គាស់ទូលួ.ចទ្រព្យសម្បត្តិបាន១ថ្ងៃ ត្រូវអស់លក្ខណ៍២នាក់
- កំពង់ស្ពឺ
ខេត្តកំពង់ស្ពឺ៖ ជនសង្ស័យចំនួន២នាក់ ត្រូវបានកម្លាំងនគរបាលស្រុកភ្នំស្រួចស្រាវជ្រាវឃាត់ខ្លួនបាន ខណៈដែលក្រុមជនសង្ស័យបានធ្វើសកម្មភាពគាស់ទូនៅលើផ្ទះប្រជាពលរដ្ឋ យកទ្រព្យសម្បត្តិ លុយកាក់និងសម្ភារៈជាច្រើន រត់គេចខ្លួនបានមួយថ្ងៃ ម្ចាស់ផ្ទះដាក់ពាក្យបណ្តឹងឱ្យសមត្ថកិច្ចជួយអន្តរាគមន៍ឃាត់ខ្លួនបាន។
ការស្រាវជ្រាវឃាត់ខ្លួនជនសង្ស័យចំនួន២នាក់ ពាក់ព័ន្ធករណីលួចមានស្ថានទម្ងន់ទោស(គាស់ទូលួចទ្រព្យសម្បត្តិ) ធ្វើឡើងកាលពីវេលាម៉ោង១២និង២០នាទីថ្ងៃត្រង់ថ្ងៃទី៣០ ខែកញ្ញា ឆ្នាំ២០២៦ នៅចំណុចក្នុងភូមិព្រៃស្រោង ឃុំអូរ ស្រុកភ្នំស្រួច ខេត្តកំពង់ស្ពឺ។
លោកវរសេនីយ៍ទោ ជុន ចន្ទដេត អធិការនគរបាលស្រុកភ្នំស្រួចបាននិយាយឱ្យដឹងថា ជនសង្ស័យដែលឃាត់ខ្លួនបានមានឈ្មោះទី១- ឈ្មោះ អ៉ីម សុភ័ក្រ ហៅ ម៉ូញ ភេទប្រុស អាយុ១៧ឆ្នាំ មុខរបរមិនពិតប្រាកដ រស់នៅក្នុងភូមិរំដួល៨៨ ឃុំអូរ ស្រុកភ្នំស្រួច ខេត្តកំពង់ស្ពឺ និងទី២- ឈ្មោះ ចាន់ លាភសំណាង ភេទប្រុស អាយុ១៦ឆ្នាំ មុខរបរមិនពិតប្រាកដ រស់នៅក្នុងភូមិព្រៃស្រោង ឃុំអូរ ស្រុកភ្នំស្រួច ខេត្តកំពង់ស្ពឺ។
លោកវរសេនីយ៍ទោ ជុន ចន្ទដេត អធិការនគរបាលស្រុកភ្នំស្រួចបានបន្តឱ្យដឹងទៀតថា នៅមុនពេលឃាត់ខ្លួនក្រុមជនសង្ស័យខាងលើ គឺនៅវេលាម៉ោង៩និង៣០នាទីព្រឹកថ្ងៃទី២៩ ខែកញ្ញា ឆ្នាំ២០២៦ នគរបាលប៉ុស្ដិ៍ឃុំអូរបានទទួលពាក្យបណ្ដឹងពីឈ្មោះ សឿង ស្រីម៉ុម ភេទស្រី អាយុ៤៤ឆ្នាំ រស់នៅក្នុងភូមិរំដួល៨៨ ឃុំអូរ ស្រុកភ្នំស្រួច បានប្ដឹងជនមិនស្គាល់អត្តសញ្ញាណ មិនដឹងចំនួន ដែលបានធ្វើសកម្មភាពគាស់ទូលួច ទ្រព្យសម្បត្តិ(លុយ និងទូរស័ព្ទ ព្រមទាំងសម្ភារៈ)។ ស្ត្រីខាងលើបានរៀបរាប់ថា នៅប្រហែលម៉ោង៣ទៀបភ្លឺឈាន ចូលថ្ងៃទី២៩ ខែកញ្ញា ឆ្នាំ២០២៦ នៅចំណុចផ្ទះរបស់គាត់ស្ថិតនៅភូមិរំដួល៨៨ ឃុំអូរ មានជនមិនស្គាល់អត្តសញ្ញាណមិនដឹងចំនួនបានធ្វើសកម្មភាពគាស់ទ្វារទូលួចលុយអស់ចំនួន២.០០០.០០០រៀល (ពីរលានរៀលគត់) នៅពេលគាត់មិននៅផ្ទះហើយទុកឱ្យកូនស្រីក្មេងៗចំនួន២នាក់នៅចាំផ្ទះ ដេកលក់អស់។
លោកវរសេនីយ៍ទោ ជុន ចន្ទដេត អធិការនគរបាលស្រុកភ្នំស្រួចបាន បន្ថែមឱ្យដឹងទៀតថា ក្រោយពីទទួលបានពាក្យបណ្តឹងពីប្រជាពលរដ្ឋម្ចាស់ផ្ទះរួចមក តាមការស្រាវជ្រាវនៅវេលាម៉ោង ១២និង២០នាទី ថ្ងៃត្រង់ថ្ងៃទី៣០ ខែកញ្ញា ឆ្នាំ២០២៦ កម្លាំងនគរបាលជំនាញព្រហ្មទណ្ឌស្រុកភ្នំស្រួច បានសហការជាមួយនគរបាលប៉ុស្ដិ៍ឃុំអូរ ក៏បានធ្វើការឃាត់ខ្លួនជនសង្ស័យ ជាមុខសញ្ញាចំនួន២នាក់ នៅចំណុចភូមិព្រៃស្រោង ឃុំអូរ ស្រុកភ្នំស្រួច ខេត្តកំពង់ស្ពឺ។
ក្រោយឃាត់ខ្លួន នគរបាលបានធ្វើការសាកសួរ ជនសង្ស័យទាំង២នាក់បានឆ្លើយសារភាពថា ពួកខ្លួនពិតជាបានធ្វើសកម្មភាពឡើងតាមដំបូលវ៉េរ៉ង់ដា ចូលទៅលើផ្ទះប្រជាពលរដ្ឋយកកូនសោ ដែកគាស់ និងដែកទីប គាស់ទូរយកលុយបានមួយចំនួន រួមទាំងទូរស័ព្ទ ពិតប្រាកដមែន។
ក្រោយធ្វើការឃាត់ខ្លួនជនសង្ស័យបាន នគរបាលបានធ្វើការដកហូតវត្ថុតាងរួមមាន ៖
១-កូនសោរចំនួន២គ្រាប់
២-ដែកទីបមូលប្រហោង១ដើម ៣-ដែកគាស់តូច១ដើម ៤-ទូរស័ព្ទIPhoneX ពណ៌ស១គ្រឿង
៥-ប្រាក់ចំនួន ៤៥០,០០០ (បួនសែនប្រាំម៉ឺន)រៀល និងបានប្រគល់ជូនម្ចាស់(ជនរងគ្រោះ)វិញហើយ។
បច្ចុប្បន្ន ក្រុមជនសង្ស័យរួមជាមួយនឹងវត្ថុតាង ត្រូវបាននគរបាលស្រុកភ្នំស្រួចកសាងសំណុំរឿងបញ្ជនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ