើយព្រឹត្តិការណ៍នេះរំពឹងថា នឹងមានស្តង់ពិព័រណ៍ជាង ៤០០កន្លែង អ្នកចូលរួមទស្សនាប្រមាណ ២៥ ០០០នាក់ និងកសិករជាង ២ ០០០នាក់ ផងដែរ ។
គួរបញ្ជាក់ផងដែរថា វេទិកា និងពិព័រណ៍កសិកម្មកម្ពុជា គឺជាព្រឹត្តិការណ៍ក្នុងវិស័យកសិស្បៀងអាហារដែលមានទំហំ និងវិសាលភាពធំបំផុតមួយនៅព្រះរាជាណាចក្រកម្ពុជា ។ លក្ខណៈពិសេសរបស់ CAFE គឺការប្រមូលផ្ដុំគ្រប់តួអង្គទាំងអស់ក្នុង ប្រព័ន្ធអេកូឡូស៊ីកសិស្បៀងអាហារទាំងមូលមកជួបជុំគ្នានៅលើថ្នាលតែមួយ ។ CAFE រួមបញ្ចូល កិច្ចសន្ទនាគោលនយោបាយ ការជំរុញវិនិយោគការផ្គូផ្គងអាជីវកម្ម ការបង្ហាញ និងសាកល្បងបច្ចេកវិទ្យា ការផ្លាស់ប្តូរចំណេះដឹង និងពិព័រណ៍កសិកម្មទ្រង់ទ្រាយធំ ដើម្បីឱ្យអ្នកចូលរួមពិភាក្សាអំពីបញ្ហាប្រឈម ឱកាស និងការតភ្ជាប់ទំនាក់ទំនងដោយ ផ្ទាល់ ក៏ដូចជាស្វែងរកដំណោះស្រាយ និងបង្កើតភាពជាដៃគូអាជីវកម្ម និងវិនិយោគជាក់ស្ដែង ។
លោក ប្រាក់ ដាវីដ បន្តថា វិស័យកសិស្បៀងអាហារកម្ពុជាឈានចូលដល់ដំណាក់កាលបរិវត្តកម្មដ៏សំខាន់មួយ ។ ការនាំចេញកសិផលសំខាន់ៗ ដូចជាស្រូវអង្ករ ស្វាយចន្ទី ស្វាយ ដំឡូងមី និងកៅស៊ូ បន្តកើនឡើងទៅកាន់ទីផ្សារតំបន់ និងសកល ។ ទោះជាយ៉ាងណាក៏ដោយផលិតផលភាគច្រើនត្រូវបាននាំចេញក្នុងទម្រង់ជាវត្ថុធាតុដើម ដោយសារសមត្ថភាពកែច្នៃកសិផលក្នុងស្រុក និងការវិនិយោគដើម្បីបង្កើនតម្លៃបន្ថែមនៅមានកម្រិត ។ កម្ពុជាក៏កំពុងពង្រឹងខ្លួនដើម្បីប្រែក្លាយពីការនាំចេញផលិតផលកសិកម្មជាវត្ថុធាតុដើមទៅការនាំចេញផលិតផលកែច្នៃ និងពង្រឹងសមត្ថភាពកែច្នៃក្នុងស្រុកដើម្បីបង្កើនតម្លៃបន្ថែម ។ ការណ៍នេះបង្កើនឱកាសវិនិយោគសម្រាប់ការកែច្នៃ ការស្តុកទំនិញ ភស្តុភារ បច្ចេកវិទ្យាកសិកម្ម ការវេចខ្ចប់ និងការកែច្នៃសម្រាប់នាំចេញ ។
លោក ប្រាក់ ដាវីដ ក៏បានលើកទឹកចិត្តដល់ស្ថាប័នសារព័ត៌មាន និងអ្នកសារព័ត៌មាន ចូលរួមផ្សព្វផ្សាយឱ្យបានទូលំទូលាយអំពី ព្រឹត្តិការណ៍ – CAFE26 បទពិសោធន៍ដែលអ្នកចូលរួមនឹងអាចទទួលបាន និងឱកាសនានាសម្រាប់កសិករ ធុរជន វិនិយោគិន សហគមន៍កសិកម្ម យុវជន និងសាធារណជនទូទៅ ។
សូមជម្រាបជូនផងដែរថា វេទិកានិងពិព័រណ៍កសិកម្មកម្ពុជា ដឹកនាំរៀបចំដោយក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមសហការពីក្រសួង ស្ថាប័នពាក់ព័ន្ធ អង្គការស្បៀង និងកសិកម្មនៃសហប្រជាជាតិ (FAO) ដៃគូអភិវឌ្ឍន៍ និងវិស័យឯកជននានា ហើយនៅក្នុងព្រឹត្តិការណ៍នេះផងដែរក៏នឹងមានវត្តមានពីថ្នាក់ដឹកនាំរាជរដ្ឋាភិបាល កសិករ និងសហគមន៍កសិកម្ម ធុរជន វិនិយោគិនជាតិ និងអន្តរជាតិ ស្ថាប័នហិរញ្ញវត្ថុ អ្នកនវានុវត្តន៍ យុវជន ដៃគូអភិវឌ្ឍន៍ និងតួអង្គពាក់ព័ន្ធនានា ទាំងក្នុង និងក្រៅប្រទេស ៕
ចែករំលែកព័តមាននេះ