ខេត្តព្រះស៊ីហនុ ៖ ក្រោយពីជនសង្ស័យជាជនជាតិចិនចំនួន២នាក់ត្រូវប្រជាពលរដ្ឋវាយទ្រមខ្លួន បន្ទាប់ពីក្រុមជនសង្ស័យធ្វើសកម្មភាពគាស់ទ្វាររថយន្តលួចយកសម្ភារមួយចំនួន ហើយត្រូវបានកម្លាំងសមត្ថកិច្ចនគរបាលកសាងសំណុំរឿងបញ្ជូនជនសង្ស័យទាំង២នាក់នោះទៅកាន់សាលាដំបូងខេត្តព្រះសីហនុ ក្រោមការចោទប្រកាន់ពីបទលួច ។
ជនសង្ស័យទាំង២នាក់ខាងលើដែលត្រូវសមត្ថកិច្ចចាប់ឃាត់ខ្លួន ក្នុងនោះម្នាក់ឈ្មោះ JING HUA PING ភេទប្រុស អាយុ៣៨ឆ្នាំ ជនជាតិចិន មុខរបរមិនពិតប្រាកដ ស្នាក់នៅភូមិ២ សង្កាត់២ ក្រុងព្រះសីហនុ ខេត្តព្រះសីហនុ និងម្នាក់ទៀតឈ្មោះ TONG JING MING ភេទប្រុស អាយុ៤៦ឆ្នាំ ជាជនជាតិចិន មុខរបរមិនពិតប្រាកដ ស្នាក់នៅសណ្ឋាគារ ជីងទីង ស្ថិតនៅភូមិ២ សង្កាត់២ ក្រុងព្រះសីហនុ ខេត្តព្រះសីហនុ ។
យោងតាមរបាយការជាផ្លូវការរបស់កម្លាំងសមត្ថកិច្ចនគរបាលជំនាញនៃស្នងការដ្ឋាននគរបាលខេត្តព្រះសីហនុ បានបញ្ជាក់ថា កាលពីវេលាម៉ោង១០និង៣០នាទីព្រឹកថ្ងៃទី២៨ ខែមេសា ឆ្នាំ២០១៩ នៅម្តុំហាងសំពៅមាស ស្ថិតនៅភូមិ១ សង្កាត់៣ ក្រុងព្រះសីហនុ ខេត្តព្រះសីហនុ មានករណីជនសង្ស័យជាជនជាតិចិន២នាក់ធ្វើសកម្មភាពគាស់ទ្វាររថយន្តលួចយកសម្ភារៈមួយបានកើតឡើង ។
តាមប្រភពដដែលបានបន្តថា មុនពេលកើតហេតុ ជនសង្ស័យទាំង២នាក់បានជិះម៉ូតូ១គ្រឿងម៉ាកអ៊ែរប្លែត ពណ៌ទឹកប៊ិច គ្មានស្លាកលេខ បានធ្វើសកម្មភាពគាស់ទ្វាររថយន្តរបស់ប្រជាពលរដ្ឋ ដែលចតទុកនៅក្បែរហាងសំពៅមាសលក់ដូរ ស្ថិតនៅ សង្កាត់៣ ក្រុងព្រះសីហនុ ហើយភ្លាមៗនោះដែរក៏ត្រូវម្ចាស់រថយន្តឃើញទាន់ និងស្រែកឆោឡោឡើង ធ្វើឱ្យជនសង្ស័យទាំង២នាក់ភ័យក៏ព្យាយាមរត់គេចខ្លួន តែត្រូវកម្លាំងជំនាញរបស់ផែននគរបាលព្រហ្មទណ្ឌ និងកម្លាំងប៉ុស្តិ៍៣ឃាត់ខ្លួនបានតែម្តង ហើយត្រូវប្រជាពលរដ្ឋនាំគ្នាស្វាគមន៍ម្នាក់មួយដៃម្នាក់មួយជើង បណ្តាលឱ្យជនសង្ស័យទាំង២នាក់ទ្រមខ្លួនផងដែរ ។ បន្ទាប់មកជនរងគ្រោះដែលមិនស្គាល់អត្តសញ្ញាណក៏បើករថយន្តចេញទៅបាត់ ហើយកម្លាំងសមត្ថកិច្ចបាននិងកំពុងធ្វើការស្វែងរកផង ។
ទោះបីយ៉ាងណាក្តី សមត្តកិច្ចបានចាត់ទុកថា អំពើចោរកម្មនេះជាបទល្មើសជាក់ស្តែង ទោះបីបើសកម្មភាពនោះ ប្រព្រឹត្តមិនទាន់បានសម្រេចក៏ដោយ ហើយនៅពេលចាប់ខ្លួនបញ្ជូនទៅតុលាការ ជនសង្ស័យបានសារភាពផងដែរថា ពួកខ្លួនធ្លាប់ធ្វើសកម្មភាពគាស់ទ្វាររថយន្តលួចយកសម្ភារៈចំនួន២លើករួចមកហើយដែរនៅក្រុងព្រះសីហនុ លុះលើកនេះប៉ះចំថ្ងៃស៊យ ត្រូវគេចាប់បាន និងវាយឡើងទ្រមខ្លួន កុំតែបាននគរបាលអន្តរាគមន៍ទាន់ កុំអីក្ស័យជីវិតបាត់ទៅហើយ ៕
ចែករំលែកព័តមាននេះ