ប្រទេសចិន ៖ កញ្ញា វ៉ាង ស៊ីនួ (Wang Sinuo) បាននិងកំពុងទាក់ទាញចំណាប់អារម្មណ៍សម្រាប់ប្រព័ន្ធផ្សព្វផ្សាយ និងនៅលើបណ្តាញទំនាក់ទំនងសង្គមចិន តាមរយៈរូបសម្រស់ដ៏ស្រស់សោភា និងម៉ឺងម៉ាត់របស់នាង។ ប៉ុន្តែជាមួយគ្នានោះ សមិទ្ធផលរបស់នាងក្នុងឆ្នាំ ២០២៦ បានបង្ហាញថា កីឡាការិនីប៊ីយ៉ា (Billiards) ជនជាតិចិនវ័យត្រឹម១៩ឆ្នាំរូបនេះ មិនមែនល្បីត្រឹមតែរូបសម្រស់ប៉ុណ្ណោះទេ តែសមត្ថភាព និងស្នាដៃពិតប្រាកដនៃអាជីពរបស់នាង ក៏មិនត្រូវបានមើលរំលងផងដែរ។
កីឡាការិនី វ៉ាង ស៊ីនួ បច្ចុប្បន្នគឺជាមុខមាត់ថ្មី ដែលមកជាមួយការរំពឹងទុកខ្ពស់សម្រាប់វិស័យកីឡាប៊ីយ៉ាចិន។ កើតក្នុងឆ្នាំ ២០០៧ នៅទីក្រុងហ៊ូលូដាវ (Huludao) ខេត្តលាវនីង (Liaoning) ស៊ីនួ មានកម្ពស់ប្រហែល ១,៧៧ ម៉ែត្រ ទម្រង់មុខស្រស់ស្អាតមានមន្តស្នេហ៍ រំលេចជាមួយស្ទីលបែបយុវវ័យ ដែលបានទាក់ទាញអ្នកតាមដានយ៉ាងច្រើនលើបណ្តាញសង្គមចិន រហូតដល់ថ្នាក់អ្នកគាំទ្រចិនប្រៀបធៀបនាងជាមួយតារាសម្តែងស្រីល្បីចិន Dilraba Dilmurat ទៀតផង។ បើទោះជាភាគច្រើនកំពុងចាប់អារម្មណ៍លើរូបសម្រស់នាងក៏ពិតមែន ប៉ុន្តែកីឡាការិនីវ័យក្មេងរូបនេះ កំពុងតែបង្កើតស្នាដៃផ្ទាល់ខ្លួនបណ្តើរៗតាមរយៈសមិទ្ធផលអាជីព ដែលមិនមែនពឹងផ្អែកតែលើរូបភាពខាងក្រៅរបស់នាងនោះទេ។
ស៊ីនួ បានស្គាល់ និងស៊ាំជាមួយប៊ីយ៉ាតាំងពីតូច ដោយសារជីតាខាងម្តាយធ្លាប់បើកក្លិបប៊ីយ៉ា។ នាងបានចាប់ផ្តើមហ្វឹកហាត់យ៉ាងហ្មត់ចត់នៅអាយុ៩ឆ្នាំ។ ស៊ីនួ ចាប់ផ្តើមទទួលការចាប់អារម្មណ៍ខ្លាំងនៅក្នុងព្រឹត្តិការណ៍ China Open ឆ្នាំ២០២៤ ដោយបានប្រកួតជាមួយកីឡាការិនីឆ្នើម Zhang Muyan និង Fu Xiaofang មកពីក្រុមប៊ីយ៉ាជម្រើសជាតិចិន ហើយបានចាញ់អ្នកទាំងពីរក្នុងលទ្ធផលយ៉ាងប្រកៀកប្រកិត ៨-៩។
ពីរឆ្នាំក្រោយមក ស៊ីនួ បានបង្ហាញការរីកចម្រើនខ្លាំងគួរឱ្យកត់សម្គាល់។ តួយ៉ាង ការប្រកួតពានរង្វាន់ Huacai World Open កាលពីខែមិថុនាកន្លងទៅ នាងបានបង្កើតភាពភ្ញាក់ផ្អើលដោយបានយកឈ្នះកីឡាករឆ្នើមអង់គ្លេស Gareth Potts លទ្ធផល ១៧-៧ ដើម្បីឡើងទៅវគ្គ៨នាក់ចុងក្រោយ ប៉ុន្តែធ្លាក់ចេញត្រឹមវគ្គនេះ។ ទោះយ៉ាងណា ការឈានដល់វគ្គនេះ នៅតែជាសមិទ្ធផលដ៏សំខាន់មួយ ព្រោះនាងបានឆ្លងកាត់ការប្រកួតប្រជែងជាមួយអ្នកអាជីពពោរពេញដោយបទពិសោធន៍ជាច្រើនរូប ហើយនេះក៏ជាការបោះជំហានទៅមុខមួយកម្រិតទៀត ផ្ទុយពីប៉ុន្មានឆ្នាំមុន ដែលនាងគ្រាន់តែជាទំពាំងស្នងឫស្សីមានទេពកោសល្យម្នាក់តែប៉ុណ្ណោះ។
ទម្រង់លេងដ៏ល្អនេះបានបន្តដល់ការប្រកួតព្រឹត្តិការណ៍ប៊ីយ៉ា ៨ គ្រាប់ផ្នែកនារីចិន Chinese Women’s 8-ball Ranking Tournament កាលពីខែកក្កដាកន្លងទៅថ្មីៗនេះ ដោយ ស៊ីនួ ឡើងដល់វគ្គផ្តាច់ព្រ័ត្រ ហើយថែមទាំងនាំមុខកីឡាការិនីឆ្នើម ជិន ស៊ាវយូ (Chen Xiaoyu) លទ្ធផល ១៣-៧ ទៀតផង មុនពេលគូប្រកួតនាងវាយបកយកឈ្នះវិញលទ្ធផល ១៧-១៥។ ទោះខកខានឈ្នះជើងឯក តែចំណាត់ថ្នាក់រងជើងឯក នៅតែជាសមិទ្ធផលដ៏គួរឱ្យកត់សម្គាល់សម្រាប់នាងក្នុងឆ្នាំនេះ។ អ្វីដែលសំខាន់ជាងនេះគឺ នាងកំពុងបង្ហាញពីសមត្ថភាពក្នុងការរក្សាទម្រង់លេងល្អ និងថេរនៅវគ្គបន្តបន្ទាប់។ អ្នកគាំទ្រជឿថា ស្ថិតក្នុងវ័យត្រឹម១៩ឆ្នាំ ស៊ីនួ នៅតែមានពេលវេលាច្រើនដើម្បីអភិវឌ្ឍអាជីព។
នៅចុងខែសីហានេះ ស៊ីនួ នឹងចូលរួមព្រឹត្តិការណ៍ Phuc Thinh Super Cup ទីក្រុងហូជីមិញ ប្រទេសវៀតណាម ប៉ុន្តែមិនមែនអ្នកប្រកួតប្រជែងឡើយ មូលហេតុដោយសារតែការប្រកួតនេះ ជាប្រភេទប៊ីយ៉ាការ៉ុម ៣ បាំង ដែលខុសពីជំនាញនាង។ ដូច្នេះនាងអាចនឹងចូលរួមក្នុងនាមជាភ្ញៀវកិត្តិយស៕ ប្រភព ៖ Znews
ចែករំលែកព័តមាននេះ