សង្គ្រាមអ៉ីរ៉ង់ ៖ បណ្ដាអ្នកទទួលខុសត្រូវអ៉ីរ៉ងគូសបញ្ជាក់ កាលពីថ្ងៃទី៣០ កញ្ញា ថា បានទទួលចម្លើយជាផ្លូវការរបស់អាមេរិកហើយ ចំពោះសំណើចុងក្រោយរបស់អ៉ីរ៉ង់ សំដៅបញ្ចប់សង្គ្រាមដែលមានរយៈពេល៧ខែមកហើយ ។ សំណើនោះ ធ្លាប់ត្រូវបានប្រធានាធិបតីអាមេរិក លោកដូណាល់ត្រាំ បដិសេធជាសាធារណៈរួចហើយកាលពីប៉ុន្មានថ្ងៃមុននេះ ។
អ្នកទទួលខុសត្រូវអ៉ីរ៉ង់ទាំងនោះ មិនបានបញ្ជាក់ពីខ្លឹមសារនៃចម្លើយនោះទេ ។ រដ្ឋមន្ត្រីការបរទេសអ៉ីរ៉ង់ លោកអាប់បាស់ អារ៉ាសជី បានយកចម្លើយតបនោះរបស់អាមេរិកជូនដល់ប្រធានាធិបតីលោកម៉ាស៊ូដប៉េហ្សេស្គីយ៉ាន់ ក្នុងឱកាសនៃកិច្ចប្រជុំមួយរបស់គណៈរដ្ឋមន្ត្រី។ ប្រធានាធិបតីអ៉ីរ៉ង់ថ្លែងថា យើងនឹងធ្វើអ្វីសព្វយ៉ាង ដើម្បីឲ្យកិច្ចព្រមព្រៀងនោះសម្រេចបាន ហើយយើងនឹងការពារម៉ឺងម៉ាត់សិទ្ធិរបស់ប្រជាជនអ៉ីរ៉ង់ ។ កិច្ចព្រមព្រៀងនោះ ចាប់ពីពេលនេះទៅ គឹផ្អែកលើយុទ្ធសាស្ត្រឈ្នះ-ឈ្នះ។
កិច្ចប្រជុំគណៈរដ្ឋមន្ត្រីអ៉ីរ៉ង់នោះធ្វើឡើង បន្ទាប់ពីការវិលត្រឡប់របស់លោកអារ៉ាសជី មកកាន់អ៉ីរ៉ង់វិញ ក្រោយពីលោកធ្វើដំណើរទៅកាន់ក្រុងញូវយ៉កចូលរួមក្នុងមហាសន្និបាតអ.ស.បកាលពីសប្ដាហ៍មុន ។ នៅទីនោះរូបលោក និងបណ្ដាអ្នកទទួលខុសត្រូវអ៉ីរ៉ង់ បានពិភាក្សាគ្នាដោយប្រយោលជាមួយបណ្ដាតំណាងអាមេរិក ហើយក៏ជួបផងដែរអ្នកអាជ្ញាកណ្ដាលកាតា និង
ប៉ាគីស្ថានខាងក្រៅមហាសន្និសន្និបាតប្រចាំឆ្នាំរបស់អ.ស.ប ដែលមានការចូលរួមរបស់បណ្ដាមេដឹកនាំពិភពលោក ។ លោកអារ៉ាសជី បានរាយការណ៍ក្នុងកិច្ចប្រជុំនោះ ពីដំណើរទៅកាន់ក្រុងញូវយ៉ករបស់លោក និងពីបណ្ដាការជួបគ្នាពិភាក្សាដែលលោកបានធ្វើនៅទីនោះ ពិសេសពីបណ្ដាលក្ខខណ្ឌដែលអ៉ីរ៉ង់បានដាក់ សម្រាប់ការបើកច្រកសមុទ្រហ័រមូសឡើងវិញ ដែលលក្ខខណ្ឌទាំងនោះបញ្ជូ្ជនដល់អាមេរិកតាមរយៈអាជ្ញាកណ្ដាល ។
រដ្ឋមន្ត្រីការបរទេសអ៉ីរ៉ង់ធ្លាប់គូសបញ្ជាក់កាលពីសប្ដាហ៍មុនថា អ៉ីរ៉ង់ស្នើបើកច្រកសមុទ្រហ័រមូសឡើងវិញ៧ថ្ងៃ បន្ទាប់ពីប្រសិនបើអាមេរិក ព្រមទទួលយកលក្ខខណ្ឌទាំងនោះ ដែលក៏មានការទាមទារផងដែរ ឲ្យអាមេរិកលុបចោលការហ៊ុមព័ទ្ធកំពង់ផែអ៉ីរ៉ង់ ប្រគល់ឲ្យអ៉ីរ៉ង់វិញ បណ្ដាទ្រព្យសម្បត្តិខ្លួនដែលបង្កក និងលុបចោលបណ្ដាទណ្ឌកម្មលើការលក់ប្រេងអ៉ីរ៉ង់ ៕
ចែករំលែកព័តមាននេះ