ប្រទេសអាល្លឺម៉ង់ ៖ កីឡាករ Jamal Musiala បានបង្កការព្រួយបារម្ភយ៉ាងខ្លាំងសម្រាប់ក្លិបបាល់ទាត់ Bayern Munich បន្ទាប់ពីខ្សែបម្រើប្រយុទ្ធវ័យ២៣ឆ្នាំរូបនេះ បានដួលសន្លប់លើទីលានជាលើកទី ២ នៅក្នុងរយៈពេលត្រឹមតែ៣ថ្ងៃប៉ុណ្ណោះ។
Musiala បានបន្តជួបបញ្ហាផ្នែករាងកាយ អំឡុងពេលប្រកួតមិត្តភាពដែលក្រុម Bayern Munich ឈ្នះក្រុម Heidenheim លទ្ធផល ៤-២ កាលពីថ្ងៃទី១៨ ខែសីហា ឆ្នាំ២០២៦ ដោយបានដួលសន្លប់លើទីលានពោលប្រហែលជា៤នាទី បន្ទាប់ពីត្រូវបានប្តូរចូលលេងនៅក្នុងនាមជាកីឡាករបម្រុង។ យោងតាមសារព័ត៌មាន AS និង BILD បានឱ្យដឹងថា Musiala បានចាប់ផ្តើមវង្វេងវង្វាន់បាត់បង់ស្មារតី មុនពេលដួលដោយគ្មានការប៉ះទង្គិចជាមួយកីឡាករគូប្រជែងណាម្នាក់ឡើយ។ បុគ្គលិកពេទ្យបានប្រញាប់រត់ចូលទីលានដើម្បីពិនិត្យអាការៈ Musiala ដែលបន្ទាប់មកកីឡាកររូបនេះ អាចក្រោកឈរឡើងវិញបាន ប៉ុន្តែត្រូវប្តូរចេញនិងចាកចេញពីទីលានដោយមានជំនួយពីអ្នកដទៃ។
គួររំលឹកថា នេះគឺជាលើកទីពីរហើយដែល Musiala ជួបប្រទះស្ថានភាពស្រដៀងគ្នានេះនៅក្នុងរយៈពេលត្រឹម៣ថ្ងៃ ដោយលើកមុន រូបគេក៏បានវង្វេងវង្វាន់បាត់បង់ស្មារតីស្ទើរតែដួលសន្លប់ មុនពេលមិត្តរួមក្រុមរត់មកជួយទប់ អំឡុងពេលប្រកួតមិត្តភាពតទល់នឹងក្រុម RB Leipzig ដែល Bayern ឈ្នះដោយលទ្ធផល ៣-១ កាលពីថ្ងៃទី១៥ ខែសីហា កន្លងទៅ។ ក្រោយបញ្ហាកើតឡើងលើកដំបូង ក្លិប Bayern បានឱ្យ Musiala ពិនិត្យសុខភាព និងហ្វឹកហាត់ដាច់ដោយឡែកពីមិត្តរួមក្រុម។ ក្រោយមក នាយកផ្នែកកីឡា លោក Max Eberl បានបញ្ជាក់ថា Musiala មានសុខភាពល្អ ហើយត្រូវបានបញ្ចូលឈ្មោះជាមួយក្រុមវិញ សម្រាប់ការប្រកួតជាមួយ Heidenheim ដែលបានឃើញកីឡាករដួលសន្លប់ជាលើកទី២។
ប្រភពមួយចំនួនក្នុងប្រទេសអាល្លឺម៉ង់ បានលើកឡើងពីលទ្ធភាពដែលថា អាកាសធាតុក្តៅអាចជះឥទ្ធិពលដល់ Musiala នៅក្នុងការប្រកួតទល់នឹង Leipzig ប៉ុន្តែនេះគ្រាន់តែជាការសន្មត់ប៉ុណ្ណោះ ហើយមិនទាន់ត្រូវបានបញ្ជាក់ដោយក្លិប Bayern ឡើយ។
គួរបញ្ជាក់ជូនថា Jamal Musiala គឺជាកីឡាករសំខាន់បំផុតម្នាក់របស់ Bayern នៅក្នុងផែនការសម្រាប់រដូវកាលថ្មីនេះ។ ខ្សែបម្រើប្រយុទ្ធកើតក្នុងឆ្នាំ ២០០៣ រូបនេះ ទើបតែបានត្រឡប់មកវិញពីការស្តារនីតិសម្បទាពីរបួស ហើយត្រូវបានរំពឹងថានឹងដើរតួយ៉ាងសំខាន់ក្នុងប្រព័ន្ធប្រយុទ្ធ។ ទោះយ៉ាងណាក៏ដោយ ដោយសារតែរដូវកាលថ្មីជិតចាប់ផ្តើម ពោលថ្ងៃទី២៨ ខែសីហា ឆាប់ៗខាងមុខនេះ ក្លិប Bayern ទំនងជានឹងបន្តតាមដានស្ថានភាពរបស់ Musiala យ៉ាងដិតដល់ មុនពេលសម្រេចចិត្តលើពេលវេលាសម្រាប់ការវិលត្រឡប់មកកាន់ទីលានវិញរបស់គេ៕ ប្រភព ៖ Znews
ចែករំលែកព័តមាននេះ