រាជធានីភ្នំពេញ ៖ ទីបំផុត មន្ត្រីនគរបាលក្រសួងមហាផ្ទៃដែលបានបាញ់ជាច្រើនគ្រាប់ ទៅលើរថយន្ដ២នាក់ប្តីប្រពន្ធ បានត្រូវជនរងគ្រោះទាមទារសំណងចំនួន៣៥.០០០ដុល្លារ ហើយប្រគល់រថយន្តខូចខាតនោះឱ្យជនបង្កតែម្តង ប៉ុន្តែបណ្ដឹងព្រហ្មទណ្ឌនៅដដែល ។ លោក ភូរិស្ស ស្តូរ៉ាន់ ដែលជាជនរងគ្រោះបានប្រាប់បណ្ដាញព័ត៌មានក្នុងស្រុកមួយ កាលពីរសៀលថ្ងៃទី២ ខែឧសភាថា បើទោះបីគាត់ទាមទារសំណងចំនួន៣៥.០០០ដុល្លារក៏ពិតមែន ប៉ុន្ដែពាក្យបណ្ដឹងព្រហ្មទណ្ឌដែលប្ដឹងពីបទប៉ុនប៉ងមនុស្សឃាត ដោយចេតនានោះ គឺនៅរក្សាដដែល ។ ជនរងគ្រោះបានបញ្ជាក់ថា«នៅពេលនេះ ខ្ញុំបានដាក់ពាក្យបណ្ដឹងទាមទារសំណងជំងឺចិត្ត និងការខូចខាតចំនួន៣៥.០០០ដុល្លារ ហើយប្រគល់រថយន្តរបស់ខ្ញុំទៅឲ្យគាត់(ជនបង្ក) ខ្ញុំយកតែលុយដែលទាមទារប៉ុណ្ណោះ ។ ប៉ុន្ដែឥឡូវខ្ញុំមិនទាន់បានទទួលដំណឹងអ្វីត្រឡប់មកវិញទេ ហើយពាក្យបណ្ដឹងព្រហ្មទណ្ឌគឺខ្ញុំនៅរក្សាដដែលអត់ដកទេ» ។ គួររំលឹកថា ៖ ចាំមើល៍ចំណាត់ការបន្ត… លើប៉ូលិសក្រសួងមហាផ្ទៃម្នាក់បាញ់ឡាន៥គ្រាប់នេះ
គួរបញ្ជាក់ថា នាយឧត្តមសេនីយ៍ នេត សាវឿន បញ្ជាឲ្យចាត់ការតាមវិន័យកងកម្លាំង លើអនុប្រធាននាយកដ្ឋានព្រហ្មទណ្ឌដែលបាញ់ក្រោយផ្ទុះបាតុភាពដេញបាញ់ផ្អើលកណ្តាលយប់ពីសំណាក់មន្ត្រីនគរបាលម្នាក់នេះលោកនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានដាក់បទបញ្ជាឲ្យចាត់ការតាមវិន័យកងកម្លាំងយ៉ាងម៉ឺងម៉ាត់ទៅលើអនុប្រធាននាយកដ្ឋានព្រហ្មទណ្ឌ លោកសក្តិ៤កន្លះ ដួង ណាគ្រី ដែលស្រវឹងស្រា ហើយបើករថយន្តដេញតាមរករឿង រហូតបាញ់ទៅលើរថយន្តអ្នកដ៏ទៃដែលជិះ២នាក់ប្តី-ប្រពន្ធចំនួន៥គ្រាប់ នៅក្បែរអធិការដ្ឋាននគរបាលខណ្ឌច្បារអំពៅ ។ នេះបើតាមលោកឧត្តមសេនីយ៍ផ្កាយ៣ ស ថេត ស្នងការនគរបាលរាជធានីភ្នំពេញ បានប្រាប់ឱ្យដឹងនៅព្រឹកថ្ងៃទី២ ឧសភា ។
ជាមួយគ្នានេះ នាយឧត្តមសេនីយ៍អគ្គស្នងការនគរបាលជាតិ ក៏បានឲ្យធ្វើការសម្របសម្រួលជាមួយភាគីជនរងគ្រោះ ចំពោះករណីនេះ ។ ស្នងការនគរបាលរាជធានីភ្នំពេញ ឧត្តមសេនីយ៍ផ្កាយ៣ ស ថេត ត្រូវបានដកស្រង់ប្រសាសន៍ដោយ Fres News បានបញ្ជាក់ថា «ចំពោះករណីនេះមេ (នាយឧត្តមសេនីយ៍ នេត សាវឿន) បានបញ្ជាឲ្យចាត់ការតាមវិន័យកងកម្លាំង និងធ្វើការសម្របសម្រួលជាមួយជនរងគ្រោះ» ។
បើតាមប្រភពព័ត៌មានឱ្យដឹងថា នៅពេលនេះអនុប្រធាននាយកដ្ឋានព្រហ្មទណ្ឌ ដែលបង្កបទល្មើសគួរឱ្យថ្កោលទោសត្រូវបានបញ្ជូនខ្លួនពីអធិការដ្ឋាននគរបាលខណ្ឌច្បារអំពៅ មកកាន់អង្គភាពតម្រួតបទបញ្ជា ដើម្បីចាត់ការតាមនីតិវិធី ។
ជុំវិញករណីនេះត្រូវបានមជ្ឈដ្ឋាននានាថា សំណុំរឿងនេះវាហួសពីការទទួលវិន័យកងកម្លាំងទៅហើយ ទោះបីការបាញ់បោះនោះមិនបានបង្កឱ្យមានអ្នកស្លាប់ក្តី តែការប្រើអាវុធបាញ់ទៅលើអ្នកដ៏ទៃបែបនេះជាការប្រមាថជីវិតមនុស្សត្រូវតែនាំខ្លួនឡើងតុលាការទើបត្រឹមត្រូវតាមច្បាប់។
ចែករំលែកព័តមាននេះ