តាមប្រភពព័ត៌មាន Goal បានឱ្យដឹងថា កីឡាករជើងខ្លាំងប្រចាំក្លិបអ្នកមានបារាំង Neymar Jr. ត្រូវបានគេរិះគន់យ៉ាងខ្លាំងក្លា ក្រោយពីដាល់អ្នកគាំទ្រម្នាក់បែកមាត់ និងហូរឈាមច្រមុះ ។ ក្នុងការប្រកួតដណ្តើមពាន French Cup កាលពីថ្ងៃសៅរ៍ រវាង PSG និងStade Rennais ក្រុមខាង Neymar បានចាញ់ការប្រកួតដែលបានធ្វើឱ្យកីឡាកររូបនេះមានការខឹងក្នុងចិត្តយ៉ាងខ្លាំង ។ ពេលនោះ Neymar បានដើរកាត់ក្រុមអ្នកទស្សនា ហើយនិយាយគ្នាជាមួយនឹងបុរសម្នាក់មួយសន្ទុះមុនពេលដាល់មួយដៃចាំមាត់ ហើយដើរចេញទៅ ។
តាមព័ត៌មាន AFP បានឱ្យដឹងថា នេះមកពី Neymar ត្រូវបានឌឺដងដោយបុរសម្នាក់នោះថា ជាកីឡាករមិនអាចជួយក្រុមបាន និងប្រាប់ឱ្យទៅលេងបាល់ម្តងទៀតឱ្យស្ទាត់ ។ ក្រោយពីបានដាល់រួចហើយមតិអ្នករិះគន់ជាច្រើនបានជះមកលើ Neymar ថាមិនសាកសម ។
Neymar បានសារភាពកំហុសរបស់ខ្លួនថា គ្មាននរណាអាចនៅដដែលៗបានទេ ។ ប្រធានគ្រូបង្វឹកលោក Thomas Tuchel បាននិយាយកាលពីថ្ងៃចន្ទថា «វាពិតជាមិនអាចធ្វើបែបនេះបានទេ ។ វាពិតជាពិបាកនឹងទទួលណាស់ ក្រោយពេលចាញ់ការប្រកួត ។ វាពិតជាពិបាកសម្រាប់ខ្ញុំ និងសម្រាប់អ្នកទាំងអស់គ្នា ។ យើងត្រូវតែទទួលយកលទ្ធផល ។ ប្រសិនបើយើងចាញ់យើងត្រូវបង្ហាញការគោរពខ្លះ ។ យើងមិនត្រូវបង្កជម្លោះដល់អ្នកទស្សនាបែបនេះទេ។»
Neymar នឹងត្រូវទៅស្តាប់ការសម្រេចរបស់ក្រុមវិន័យ FFF នៅថ្ងៃពុធនេះហើយ ដើម្បីដឹងថា នឹងត្រូវទទួលការពិន័យកម្រិតណា ។ គេនៅមិនទាន់សម្រេចជាផ្លូវការនៅឡើយទេ តែគេដឹងថាអាចនឹងត្រូវហាមមិនឱ្យចូលប្រកួត៥ដងសម្រាប់ការដាល់អ្នកទស្សនាថ្ងៃមុន ៕
ចែករំលែកព័តមាននេះ