ប្រទេសអេហ្ស៊ីប ៖ គ្រូបង្វឹកក្រុមបាល់ទាត់ជម្រើសជាតិអេហ្ស៊ីប លោក Hossam Hassan ត្រូវបានរាយការណ៍ថា សន្លប់បាត់បង់ស្មារតីដោយសារតានតឹងអារម្មណ៍ខ្លាំង បន្ទាប់ពីបានឃើញប្រពន្ធទាំងពីរនាក់របស់លោកឈ្លោះប្រកែកវាយបោចសក់គ្នានៅក្នុងបារមួយកន្លែង មុនពេលលោកសម្រេចចិត្តដាក់ពាក្យសុំលែងលះជាផ្លូវការជាមួយប្រពន្ធដើម។ នេះបើយោងតាមកាសែត The Sun ចេញផ្សាយកាលពីថ្ងៃទី១៨ ខែសីហា ឆ្នាំ២០២៦។
ហេតុការណ៍ឈ្លោះប្រកែកវាយបោចសក់គ្នានេះ បានកើតឡើងក្នុងបារលំដាប់មួយ នៃរមណីយដ្ឋាន Porto Marina ក្នុងទីក្រុង El Alamein ប្រទេសអេហ្ស៊ីប ដែលជាកន្លែងលោក Hossam កំពុងសម្រាកលំហែកាយវិស្សមកាលរដូវក្តៅ។ ប្រភពពីក្នុងស្រុកបានឱ្យដឹងថា ជម្លោះរវាងប្រពន្ធដើម អ្នកស្រី Howaida El Gharbawy និងប្រពន្ធទី ២ អ្នកស្រី Dina Mustafa បានរាលដាលឈានទៅដល់ការវាយតប់ចាប់បោចសក់គ្នាទៅវិញទៅមកនៅចំពោះមុខភ្ញៀវទេសចរជាច្រើននាក់។
ភ្លាមៗនោះ សាច់ញាតិទាំងសងខាងបានចូលទៅជួយបំបែក មុនពេលកម្លាំងសន្តិសុខត្រូវបានហៅឱ្យមកដល់កន្លែងផ្ទុះជម្លោះ។ អ្នកទាំងពីរត្រូវបានរាយការណ៍ថា រងរបួស មានស្នាមឆ្កូត និងជាំជាច្រើនកន្លែងរៀងខ្លួន។ យោងតាមកាសែតអេហ្ស៊ីប Al Arabiya បានឱ្យដឹងថា លោក Hassan តក់ស្លុតខ្លាំងរហូតដល់សន្លប់ បន្ទាប់ពីព្យាយាមចូលទៅឃាត់ប្រពន្ធទាំងពីររបស់លោក។
នៅក្នុងពេលបន្ទាប់មក ក៏មានព័ត៌មានលេចឮថា គ្រូបង្វឹកក្រុមជម្រើសជាតិអេហ្ស៊ីបវ័យ៦០ឆ្នាំរូបនេះ ដែលទើបចប់ភារកិច្ច World Cup ឆ្នាំ ២០២៦ នោះ បានលែងលះជាមួយប្រពន្ធដើម ដោយលោកបានចុះហត្ថលេខាលើឯកសារលែងលះផ្លូវការនៅឯការិយាល័យចុះបញ្ជីច្បាប់មួយក្នុងទីក្រុង Cairo។
លោកបានរួមរស់ជាមួយប្រពន្ធដើមអស់ពេលរាប់សិបឆ្នាំមកហើយ មុនពេលសម្រេចចិត្តបែកបាក់គ្នាភា្លមៗបែបនេះ ដោយបន្សល់ទុកចំណងដៃកូន ៣ នាក់ជាមួយគ្នា។ ចំណែកប្រពន្ធទី២ លោកបានរៀបការជាមួយគ្នាកាលពីឆ្នាំ ២០១៥ ក្នុងពេលលោកនៅតែមានចំណងអាពាហ៍ពិពាហ៍ជាមួយប្រពន្ធដើមនៅឡើយ ដោយគ្រាន់តែបែកបាក់គ្នាមួយរយៈពេលខ្លីក្នុងឆ្នាំ ២០២២ មុនពេលផ្សះផ្សាគ្នាវិញ ហើយលោកមានកូន២នាក់ជាមួយប្រពន្ធទី២។
គួរបញ្ជាក់ថា ស្ថិតក្រោមច្បាប់របស់ប្រទេសអេហ្ស៊ីប បុរសកាន់សាសនាអ៊ិស្លាមត្រូវបានអនុញ្ញាតតាមផ្លូវច្បាប់ឱ្យមានប្រពន្ធរហូតដល់៤នាក់ក្នុងពេលតែមួយ។ មន្ត្រីចុះបញ្ជីមានកាតព្វកិច្ចតាមផ្លូវច្បាប់ជូនដំណឹងដល់ប្រពន្ធដើម ឬភរិយាបន្តបន្ទាប់អំពីពិធីអាពាហ៍ពិពាហ៍ថ្មី តាមរយៈសេចក្តីជូនដំណឹងជាផ្លូវការ៕
ចែករំលែកព័តមាននេះ