ប្រទេសវេណេស៊ុយអេឡា ៖ ពួកបាតុករបានប៉ះទង្គិចគ្នាយ៉ាងខ្លាំងក្លាបំផុត ជាមួយកងកម្លាំងសន្តិសុខកាលពីថ្ងៃទី៣០ ខែមេសា ឆ្នាំ២០១៩ នៅតាមវិថីនានា នៃទីក្រុងការ៉ាកាស់ ដោយមានការជួយទ្រទ្រង់របស់យោធា១ក្រុម ដែលចូលរួមជាមួយមេដឹកនាំប្រឆាំងលោក…
ប្រទេសវេណេស៊ុយអេឡា ៖ ពួកបាតុករបានប៉ះទង្គិចគ្នាយ៉ាងខ្លាំងក្លាបំផុត ជាមួយកងកម្លាំងសន្តិសុខកាលពីថ្ងៃទី៣០ ខែមេសា ឆ្នាំ២០១៩ នៅតាមវិថីនានា នៃទីក្រុងការ៉ាកាស់ ដោយមានការជួយទ្រទ្រង់របស់យោធា១ក្រុម ដែលចូលរួមជាមួយមេដឹកនាំប្រឆាំងលោក JUAN GUAIDO ខណៈរដ្ឋាភិបាលរបស់ប្រធានាធិបតី លោកនីកូឡាស់ ម៉ាឌូរ៉ូបរិហារ ពីការប៉ុនប៉ងធ្វើរដ្ឋប្រហារមួយ។
វិថីនានាត្រូវដាក់របាំងរាំង ការគប់ដុំថ្ម ពពកផ្សែងនៃឧស្ម័នបង្ហូរទឹកភ្នែក សភាពការណ៍នៅតែតានតឹងខ្លាំង នារសៀលថ្ងៃទី៣០មេសា ក្នុងរដ្ឋធានីវេណេស៊ុយអេឡា។ មនុស្សយ៉ាងតិច៦៩នាក់បានត្រូវរបួស ក្នុងនោះ២នាក់ដោយគ្រាប់កាំភ្លើង។
រដ្ឋាភិបាលអះអាងថា បានកម្ទេចការប៉ុនប៉ងធ្វើរដ្ឋប្រហារ ពីសំណាក់កងទាហានក្បត់មួយក្រុមតូចនិងគូសបញ្ជាក់ថា សភាពការណ៍ត្រូវបានគ្រប់គ្រង។ តាមTWITTERជនលេខ២នៃរដ្ឋអំណាចវេណេស៊ុយអេឡា លោកDIOSDADO CABELOសរសេរថា នាពេលនេះពួកអ្នកធ្វើរដ្ឋប្រហារត្រូវចាញ់ ហើយកំពុងតែរត់គេចខ្លួនចូលក្នុងស្ថានទូតនានា។
ក្នុងពេលជាមួយគ្នានេះដែរ ប្រទេសស៊ីលីប្រកាសថា ជនប្រឆាំងលោកLEOPOLDO LOPEZ បានរត់ភៀសខ្លួនចូលក្នុងស្ថានទូតរបស់ខ្លួនប្រចាំក្រុងការ៉ាកាស់ រួមជាមួយគ្រួសារលោក។ មុននេះលោកLOPEZ ដែលឃុំឃាំងក្នុងផ្ទះចាប់តាំងពីឆ្នាំ២០១៧មក ហើយជាមនុស្សនៅខាងលោកGUAIDOនិងពួកយោធាបះបោរអះអាងថាលោកត្រូវបានរំដោះ ដោយពួកទាហានស្និទ្ធលោកGUAIDO។
សម្រាប់ពេលនេះគេមិនដឹងថា តើលោកGUAIDOស្ថិតនៅទីណាឡើយ។ ចំណែកលោកម៉ាឌូរ៉ូវិញបានបង្ហាញមុខតាមទូរទស្សន៍ឬជាសាធារណៈនាថ្ងៃទី៣០មេសានោះ។ រីឯរដ្ឋមន្ត្រីការបរទេសអាមេរិក លោកMIKE POMPEOអះអាងថា លោកនីកូឡាស់ម៉ាឌូរ៉ូត្រៀមខ្លួននាព្រឹកថ្ងៃទី៣០មេសា ជិះយន្តហោះទៅកាន់គុយបា មុនពេលត្រូវបញ្ចុះបញ្ចូលដោយរុស្ស៊ី។
នាវេលាព្រឹកព្រលឹម នៅតាមច្រកចូលនានា នៃមូលដ្ឋានយោធាCARLOTA មានការប៉ះទង្គិចគ្នាយ៉ាងខ្លាំងក្លាផ្ទុះឡើង រវាងកងកម្លាំងសន្តិសុខដែលស្មោះត្រង់និងពួកបាតុករស្និទ្ធលោកGUAIDOជាច្រើនពាន់នាក់។ រថពាសដែក១គ្រឿងបានបើកសម្រុកលើពួកបាតុករប្រឆាំង១ក្រុម បណ្ដាលឲ្យមនុស្សច្រើននាក់រងរបួសដេកដួលលើដី។
តាម TWITTER លោក GUAIDO សរសេរថា នេះជាពេលដែលរដ្ឋទាំង២៤របស់ប្រទេសដើរលើផ្លូវតែមួយនិងពុំមានការងាកថយក្រោយឡើយ។ អនាគតជារបស់យើង ប្រជាជននិងកងទ័ពរួបរួមគ្នាដើម្បីបញ្ចប់ការកាន់កាប់របស់លោកម៉ាឌូរ៉ូ។
ចំណែករដ្ឋមន្ត្រីការពារប្រទេសវេណេស៊ុយអេឡា ឧត្ដមសេនីយVLADIMIR PADRINOបានព្រមានពួកប្រឆាំង ពីលទ្ធភាពនៃការបង្ហូរឈាម ហើយតំណាងរបស់លោក GUAIDOប្រចាំក្រុងវ៉ាសិុនតោន បានអំពាវនាវដល់ប្រជាជនឲ្យបន្តបាតុកម្ម។
រីឯរដ្ឋការអាមេរិកវិញនាថ្ងៃទី៣០មេសា បានលើកពីការវាយលុកគ្រប់បែបយ៉ាង ដើម្បីជម្រុញឲ្យលោកម៉ាឌូរ៉ូ បោះបង់ចោលអំណាច។ តាមទូរទស្សន៍CNNលោកMIKE POMPEOនិយាយថា តាមព័ត៌មាននានារបស់យើងថាលោកម៉ាឌូរ៉ូមានយន្តហោះ១គ្រឿងនៅព្រលាន ដែលលោកត្រៀមចាកចេញ នាព្រឹកថ្ងៃទី៣០មេសាទៅកាន់គុយបា ប៉ុន្តែពួករុស្សុីប្រាប់លោកថា ឲ្យស្ថិតនៅក្នុងប្រទេស។
ប៉ុន្មាននាទីមុននេះលោកដូណាល់ត្រាំបានបន្តឹងសំឡេងភ្លាមៗ ប្រឆាំងក្រុងឡាហាវ៉ាន ដោយគំរាមគុយបា ពីការហ៊ុមព័ទ្ធទាំងស្រុងប្រសិនបើកងទ័ពនិងពួកជីវពលគុយបា ពុំបញ្ឈប់ភ្លាមៗប្រតិបត្តិការយោធា របស់ពួកគេនៅវេណេស៊ុយអេឡាទេនោះ។
រីឯលោកJONH BOLTONទីប្រឹក្សាសន្តិសុខជាតិរបស់លោកវិញអះអាងថា បណ្ដាមនុស្សគន្លឹះរបស់វេណេស៊ុយអេឡា បានធ្វើដោយសម្ងាត់ការពិភាក្សាគ្នាជាមួយពួកប្រឆាំង រយៈពេលប៉ុន្មានសប្ដាហ៍ចុងក្រោយនេះ សំដៅឲ្យមានការផ្លាស់ប្ដូរមួយនៃរបប ហើយលោកក៏បានដាក់ឱសានវាទមួយដែរ ចំពោះមនុស្សគន្លឺះទាំងនេះដោយលោកថានេះជាវាសនាចុងក្រោយរបស់ពួកគេហើយ៕
ចែករំលែកព័តមាននេះ