ខេត្តប៉ៃលិន ៖ បន្ទាប់ពីសង្កេតឃើញការសិក្សារៀនសូត្ររបស់សិស្សានុសិស្សមានការធ្លាក់ចុះជាងឆ្នាំមុនៗ ដោយមានការព្រួយបារម្ភក្រែងពួកគេប្រលងមិនជាប់នាំឱ្យខូចអនាគត ទើបលោកនាយកវិទ្យាល័យហ៊ុនសែនក្រុងទេពនិម្មិត ជួបប្រជុំពិភាក្សាគ្នាចេញលិខិតសេចក្តីជូនដំណឹង១ច្បាប់ ដោយមិនអនុញ្ញាតិឱ្យសិស្សណាម្នាក់ប្រើប្រាស់ទូរស័ព្ទដៃស្មាតហ្វូន (Smart Phone) ក្នុងបរិវេណសាលាឡើយ…
ខេត្តប៉ៃលិន ៖ បន្ទាប់ពីសង្កេតឃើញការសិក្សារៀនសូត្ររបស់សិស្សានុសិស្សមានការធ្លាក់ចុះជាងឆ្នាំមុនៗ ដោយមានការព្រួយបារម្ភក្រែងពួកគេប្រលងមិនជាប់នាំឱ្យខូចអនាគត ទើបលោកនាយកវិទ្យាល័យហ៊ុនសែនក្រុងទេពនិម្មិត ជួបប្រជុំពិភាក្សាគ្នាចេញលិខិតសេចក្តីជូនដំណឹង១ច្បាប់ ដោយមិនអនុញ្ញាតិឱ្យសិស្សណាម្នាក់ប្រើប្រាស់ទូរស័ព្ទដៃស្មាតហ្វូន (Smart Phone) ក្នុងបរិវេណសាលាឡើយ ។ បើសិនជានៅតែរឹងចចេសប្រើប្រាស់ទៀត ពេលឃើញនឹងដកហូត រួចហៅឪពុកម្តាយឱ្យចូលទៅទទួល និងធ្វើការអប់រំណែនាំបន្ថែមទៀត ។
តាមប្រភពពីលោក ខាំ យ៉ារិន នាយកវិទ្យាល័យហ៊ុនសែនក្រុងទេពនិម្មិតប៉ៃលិន បានឱ្យដឹងកាលពីម៉ោង២និង២២នាទីរសៀល ថ្ងៃទី៣០ មេសានេះថា ទូរស័ព្ទដៃស្មាតហ្វូនត្រូវបានគេបង្កើតឡើងដើម្បីជាប្រយោជន៍សម្រាប់មនុស្សគ្រប់រូប ងាយស្រួលប្រើប្រាស់ប្រាស្រ័យទាក់ទងគ្នា ។ ប៉ុន្តែតាមការសង្កេតមើលទៅលើសិស្សានុសិស្សនៅក្នុងសាលាចំណេះដឹងទូទៅ ជាពិសេសសាលារៀនរបស់លោកឃើញថា ការប្រើប្រាស់របស់ពួកគេមិនចំគោលដៅច្រើន គឺពួកគេបែរជាយកទៅលេងហ្គេមពេលគ្រូកំពុងពន្យល់មេរៀន អត់យកចិត្តទុកដាក់ស្តាប់នោះទេ ហើយអ្នកខ្លះទៀតមើលយូធូប មើលរឿងអត់ប្រយោជន៍ ឆាតសារដាក់គ្នាទៅវិញទៅមក និងលេងហ្គេមតិកតុកជាដើម…. ជាហេតុធ្វើឱ្យប៉ះពាល់ដល់ម៉ោងសិក្សា និងរំខានដល់អ្នកដទៃយ៉ាងខ្លាំង។
លោកបន្តទៀតថា ដូច្នេះទើបលោកពិភាក្សាជាមួយគណៈគ្រប់គ្រងសាលាដោយចេញសេចក្តីប្រកាសមួយ ដើម្បីពញ្ញាក់ស្មារតីអាណាព្យាបាលគ្រប់រូប មេត្តាជួយកាត់បន្ថយកុំឱ្យកូនរបស់ខ្លួនប្រើប្រាស់ទូរស័ព្ទដៃតាមផ្លូវខុស និងដើម្បីឱ្យពួកគេយកពេលវេលាកាន់សៀវភៅរៀន ទើបប្រសើរជាង ព្រោះការសិក្សារបស់ពួកគេមានការថយចុះគួរឱ្យកត់សម្គាល់ និងមានការព្រួយបារម្ភយ៉ាងខ្លាំង ។
លោកបញ្ជាក់ថា ក្នុងនាមជាអ្នកមានតួនាទីអប់រំណែនាំ គឺបានត្រឹមតែស្តីប្រដៅនៅក្នុងថ្នាក់រៀនប៉ុណ្ណោះ តែខាងក្រៅគឺជារឿងរបស់អាណាព្យាបាលម្នាក់ៗ ដូច្នេះសូមឱ្យប្រជាពលរដ្ឋទាំងអស់ជួយណែនាំដល់កូនៗផង ដើម្បីអនាគតខ្លួនឯង និងជាតិរបស់យើងផងដែរ ។ លើសពីនេះការបង្កើតច្បាប់ ឬសេចក្តីណែនាំខាងលើ តែងតែមានការប៉ះពាល់ដល់អារម្មណ៍អ្នកជំទាស់ខ្លះក៏ពិតមែន តែជាប្រយោជន៍ដើម្បីរំលឹកឱ្យសិស្សទាំងអស់ទុកទូរស័ព្ទមួយលែកសិន ត្រូវយកឱកាសចាប់សៀវភៅអានវិញ នោះទើបជាការសំខាន់ដែលម្នាក់ៗចង់បាន ។
សូមបញ្ជាក់ថា លោក ខាំ យ៉ារិន នាយកសាលាវិទ្យាល័យហ៊ុនសែនក្រុងទេពនិម្មិតប៉ៃលិន បានចេញសេចក្តីជូនដំណឹងពីវិន័យថ្មី ដោយហាមឃាត់សិស្សានុសិស្សទាំងអស់របស់សាលា មិនឱ្យប្រើប្រាស់ទូរស័ព្ទដៃ (Smart Phone) គ្រប់ប្រភេទ នៅទូទាំងបរិវេណសាលាជាដាច់ខាត កាលពីថ្ងៃទី២៦ ខែមេសា ឆ្នាំ២០១៩ ដោយបង្ហោះនៅក្នុងបណ្តាញសង្គម ។ ក្នុងករណីសិស្សណាម្នាក់ហ៊ានប្រើទូរស័ព្ទទំនើបល្មើសនឹងវិន័យនឹងត្រូវដកហូតយកទៅរក្សាទុកមួយរយៈសិន។
ចំពោះការចេញវិន័យដ៏តឹងរឹងថ្មី ដែលមិនធ្លាប់មានតាមសាលារដ្ឋដទៃទៀតដូចនេះ គឺដោយ សារតែកន្លងមក សិស្សានុសិស្សហាក់ដូចជាប្រើទូរស័ព្ទទំនើបលើសពីការសិក្សា ឬប្រើមិនសម្រាប់ផ្តល់ប្រយោជន៍ដល់ការសិក្សានោះទេ ។ លើសពីនេះ បើតាមការបង្ហោះសេចក្តីជូនដំណឹងនៅលើបណ្តាញសង្គម គឺទទួលបានការគាំទ្រយ៉ាងច្រើន ហើយក៏មានអ្នកខ្លះចង់ឲ្យសាលាដទៃទៀតយកគំរូតាមដែរ ដើម្បីកុំឲ្យសិស្សានុសិស្សទទួលរងផលប៉ះពាល់ក្នុងការសិក្សា ដោយព្រោះតែទូរស័ព្ទទំនើបមួយនេះ ៕
ចែករំលែកព័តមាននេះ