រដ្ឋបាលខេត្តកំពង់ស្ពឺណែនាំម្ចាស់អាជីវកម្ម និងមណ្ឌលកម្សាន្តទាំងអស់ កុំឱ្យបង្កសំឡេងរំខានប៉ះពាល់ដល់ការរស់នៅរបស់ប្រជាពលរដ្ឋ
- កំពង់ស្ពឺ
ខេត្តកំពង់ស្ពឺ ៖ រដ្ឋបាលខេត្តកំពង់ស្ពឺ ចេញសេចក្តីណែនាំដល់ម្ចាស់អាជីវកម្ម និងមណ្ឌលកំសាន្តនានា កាត់បន្ថយការរំខានដោយសារសំឡេងនាំឱ្យប៉ះពាល់ដល់សុវត្ថិភាព សន្តិសុខ សណ្តាប់ធ្នាប់សាធារណៈ និងការរស់នៅរបស់ប្រជាពលរដ្ឋក្នុងភូមិសាស្ត្រខេត្តកំពង់ស្ពឺ ។ នេះបើយោងតាមការចេញសេចក្តីប្រកាសរបស់រដ្ឋបាលខេត្តកំពង់ស្ពឺ ចុះថ្ងៃទី៣០ ខែកញ្ញា ឆ្នាំ២០២៦ ។
រដ្ឋបាលខេត្តកំពង់ស្ពឺ សូមជម្រាបជូនម្ចាស់អាជីវកម្មភោជនីយដ្ឋាន អាហារដ្ឋាន រង្គសាល ខារ៉ាអូខេ និងមណ្ឌលកំសាន្តទាំងអស់ជ្រាបថា ដើម្បីពង្រឹងការគ្រប់គ្រង កាត់បន្ថយការរំខានដោយសារសំឡេងនាំឱ្យប៉ះពាល់ដល់សុវត្ថិភាព សន្តិសុខ សណ្តាប់ធ្នាប់សាធារណៈ និងការរស់នៅរបស់ប្រជាពលរដ្ឋ រដ្ឋបាលខេត្តសូមធ្វើការណែនាំដល់ម្ចាស់អាជីវកម្មភោជ នីយដ្ឋាន អាហារដ្ឋាន រង្គសាល ខារ៉ាអូខេ និងមណ្ឌលកម្សាន្តទាំងអស់ ត្រូវយកចិត្តទុកដាក់អនុវត្តតាមគោលការណ៍ណែនាំឱ្យបានម៉ឺងម៉ាត់ដូចខាងក្រោម៖
១-ត្រូវគ្រប់គ្រងការប្រើប្រាស់ឧបករណ៍បំពងសំឡេងឱ្យបានសមស្រប មិនបង្កសំឡេងរំខាន ឬមានផល ប៉ះពាល់ដល់ការរស់នៅ និងការសម្រាករបស់ប្រជាពលរដ្ឋ ដែលរស់នៅជិតខាង។
២-ត្រូវរៀបចំ និងគ្រប់គ្រងចំណតទោចក្រយានយន្ត និងយានយន្តគ្រប់ប្រភេទឱ្យមាន
សណ្តាប់ធ្នាប់ មិនត្រូវបង្កការកកស្ទះ រាំងស្ទះចរាចរណ៍ ឬរាំងស្ទះច្រកចេញ-ចូល របស់ប្រជាពលរដ្ឋ។
៣-ត្រូវយកចិត្តទុកដាក់រក្សាសន្តិសុខ សុវត្ថិភាព និងសណ្តាប់ធ្នាប់ ទាំងក្នុង និងជុំវិញ
ទីតាំងអាជីវកម្ម ព្រមទាំងទទួលខុសត្រូវចំពោះសកម្មភាពរបស់បុគ្គលិក និងអតិថិជនដែលអាចបង្កផលប៉ះពាល់ដល់សណ្តាប់ធ្នាប់សាធារណៈ ។
៤-ត្រូវប្រកបអាជីវកម្មដោយគោរពសិទ្ធិ និងផលប្រយោជន៍ស្របច្បាប់របស់ប្រជាពលរដ្ឋនៅជិតខាង មិនត្រូវបង្កការរំខាន ឬផលប៉ះពាល់ដល់ការរស់នៅរបស់ប្រជាពលរដ្ឋដោយប្រការណាមួយ។
៥-ករណីមានការតវ៉ា ឬការជូនដំណឹងពីប្រជាពលរដ្ឋ និងអាជ្ញាធរមូលដ្ឋាន ពាក់ព័ន្ធនឹងសំឡេងរំខាន ចំណតយានយន្ត បញ្ហាសុវត្ថិភាព សន្តិសុខ សណ្តាប់ធ្នាប់សាធារណៈ ត្រូវមានវិធានការដោះស្រាយជាបន្ទាន់ និងមានប្រសិទ្ធភាព ព្រមទាំងរាយការណ៍មកអាជ្ញាធរមានសមត្ថកិច្ច ។
៦-ត្រូវគោរព និងអនុវត្តតាមច្បាប់ លិខិតបទដ្ឋានគតិយុត្ត និងបទប្បញ្ញតិពាក់ព័ន្ធនានា។ ក្នុងករណី អាជីវកម្មណាមិនអនុវត្តតាមការណែនាំ ប្រព្រឹត្តល្មើស ឬបង្កផលប៉ះពាល់ដល់សុវត្ថិភាព សន្តិសុខ សណ្តាប់ធ្នាប់សាធារណៈ និងការរស់នៅរបស់ប្រជាពលរដ្ឋ រដ្ឋបាលខេត្ត និងអាជ្ញាធរមានសមត្ថកិច្ច នឹងចាត់វិធានការច្បាប់តាមនីតិវិធីជាធរមាន ។
អាស្រ័យហេតុនេះ សូមម្ចាស់អាជីវកម្មភោជនីយដ្ឋាន អាហារដ្ឋាន រង្គសាល ខារ៉ាអូខេ និងមណ្ឌលកំសាន្ត, ទាំងអស់ជ្រាប និងចូលរួមអនុវត្តសេចក្តីណែនាំនេះឱ្យមានប្រសិទ្ធភាពខ្ពស់ ចាប់ពីថ្ងៃចុះហត្ថលេខានេះតទៅ៕
ចែករំលែកព័តមាននេះ