រាជធានីភ្នំពេញ ៖ តាមរយៈដីការកោះហៅឲ្យចូលខ្លួនតាមការកំណត់របស់តុលាការខេត្តកោះកុង អតីតសកម្មជនការពារបរិស្ថានដែលសញ្ជាតិអេស្ប៉ាញបានអះអាងថា ខ្លួននឹងខ្លួនតាមដីការកោះហៅរបស់តុលាការ បើខ្លួនមិនទាន់ត្រូវបានរាជរដ្ឋាភិបាលដាក់ចូលក្នុងបញ្ជីខ្មៅក្នុងការចូលមកកម្ពុជា ។ លោកអាឡិច ហ្គន់សាឡេស ដេវិតសុន ដែលចេះនិយាយភាសាខ្មែរយ៉ាងច្បាស់បានលើកឡើងលើបណ្តាញសង្គម នៅថ្ងៃទី៣០ មេសា យ៉ាងដូច្នេះថា បន្ទាប់ពីការពន្យាពេលជាច្រើនលើកច្រើនសារតាំងពីឆ្នាំ២០១៦ កន្លងមកទីបញ្ចប់តុលាការខេត្តកោះកុងបានចេញដីកាកោះហៅខ្ញុំឲ្យចូលរួមក្នុងសវនាការក្នុងនាមជាជនជាប់ចោទ ។
លោកបន្តថា តុលាការបានតម្រូវឲ្យខ្ញុំមានវត្តមានក្នុងសវនាការនាថ្ងៃទី៣០ ខែកក្កដា វេលាម៉ោង៨និង៣០នាទីព្រឹក ជាកំហិត ។ លោកបញ្ជាក់ថា«គោលជំហររបស់ខ្ញុំ គឺរក្សានៅដដែលហើយខ្ញុំរីករាយ និងចូលរួមនៅក្នុងសវនាការ ដើម្បីការពារខ្លួនពីការចោទប្រកាន់ដែលគ្មានមូលដ្ឋានច្បាស់លាស់ គ្មានសាក្សី និងគ្មានបទល្មើសពិតប្រាកដមួយនេះ ។ ជាមួយគ្នានោះដែរសកម្មជនរូបនេះបានសំណួរសួរថា តើសម្តេចក្រឡាហោម ស ខេង គោរពច្បាប់ និងភាពឯករាជ្យរបស់តុលាការដែរឬទេ ? តើឈ្មោះខ្ញុំនឹងបានលុបចេញពីបញ្ជីខ្មៅ ដើម្បីឲ្យខ្ញុំបានចូលរួមក្នុងសវនាការតាមការទាមទាររបស់តុលាការខេត្តកោះកុងដែរឬទេ ? ។
លោក អ៊ីវ ត្រាយ តំណាងអយ្យកាតអមសាលាដំបូងខេត្តកោះកុងចេញផ្សាយនៅថ្ងៃទី២៥ មេសា ឆ្នាំ២០១៩ បានអញ្ជើញលោកអាឡិច ហ្គន់សាឡេស ដេវិតសិន (ALEJANDRO GONZALEZ DAVIDSON) ហៅ ALEX មានអាយុ៣៦ឆ្នាំ ជនជាតិអេស្ប៉ាញ ឲ្យចូលមកសាលាដំបូងខេត្តកោះកុងនៅថ្ងៃទី៣០ កក្កដា ឆ្នាំ២០១៩ វេលាម៉ោង៨កន្លះព្រឹកជាកំហិត ។ ដីការបានលើកឡើងទៀតថា ការចូលខ្លួនរបស់ ALEX ដើម្បីបំភ្លឺពីបទជាប់ចោទ«សមគំនិតក្នុងអំពើគម្រាមកំហែងថា នឹងធ្វើឲ្យខូចខាតដែលភ្ជាប់នូវបញ្ហាអ្វីមួយប្រព្រឹត្តិនៅចំណុចព្រែកអណ្តូងទឹក ឃុំអណ្តូងទឹក ស្រុកបូទុមសាគរ ខេត្តកោះកុង កាលពីថ្ងៃទី២៦ ដល់ថ្ងៃទី២៨ កក្កដា ឆ្នាំ២០១៥ និងថ្ងៃទី១២ សីហា ឆ្នាំ២០១៥ ។
ដីការក៏បានលើកឡើងថា បទល្មើសរបស់អាឡិច ស្ថិតក្នុងបញ្ញាត្តិឲ្យផ្តន្ទាទោសតាមមាត្រា២៩ និង៤២៤នៃក្រមព្រហ្មទណ្ឌ ។ សម្រាប់អង្គសវនាការមានលោក កែវ សុខា ជាចៅក្រមជំនុំជម្រះ លោក អ៊ីវ ត្រាយ តំណាងអយ្យការ និងលោកស្រី រិន្ទ សីហា ក្រឡាបញ្ជីសវនាការ ៕
ចែករំលែកព័តមាននេះ