ខេត្តសៀមរាប ៖ តាមសេចក្តីរាយការណ៍ពីពលរដ្ឋបានប្រាប់ភ្នាក់ងារ កោះសន្តិភាព នៅព្រឹកថ្ងៃទី៣០ ខែមេសា ឆ្នាំ២០១៩ នេះថាឈ្មួញមានអំណាចកំពុងតែធ្វើសកម្មភាពកាយត្រពាំងបុរាណ និងដឹកអាចម៍ដីចេញយកទៅលក់ក្នុងក្រុងសៀមរាបយ៉ាងគគ្រឹកគគ្រេងដោយមានការអនុញ្ញាតពីអាជ្ញាធរអប្សរា ។…
ខេត្តសៀមរាប ៖ តាមសេចក្តីរាយការណ៍ពីពលរដ្ឋបានប្រាប់ភ្នាក់ងារ កោះសន្តិភាព នៅព្រឹកថ្ងៃទី៣០ ខែមេសា ឆ្នាំ២០១៩ នេះថាឈ្មួញមានអំណាចកំពុងតែធ្វើសកម្មភាពកាយត្រពាំងបុរាណ និងដឹកអាចម៍ដីចេញយកទៅលក់ក្នុងក្រុងសៀមរាបយ៉ាងគគ្រឹកគគ្រេងដោយមានការអនុញ្ញាតពីអាជ្ញាធរអប្សរា ។
ដីត្រពាំងបុរាណ(ត្រពាំងខ្មោច) ដែលអាជ្ញាធរជាតិអប្សរាកាន់កាប់រាល់ថ្ងៃនេះ គឺមានទីតាំង ស្ថិតនៅភូមិស្រះស្រង់ខាងត្បូង សង្កាត់នគរធំ ក្រុងសៀមរាប ស្ថិតនៅក្នុងតំបន់ការពារទី១នៃឧទ្យានអង្គរ ដែលជាសម្បត្តិបេភណ្ឌពិភពលោក និងជាដីទ្រព្យសម្បត្តិសាធារណ:របស់រដ្ឋដែលអាជ្ញាធរអប្សរាមានភារកិច្ចកាតព្ធកិច្ច ត្រូវគ្រប់គ្រងថែរក្សាការពារនិងអភិវឌ្ឍប្រកបដោយចីរភាព ។
តាមប្រភពពីពលរដ្នដែលរស់នៅក្នុងភូមិស្រះស្រង់បានលួចខ្សឹបប្រាប់ថា ពួកគេបានមើលឃើញមានរថយន្តធំៗជាច្រើនគ្រឿងដឹកជញ្ជូនអាចម៍ដីចេញពីទីតាំងត្រពាំងបុរាណ(ត្រពាំងខ្មោច)ដែលខាងអាជ្ញាធរអប្សរាកាន់កាប់រាល់ថ្ងៃយ៉ាងរលូន គ្មានការហាមឃាត ឬសួរនាំអ្វីទាំងអស់ពួកគេសង្ស័យថា ប្រហែលពួកអាជ្ញាធរមូលដ្ឋាន ជាពិសេសអាជ្ញាធរអប្សរាដែលកាន់កាប់នៅទឹកដីតំបន់នោះ បើប្រជាពលរដ្ឋធ្វើផ្ទះ ឬ ទ្រុងមាន់មករឹបអូស សូម្បីតែឈើ១ដើមក៏យកទៅដាក់ឡានដែរ ចំពោះឈ្មួញធំ កាប់កាយដីយកទៅលក់ ឬធ្វើផ្ទះថ្មគ្មានឃើញមកជិតឡើយ ។
គួរបញ្ជាក់ផងដែរថា យោងតាមលិខិតមួយរបស់អាជ្ញាធរអប្សរាចុះថ្ងៃទី១ ខែកុម្ភៈ ឆ្នាំ២០១៩ មានចុះហត្ថលេខាដោយលោក ហង់ ពៅ អគ្គនាយកស្ដីទី(បច្ចុប្បន្នអគ្គនាយកនៃអាជ្ញាធរជាតិអប្សរា) បានជម្រាបជូន លោក ង៉ា ចុង ចៅសង្កាត់នគរធំ តបតាមកម្មវត្ថុសំណើរសុំបន្តការដ្ឋានស្ដារត្រពាំងបុរាណ(ត្រពាំងខ្មោច)នេះឡើងវិញ ដែលស្ថិតនៅភូមិស្រះស្រង់ខាងត្បូង សង្កាត់នគរធំ ក្រុងសៀមរាប ។
នៅក្នុងលិខិតនោះបានបញ្ជាក់បន្ថែមថា ត្រូវឱ្យចៅសង្កាត់នគរធំចុះស្ដារក្នុងជម្រៅ១.៥ម៉ែត្រ ដោយមានការគ្រប់គ្រងត្រួតពិនិត្យបច្ចេកទេស និងផ្ដល់យោបល់ ទៀងទាត់ពីនាយករដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការ ។
បើទោះបីត្រពាំងខ្មោចនេះត្រូវបានស្ដាររួចរាល់ក៏មិនអនុញាតឲ្យអាជ្ញាធរសង្កាត់យកទីតាំងត្រពាំងបុរាណនេះរៀបចំជាកន្លែងលក់ដូរប្រកបអាជីវកម្មផ្សេងនៅតាមខ្នងត្រពាំងឬចិញ្ចឹមត្រីក្នុងត្រពាំងឡើយ ៕
ចែករំលែកព័តមាននេះ