រាជធានីភ្នំពេញ ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ដោយអនុវត្តតាមបទបញ្ជារបស់ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការរាជធានីភ្នំពេញ ដឹកនាំបញ្ជាកម្លាំងដោយលោកឧត្តមសេនីយ៍ត្រី ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ លោកវរសេនីយ៍ឯក ម៉ម សាវន នាយការិយាល័យព្រហ្មទណ្ឌកម្រិតស្រាល និងលោកវរសេនីយ៍ទោ ហួរ ម៉េងហួន អធិការនគរបាលខណ្ឌចំការមន និងដឹកនាំកម្លាំងស្រាវជ្រាវផ្រាវបង្ក្រាបផ្ទាល់ពីលោកវរសេនីយ៍ទោ អន សុខវិបុល្លា អធិការរងទទួលផែនការងារព្រហ្មទណ្ឌខណ្ឌចំការមន កម្លាំងផ្នែកជំនាញខណ្ឌ កម្លាំងការិយាល័យព្រហ្មទណ្ឌកម្រិតស្រាល នៃស្នងការនគរបាលរាជធានីភ្នំពេញ បានសហការជាមួយកម្លាំង នៃអធិការដ្ឋាននគរបាលក្រុងសំរោង នៃស្នងការដ្ឋាននគរបាលខេត្តឧត្តរមានជ័យ បានធ្វើការឃាត់ជនសង្ស័យចំនួន២នាក់(ក្រុមក្មេងទំនើង) ដែលប្រើដាវកែច្នៃកាប់ទៅលើជនរងគ្រោះបណ្តាលឲ្យរងរបួសធ្ងន់ធ្ងរនៅប្រអប់ដៃខាងស្តាំ កាលពីយប់ថ្ងៃទី២៣ ខែឧសភា ឆ្នាំ២០២៦ វេលាម៉ោង០៣និង៥០នាទីយប់ឈានចូលថ្ងៃទី២៤ ខែឧសភា ឆ្នាំ២០២៦ នៅខណ្ឌចំការមន។ ហើយក្រុមជនសង្ស័យ បន្ទាប់ពីធ្វើសកម្មភាពរួច បានគេចខ្លួនទៅខេត្តសៀមរាប និងបន្តទៅខេត្តឧត្តរមានជ័យ ។
ក្រុមការងារព័ត៌មាន និងប្រតិកម្មរហ័ស បានឲ្យដឹងបន្តថា រហូតដល់ថ្ងៃទី១ ខែមិថុនាឆ្នាំ២០២៦ វេលាម៉ោង១២និង០០នាទី កម្លាំងសមត្ថកិច្ច បានបង្ក្រាបជនសង្ស័យទាំង២នាក់ នៅចំណុចភូមិកំណប់ សង្កាត់បន្សាយរាក់ ក្រុងសំរោង ខេត្តឧត្តរមានជ័យ ។
ជនសង្ស័យ រួមមាន ៖ ទី១. ឈ្មោះ នាង អ៊ីឈៀង ភេទប្រុស អាយុ១៩ឆ្នាំ ស្នាក់នៅសង្កាត់ចាក់អង្រែក្រាម ខណ្ឌមានជ័យ រាជធានីភ្នំពេញ មុខរបរសិស្ស ។ និងទី២. ឈ្មោះ គន្ធី បញ្ញរិទ្ធ ភេទប្រុស អាយុ១៨ឆ្នាំ ស្នាក់នៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ មុខរបរសិស្ស ។
បច្ចុប្បន្ន ជនសង្ស័យខាងលើកំពុងយកមកសាកសួរនៅអធិការដ្ឋាននគរបាលខណ្ឌចំការមន ដើម្បីចាត់ការតាមនីតិវិធី ៕
ចែករំលែកព័តមាននេះ