រាជធានីភ្នំពេញ ៖ កាលពីរសៀលថ្ងៃទី២៩ ខែមេសា ប្រាក់ដុល្លារអាមេរិកប្រមាណជាង៣លានដុល្លារ ដែលរឹបអូសបានពីជនជាតិនាំចូលមកពីទីក្រុងហុងកុងនោះ ត្រូវបានលោក គុជ គឹមឡុង ព្រះរាជអាជ្ញាររងសាលាដំបូងរាជធានីភ្នំពេញ សម្រេចយកទៅតម្កល់ទុកនៅធនាគារជាតិ ដើម្បីជាវត្ថុតាងនៅពេលបើកសវនាការលើអង្គសេចក្តី បន្ទាប់ពីតំណាងអយ្យការបានសម្រេចឃុំខ្លួនជនសង្ស័យដែលជាម្ចាស់ប្រាក់ចំនួន៣នាក់នោះរួចមក ។
ជាមួយនោះដែរ ស្ថាប័នអយ្យការអមសាលាដំបូង ក៏បានតម្រូវឲ្យអនុរក្សពន្ធនាគារ ដោយមានការចូលរួមពីកម្លាំងសមត្តកិច្ចនគរបាលនាយកដ្ឋានអន្តោប្រវេសន៍នាំជនសង្ស័យជាជនជាតិចិនទាំង៣នាក់ ដែលបានជាប់ឃុំនៅក្នុងពន្ធនាគារប៉េហ្ស៊ី (PJ) ទៅពិនិត្យ និងតាមអង្កេតមើលលុយរបស់ខ្លួនត្រូវអាជ្ញាធរធ្វើការរឹបអូស និងយកលុយទាំងនោះទៅរក្សាទុកក្នុងធនាគារជាតិជាបណ្តោះអាសន្ន ។
គួរបញ្ជាក់ថា បុរសជាជនជាតិចិនទាំង៣នាក់ ក្នុងនោះរួមមាន១-ឈ្មោះ WANG SHI PING ២-ឈ្មោះ WANG LI CHAO និង៣-ឈ្មោះ ZHANG JIAN ត្រូវបានកម្លាំងសមត្ថកិច្ចនគរបាលអន្តោប្រវេសន៍សហការឃាត់ខ្លួន កាលពីថ្ងៃទី២៣ ខែមេសា នៅព្រលានយន្តហោះអន្តរជាតិភ្នំពេញ ខណៈជនជាតិចិន៣នាក់នោះបាននាំយកប្រាក់ដុល្លារមិនដឹងប្រភពជាង៣លានដុល្លារអាមេរិកពីទីក្រុងហុងកុងនាំចូលមកកម្ពុជា ។
បន្ទាប់មកជនសង្ស័យទាំង៣នាក់ខាងលើត្រូវបានស្ថប័នអយ្យការ អមសាលាដំបូងរាជធានីភ្នំពេញធ្វើការ ចោទប្រកាន់ពីបទសម្អាតប្រាក់ តាមមាត្រា៣ថ្មី និងមាត្រា២៩ថ្មី នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេវរកម្ម ។
ក្រោយពីតំណាងអយ្យការបានចោទប្រកាន់ជាផ្លូវការ ហើយជនសង្ស័យទាំង៣នាក់ខាងលើត្រូវ បានចៅក្រមស៊ើបសួរសម្រេចជុំខ្លួនដាក់ពន្ធនាគារប៉េហ្ស៊ីជាបណ្តោះអាសន្ន ដើម្បីបើកការស៊ើបអង្កេត និងឈានដល់បើកសវនាការជំនុំជម្រះក្តី ៕
ចែករំលែកព័តមាននេះ