ខេត្តបាត់ដំបង ៖ ក្រុមឈ្មួញនាំចូលផ្លែឈើពីប្រទេសថៃ តាមច្រកទ្វារអន្តរជាតិ«ដូង» ស្រុកកំរៀង នាប៉ុន្មានខែចុងក្រោយនេះបានត្អូញត្អែរមិនឈប់ឈរអំពីការខាតបង់ចំណូលប្រចាំថ្ងៃ ដោយសារតែមន្ត្រីអន្តោប្រវេសន៍ មន្ត្រីគយ និងរដ្ឋាករប្រចាំច្រកនោះ រួមទាំងមន្ត្រីគយបោះជំរំប្រចាំតាមកុងត្រូលជជុះនៅក្បែរចិញ្ចើមផ្លូវជាតិជាច្រើនកន្លែងទៀតបង្ខំឲ្យបង់ប្រាក់ថ្លៃក្បាលឡានផង បង់ថ្លៃទំនិញផ្លែឈើផង ដោយគ្មានការចេញវិក័យបត្របង់ប្រាក់ច្បាស់លាស់ទេ ។
ដោយសារតែការជំរិតទារប្រាក់ពីមុខរបរដឹកផ្លែឈើនេះតាមទំនើងចិត្ត ហើយកាន់តែខ្លាំងឡើងៗ និង
ច្រើនកន្លែងរហូតទ្រាំលែងបាន ប៉ុន្មានថ្ងៃបន្តបន្ទាប់មកនេះ ឈ្មួញមួយចំនួនបានសម្រេចហែកទម្លាយពីការប្រព្រឹត្តអំពើពុករលួយជាប្រព័ន្ធរបស់ពួកមន្ត្រីខិលខូចមួយចំនួននៅក្នុងអង្គភាពទាំងនោះដល់អ្នកសារព័ត៌មាននានានៅក្នុងខេត្តបាត់ដំបង ដើម្បីផ្សព្វផ្សាយក្រែងបានជ្រាបជាដំណឹងដល់ថ្នាក់ដឹកនាំ ។
នៅក្នុងការផ្ដល់បទសម្ភាសន៍ផ្ទាល់ជាមួយអ្នកសារព័ត៌មានកាលពីចុងសប្ដាហ៍មុននេះ ឈ្មួញម្នាក់បាននិយាយដោយសុំមិនឲ្យថតរូបភាពថា ការគាបសង្កត់បង្ខំឲ្យពួកឈ្មួញដឹកផ្លែឈើពីថៃ បង់ប្រាក់ច្រើនជាងពេលមុនៗនេះ គឺទើបតែចាប់ផ្ដើមក្នុងរយៈពេលចុងក្រោយនេះ។ ពោលគឺចាប់ផ្ដើមក្រោយពីរាជរដ្ឋាភិបាលប្រកាសដកជាផ្លូវការនូវមន្ត្រីកាំកុងត្រូលចេញពីតាមបណ្ដាច្រកទ្វារអន្តរជាតិ ឬតាមបណ្ដាច្រកតំបន់នានានៅទូទាំងប្រទេស ។
រថយន្តទួរីស ដឹកផ្លែឈើ១គ្រឿងពេលបើកចេញពីផ្សារថៃ ចូលដល់ច្រកទ្វារអន្តរជាតិ«ដូង» ក្នុងស្រុកកកំរៀង ភ្លាមម្ចាស់ទំនិញត្រូវបង់ប្រាក់ជូនមន្ត្រីប្រចាំច្រកទ្វារ២ស្ថាប័នមុនគេ គឺបង់ឲ្យស្ថាប័នគយនិងរដ្ឋាករចំនួនពី៣ទៅ៤ម៉ឺនរៀល រួចបង់បន្តទៅមន្ត្រីនគរបានអន្តោប្រវែសន៍ប្រចាំច្រកនេះប្រហាក់ប្រហែលគ្នាមួយតង់ទៀត ។
ឈ្មួញផ្លែឈើរូបនេះបានសង្កត់ធ្ងន់ទៅលើការជំរិតទារប្រាក់មិនបន្ធូរដៃពីមន្ត្រីការិយាល័យគយ និងរដ្ឋា
ករដូង ដែលមានស្នាក់ការនៅម្ដុំភូមិអូរដា ក្នុងស្រុកកំរៀងនេះ ។ បន្ទាប់ពីបង់ឲ្យមន្ត្រីគយ និងមន្ត្រីអន្តោប្រវេសន៍ប្រចាំច្រកទ្វារអន្តរជាតិ«ដូង» ចំនួន២ស្ថាប័នរួចហើយ បើកចេញផុតពីច្រកទ្វារមិនបានប៉ុន្មានគីឡូម៉ែត្រ ក៏ត្រូវចូលអន្ទាក់ដែលដាក់ជាប្រចាំរបស់ការិយាល័យគយ និងរដ្ឋាករដូង នៅចំណុចខាងលើនេះទៀត ។
មន្ត្រីប្រចាំស្នាក់ការនេះជំរិតទារប្រាក់ធ្ងន់ជាងគេ គឺទាមទាររហូតដល់២៥ម៉ឺនរៀល ក្នុងរថយន្តដឹកផ្លែឈើ១គ្រឿង ។ ប៉ុន្តែមិនទាន់បញ្ចប់ត្រឹមលោកគយប្រចាំស្នាក់ការមួយនេះទេ នៅមានកុងត្រូលជជុះរាប់សិបកន្លែងទៀត ដែលបោះជំរំតាមចិញ្ចើមថ្នល់ជាតិបណ្តាក់គ្នាដូចខ្យងចាប់តាំងពីច្រកព្រំដែនរហូតដល់ទីផ្សារលក់ដូរទើបចប់ ។
បើអ្នកបើករថយន្តដឹកផ្លែឈើម្នាក់ដែលសុំលាក់ឈ្មោះដែរ បានរៀបរាប់ប្រាប់កោះសន្តិភាពតាមទូរស័ព្ទនៅព្រឹកថ្ងៃទី៣០ មេសាថា ស្ទើរគ្រប់ឈ្មួញដែលរកស៊ីដឹកផ្លែឈើពីថៃ យកមកលក់តាមទីផ្សារនានានៅក្នុងប្រទេសខ្មែរ សុទ្ធតែត្អូញត្អែរអំពីការខាតបង់នេះ ដោយសារតែសមត្ថកិច្ចនៅតាមដងផ្លូវចាំស្ទាក់ជំរិតទាប្រាក់តាមអំពើចិត្ត។ កាលមុនអាចសល់ប្រាក់ចំណេញខ្លះ តែបច្ចុប្បន្នក្រោយពីទូទាត់ថ្លៃចំណាយបង់ផ្សេងៗ ថ្លៃបាយទឹក និងថ្លៃប្រេងសាំង ដូចជាគ្មានសល់ប្រាក់សម្រាប់ចូលផ្ទះទេ ។
អ្នកបើករថយន្តរូបនេះរៀបរាប់អំពីចំនួនកុងត្រូលជជុះ និងសកម្មភាពជំរិតទាប្រាក់ពីមន្ត្រីប្រចាំតាមបណ្ដាកុងត្រូលជជុះទាំងនោះថា កុងត្រូលជជុះមានគ្រប់ទីកន្លែងនៅតាមដងផ្លូវ មិនថាផ្លូវជាតិចេញពីស្រុកកំរៀង ចេញពីស្រុកភ្នំព្រឹក ឬចេញពីស្រុកសំពៅលូនឡើយ ឲ្យតែចេញពីច្រកទ្វារព្រំដែនប្រទេសថៃ ចូលមកដល់ក្រុងបាត់ដំបង គឺមានគ្រប់រូបភាពបណ្ដាក់គ្នាដូចខ្យងតាមដងផ្លូវ ។
សមាសភាពនៃឆ្មាំកុងត្រូលជជុះទាំងនោះ មានមន្ត្រីគយដែលមកពីអង្គភាព ផ្សេងៗគ្នា រាប់ទាំងកម្លាំងគយចល័តដែលមានស្នាក់ការជាប់ផ្លូវជាតិលេខ៥ ក្នុងឃុំអូរតាគី ស្រុកថ្មគោលផង មន្ត្រីអន្តោប្រវែសន៍ប្រចាំតាមច្រកទ្វារនានា មន្ត្រីនគរបាលសេដ្ឋកិច្ចលួចចងអង្រឹងស្ងាត់ៗតាមតូបលក់ដូររបស់ពលរដ្ឋឬក្រោមដើមឈើតាមចិញ្ចើមថ្នល់ និងចុងក្រោយកុងត្រូលជជុះរបស់មន្ត្រីចរាចរណ៍ បោះគោលដៅចាំយកប្រាក់យ៉ាងស្របច្បាប់នៅលើដងផ្លូវតែម្ដង។
អ្នកបើកឡានរូបនេះបាននិយាយដោយកំហឹងថា «ការរកស៊ីដឹកផ្លែឈើសព្វថ្ងៃ ប្រាក់ចំណេញបានត្រឹមតែបង់ឲ្យពួកកុងត្រូលជជុះទាំងអស់នេះប៉ុណ្ណោះ មិនបានសល់សម្រាប់ធ្វើឡាន ឬចិញ្ចឹមប្រពន្ធកូនទេ »។
នៅពេលសួរថា ហេតុអ្វីបានជាហ៊ានហៅអ្នកចាំយកលុយនៅតាមដងផ្លូវទាំងនោះថា ជាពួកកុងត្រូលជជុះ ? អ្នកបើកឡានរូបនេះបានឆ្លើយទាំងកំហឹងថា «ព្រោះមន្ត្រីនៅចាំទារលុយទាំងអស់នោះ យកលុយហើយមិនមានចេញវិក័យបត្របញ្ជាក់ការបង់ប្រាក់ឲ្យម្ចាស់ទំនិញទេ !
មិនតែប៉ុណ្ណោះមន្ត្រីដែលនៅតាមដងផ្លូវមានសកម្មភាពលួចលាក់ ជាពិសេសពេលថ្ងៃកន្លែងខ្លះគ្មានមនុស្សនៅចាំទេ មានតែអង្រឹង១ឬ២ចងចោល តែបើរថយន្តដឹកទំនិញណាដែលបើកដល់កន្លែងចងអង្រឹងនោះហើយមិនឈប់បង់លុយ ឬ ធ្វើជាបើកហួសមិនបាន១០០ម៉ែត្រផង នឹងត្រូវជនស្លៀកពាក់ស៊ីវិញជិះម៉ូតូ ឬរថយន្តតាមស្ទាក់ចាប់យកមកពិន័យភ្លាម ដូច្នេះហើយទើបខ្ញុំហៅក្រុមជនទុច្ចរិតទាំងនោះពួកកុងត្រូលជជុះ !» ។
លោកអ៊ុំ រតនា ប្រធានការិយាល័យគយ និងរដ្ឋាករដូង ដែលមានស្នាក់ការនៅស្រុកកំរៀង ហើយត្រូវ
ក្រុមឈ្មួញដឹកទំនិញចោទប្រកាន់ថា ដៃធ្ងន់ជាងគេក្នុងការបង្ខំទារប្រាក់ពីរថយន្តដឹកផ្លែឈើ កោះសន្តិភាពមិនអាចសុំការបំភ្លឺបានឡើយនៅរសៀលថ្ងៃទី៣០ ខែមេសា ។ ដោយឡែកមន្ត្រីអន្តោប្រវែសន៍ម្នាក់បាននិយាយក្នុងន័យជួយបន្ធូរបន្ថយស្ថានភាព ខ្លះៗថា មន្ត្រីអន្តោប្រវែសន៍ប្រចាំច្រកអន្តរជាតិដូង ពិតជា
បានយកលុយពីក្បាលឡានដឹកទំនិញទាំងនោះមែន តែគេបានពិនិត្យទំនិញទាំងនោះជាមុន និងយកទៅ
តាមប្រភេទមុខទំនិញថ្លៃ ឬថោក តិច ឬច្រើន មិនមែនចេះតែបង្ខំទាមទារនោះទេ ។
ក្រុមឈ្មួញដឹកទំនិញបញ្ជាក់ថា បើគិតត្រឹមច្រកព្រំដែនរហូតដល់ទីផ្សារក្រុងបាត់ដំបង អ្នកដឹកផ្លែឈើត្រូវចំណាយលុយបង់ឲ្យកុងត្រូលជជុះគ្រប់ស្ថាប័នដែលបណ្ដាក់គ្នាដូចខ្យងតាមដងផ្លូវយ៉ាងតិច១លានរៀល ។ នេះមិនទាន់គិតឈ្មួញខ្លះដែលដឹកធ្លាយទៅដល់ទីផ្សារនៅរាជធានីភ្នំពេញនៅឡើយទ ។ ដូច្នេះពួកគេសំណូមពរដល់ថ្នាក់ដឹកនាំ ជាពិសេសអាជ្ញាធរខេត្ត គួរតែទៅពិនិត្យមើល ឬត្រូវកម្ទេចចោលខ្លះទៅ ព្រោះពួកកុងត្រូលជជុះទាំងនោះកំពុងគាបសង្កត់ជាន់កក្រុមឈ្មួញដឹកផ្លែឈើជំរិតទារលុយគ្មានបន្ធូរដៃឡើយ ៕
ចែករំលែកព័តមាននេះ